IOPU 16 - Tuvalu Revised Bible

1-2Ko oti ne lagona ne au a muna pena i aso mua;

A te fakamafanafanaga tena e fai mai ne koutou, se fakatigaina fua.

3E a, ka faipati eiloa koe ki te se gata mai?

E a, e masani eiloa koe o fai ne koe a te muna fakaoti?

4Au moi ko koutou, ka ko koutou e penei mo au,

E penei e mafai faeloa ne au o fai a muna katoa a koutou kona ne fai.

E mafai foki ne au o lulu toku ulu kae faipati atu seai se manavaga.

5E mafai ne au o fakamalosi otou loto ki oku manatu

Fesoasoani kae faipati faeloa atu au ko te mea ke mafanafana otou loto.

6Kae e seai se muna e fai ne au ke tai maua ei soku fesoasoani,

A toku nofo mu penei, e se feoloolo ei toku mae.

7Te Atua, au ko logofiofio eiloa ne fai ne koe;

Ne tuku ne koe toku kaiga ke tamate katoa.

8Ne fakasala ne koe au; a koe nei ko toku fili.

Au nei ko te ivi faeloa mo te pakili,

Ko fai te mea tena mo molimau ki tino i a au e agasala.

9Ne saesae au ne te Atua i tena kaitaua;

E pula toka mai ki a au mo te kaitaua.

10A tino e o'mai o fakalili au; e potopoto mai i oku tafa

Kae laupapa ne latou oku mata.

11Au ko tuku atu ne te Atua ki te malosi o tino masei.

12Au ne nofo i te filemu, kae ne puke mai te Atua ki toku kakia o ta kae tukipala ne ia a au.

Au ne fakaaoga ne te Atua e pela me se mea taketi,

13Kae sana ne ia a matasana ki a au mai feitu katoa,

A matasana kona ne tu i a au, pakia ei au;

Ka ko ia e se fia alofa lele mai eiloa.

14E fakapakia faeloa ne ia a au; e taua mai ki a au e

Pela me se sotia ko fakavalevale i te kaitaua.

15Au ne tagi fanoanoa kae pei ki gatu lautaga, kae sagasaga fua i te pefu i a au ko takavale masei.

16Au ne tagi ke oko eiloa ki te taimi ko kula ei oku mata kae fulafula, mo oku laumata ko lailai,

Ko i ai te ata o te mate.

17Ka ko au e se 'se i te agasala ko te fakasaua,

A taku talo ki te Atua e fai mo toku loto ma.

18Te lalolagi, sa funagina a mea 'se ne fai mai ki a au!

A taku tagi mo se fai mea tonu ke mo a e taofigina!

19 Iopu 19.25 E isi se tino i te lagi tela e kau mai ki a au.

20Au e kote ne oku taugasoa; au e tagi mo oku loimata ko sali atu ki mua o te Atua.

21Au e manako ki se tino ke fakamolemole atu ki te Atua ke fakasao au,

E pela me se tagata e fakamolemole ke fakasao sena taugasoa.

22A oku tausaga ko oti atu, au ko fanatu i te auala e se toe foki mai ei au.