SALAMO 140 - Tuvalu Revised Bible

Ko te 'Talo mō se Puipuiga

1Te Aliki, fakasao mai au mai tino ma'sei;

Puipui mai au mai tino fakatupu taua.

2E fai faeloa ne latou a aofaga ma'sei,

E faka'tupu faeloa ne latou a fakakinauga.

3 Loma 3.13 A olotou laulaufaiva ko pela eiloa me ne gata i te fakamataku.

Olotou pati foki e pela eiloa mo te poisini o te gata.

4Te Aliki, puipui mai au mai te malosi o tino ma'sei;

Tausi mai au mai tino sauā

Kola e taumafai o fakatakavale au.

5A tino fakamata'mata ko toka o malei au,

Ko oti ne 'fola olotou matasele,

Ko toka foki olotou malei i tafa o auala ke lavelave ei au.

6Au e fai atu ki te Aliki, “A koe ko toku Atua.”

Te Aliki, fakalogo mai ki taku fakatagi mō se fesoasoani!

7Te Aliki toku Atua, mo toku lafiga malosi,

Ko oti ne puipui ne koe au i taimi o taua.

8Te Aliki, sa tukugina ki tino ma'sei a mea e ma'nako latou ki ei;

Sa fakataunugina olotou togafiti ma'sei.

9Mo a e manumalo oku fili;

Ke toe foki eiloa olotou togafiti ki a latou.

10Faka'to ifo ki a latou a fatu 'ka;

Ke 'to latou ki se lua, kae ke se toe mafai o olo ake.

11Ke mo a e fakataunugina a molimau 'se a tino,

Ke i luga i tino fakatupu taua te masei mo te malaia.

12Te Aliki, e iloa ne au me e puipui ne koe tino ma'tiva,

Mo saolotoga o tino fakaalofa.

13Ka viki atu a tino amiotonu ki a koe;

Ka 'nofo fakatasi latou mo koe.