IOPU 29 - Tuvalu Revised Bible

Ko te Toe Faipatiga a Iopu

1Iopu ko toe faipati.

Ko muna a Iopu

2Aku muna eiloa ke foki toku olaga ki aso kola ne tausi faka'lei sale ei au ne te Atua.

3I aso kona, a te Atua e fakatasi mai faeloa ki a au

Kae ne aumai ne ia a te mainaga i te taimi ne sasale ei au i loto i te pouliga.

4I aso kona, au ne maumea, ka ko toku fale ne puipui eiloa ne te Atua me i a maua e taugasoa.

5A te Atua Malosi ne fakatasi mai ki a au,

Ka ko au ne nofo fakatasi mo aku tamaliki.

6E uke a susu ne maua ne au mai i aku pulumakau mo aku kouti,

Ka ko aku lakau ko olive e ola i laukele papapa.

7I so se taimi e maopoopo ei a toeaina, kae nofo au i ei,

8A tamataene e faka'tafa atu keatea manafai e lavea ne latou a au,

Ka ko toeaina e tu ki luga o fakaaloalo mai ki a au.

9A takitaki o te fenua ko se faipati;

10Ke oko foki eiloa ki tino tafasili i te tāua ko se faipati.

11A tino katoa kola ne lavea ne latou a au, io me ne logo i oku tala,

E tavae ne latou aku mea ne fai.

12Au e fesoasoani ki tino mativa manafai e manako ki ne fesoasoani;

E fesoasoani foki au ki tamaliki seai ne matua, kola ko seai se koga e olo ki ei.

13A tino puapuaga e tavae ne latou a au,

E fesoasoani foki au ki fafine ko mate olotou avaga,

Ke saogalemu olotou olaga.

14Aku mea katoa e fai sale, ne fai mo te amiotonu mo te fai mea tonu.

15Au e pela me ne mata ki tino kivi, pela me ne vae ki tino e masei a vae.

16Au e pela me se tamana ki tino mativa kae fesoasoani foki au ki tino fakaatea kola e maua ne puapuaga.

17E fakaseaoga ne au te malosi o tino amio masei,

Kae fakasao ne au a tino kola ka ta ne latou.

18Au ne fakamoemoe faeloa o ola i se olaga loa,

Kae mate foki au i toku fale mo te filemu.

19Au e pela me se lakau tela e isi faeloa ne vai i ona aka mo ona kaula e siu faeloa i te sau.

20A tino katoa e masani o tavae sale ne latou a au,

A toku malosi e se mafai o gata.

21Kafai e fai oku manatu fakatonutonu, a tino e se ua katoa,

Kae fakalogologo faka'lei katoa ki aku muna e fai;

22E seai foki eiloa se lotou muna e fakaopoopo, manafai ko oti aku muna ne fai.

Aku muna e ulu ki olotou loto e pela me ne motigā ua;

23A tino katoa e talia ne latou aku muna, e pela eiloa mo tino toki lakau e talia ne latou mo te fiafia a vaiua i te tau o te muakiga.

24Au e kata ki a latou, manafai ko isi te loto fakalotoloto lua i a latou;

E fakamalosigina olotou loto manafai e kilo mai ki oku mata e mata fiafia.

25Ne fai au mo takitaki, fai foki ne au a ikuga;

Ne takitaki ne au latou e pela me se tupu e takitaki ana kautau,

Kae e fakamafanafana foki ne au latou i taimi o puapuaga.