IELEMIA 14 - Tuvalu Revised Bible

Ko te Oge Vai

1A te Aliki ne faipati mai ki a au e uiga ki te oge vai, ana muna,

2“A Iuta ko tagi fanoanoa;

A ona fa'kai ka mate,

A tino i ei ko takato fua i te laukele mo te fanoanoa,

Ka ko Ielusalema ko tagi atu ke maua se fesoasoani.

3A tino maumea ko uga atu olotou tavini o sala mai ne vai;

E olo ki vaikeli

Kae seai ne vai e maua ne latou i ei;

E foki mo olotou tiā vai e seai ne vai i ei.

E funa olotou mata me ko tukaki olotou

Loto kae ko numi valevale.

4A tino toki lakau ko mafatia olotou loto,

Kae funa olotou mata

Me ko seai ne vaiua

Ka ko te laukele foki ko malō eiloa.

5A te matua tia ko tiaki tena tama ne fatoa fanau i te vao

Me ko seai ne mouku mo ona kai.

6A asini vao e tu i luga i ulu o mauga foliki

Kae taumafai o sala se ea lei mo olotou manava e pela me ne tiakolo;

A mata o latou ko gasolo o se lei me ko seai ne olotou meakai.

7A oku tino ko tagi mai ki a au penei,

‘E ui eiloa ko 'po matou ne omotou agasala,

Kae fakamolemole te Aliki,

Fesoasoani mai ki a matou e pela mo tau tautoga.

A matou ne fulitua atu ki a koe i taimi e uke;

A matou ne agasala atu ki a koe.

8A koe ko te fakamoemoega e tokotasi o Isalaelu;

Ko koe ne fakasao ne koe matou mai i fakalavelave.

Ai a e pela ei koe me se tino fakaatea i te motou fenua,

Pela me se tino fai malaga tela e nofo i te po fua e tasi?

9Ai a e pela ei koe me se tino ne poi i te fili ko i luga,

Pela me se sotia ko seai sena malosi o fesoasoani atu ki nisi tino?

Te Aliki, a koe e fakatasi mai eiloa ki a matou!

A matou ko ou tino;

Sa tiakina mai matou.’ ”

10Muna a te Aliki e uiga ki tino kona, “E fiafia latou o tele keatea mai i a au, kae e se mafai o fakaeteete i olotou uiga. Tela la, au ko se fiafia ki a latou. Ka masaua eiloa ne au olotou mea se ne fai, kae fakasala latou ona ko olotou agasala.”

11A te Aliki ne fai mai ki a au penei, “Sa fai mai ke fesoasoani au ki tino kona.

12E ui eiloa e fai olotou fakalikilikiga, kae ka se fakalogo eiloa au ki olotou tagi mō se fesoasoani; kafai e ofo mai ne latou ki a au a taulaga sunu mo taulaga saito, e se talia lele eiloa ne au. Ka tamate ne au latou i te taua, ka mate i te fiakai, ka mate foki i famai.”

13Ne fai atu au penei, “Te Aliki Sili, e iloa ne koe i pelofeta e fai ki tino me e seai ne taua, seai foki ne mate i te fiakai, me i olotou muna i a koe ne tauto me ka tumau te filemu i te motou fenua.”

14Kae ne tali mai te Aliki penei, “A pelofeta e fakaaoga ne latou toku igoa kae faipati ki muna loi; e seki uga ne au latou, seki ai ne fakatonuga ne tuku atu ne au ki a latou, seai foki eiloa se pati ne fai ne au ki a latou. A fakaasiga kona e faipati ne latou e seki fanatu mai i a au; a valoaga e fai ne latou ne mea fua ne mafaufau ne latou, tela la, e se aoga.

15Ko au, te Aliki, ko fai atu ne au ki a koe a te mea ka fai ne au ki pelofeta kona e seki uga atu ne au kae e faipati i toku igoa, o fai pela me e seai se taua mo te mate i te fiakai e oko mai ki te fenua — ka tamate ne au latou i te taua, ka mate foki i te fiakai.

16A tino kola ne faipati ne latou ki ei a mea kona, ka mate foki pena mo latou. A olotou foitino mate ka pei ki auala o Ielusalema, kae ka seai se tino ke tanu ne ia olotou foitino kona. A te mea tena e tupu ki a latou katoa — e aofia ei olotou avaga, olotou tamaliki tagata, mo olotou tama fafine. Ka taui atu ne au ki a latou e tusa eiloa mo olotou amioga masei.”

17A te Aliki ne fakatonu mai ki a au ke faipati atu au ki tino e uiga ki te mea e fanoanoa ei au, kae ke fai atu foki au penei:

“A oku loimata ke tafe faeloa i oku mata i te ao mo te po,

Ke mo a eiloa e gata toku tagi,

Me i oku tino ko pakia masei eiloa kae ko masei valevale.

18I taku fanoga ki fatoaga,

Ne lavea ne au a foitino o tagata kola ne mate i te taua;

I taku uluga ki loto i fa'kai,

Ne lavea ne au a tino ko tai mate ona ko te fiakai.

A pelofeta mo faitaulaga e fai olotou galuega,

Kae e se iloa ne latou olotou mea e fai.” A Tino ko Fakamolemole ki te Aliki

19Te Aliki, e tonu eiloa ko se fiafia lele eiloa koe ki a Iuta?

Ko se fiafia koe ki tino o Siona?

Ai a ne ta fakamasei ei ne koe matou,

Tenei la ko se mafai o lei omotou pakiaga?

Ne fakamoemoe matou ki se filemu,

Kae e seai eiloa se mea lei ne oko mai ki a matou;

Ne fakamoemoe matou ke fakalei omotou pakiaga,

Ka ko mea fakamataku fua ne oko mai ki a matou.

20Te Aliki, a matou ne agasala atu ki a koe;

Fakamagalo mai omotou agasala

Pela foki agasala a omotou tupuga.

21Masaua au tautoga ne fai, kae sa ita mai ki a matou;

Sa fakamasiasigina Ielusalema,

Te koga e tuku i ei tou nofogaaliki malu.

Sa ofa te feagaiga a koe ne fai mo matou.

22E seai se tupua i so se malo e mafai o faka'to mai ne ia se vaiua;

E se mafai foki ne te lagi i a ia eiloa o faka'to mai se vaiua.

Te Aliki te motou Atua, a matou e fakatuaga ki a koe,

Me ko koe fua e mafai o fai a mea kona ke tupu.