ISAIA 29 - Tuvalu Revised Bible

Ko te Ikuga o Ielusalema

1A Ielusalema, te fata-fai-taulaga a te Atua ko malaia! A te fa'kai tela ne nofo i ei a Tavita ko malaia! Tuku atu e toe tasi me toe lua tausaga ke seke, fakatasi mo aso fakamanatu mo kaiga fiafia i ei,

2ka oti ko aumai ei ne te Atua a te malaia ki te fa'kai tela ne fakaigoa ko te “Fatafaitaulaga a te Atua.” A tino ka tagi fanoanoa, ka ko te fa'kai katoa ka pela me se fata-fai-taulaga tela e ufi kātoa ne te toto.

3A te Atua ka taua atu ki te fa'kai, nikoi ne ia kae fakatoka o puke.

4A Ielusalema ka pela me se agaga tela e taumafai ke faipati aka a ia mai i lalo i te laukele, pela me se leo foliki mai i lalo i te pefu.

5Ielusalema, a tino fakaatea katoa kola ne taumafai o ta koe ka agina keatea e pela me ne pefu, ka ko olotou kautau fakamataku ka lele keatea pela me ne kausaito. Ka poi koutou

6i a koutou e fakasao ne te Aliki Malosi ki kautaufa mo mafuie. Ka uga atu ne ia a matagi malosi mo afi fakamataku;

7tena la, a kautau katoa a malo kola e taua atu ki te fa'kai o te fata-fai-taulaga a te Atua, olotou meatau mo kope katoa, mo mea katoa, ka galo atu e pela me se moemiti, pela me se ata ne mafaufau se tino ki ei i te po.

8A malo katoa kola e maopoopo o taua atu ki a Ielusalema ka pela me se tagata mate fiakai tela e moemiti i a ia e kai, kae pula aka nei ko oko eiloa i ana likiliki; io me e pela me se tagata ka mate i te fia inu tela e moemiti i a ia e inu kae pula aka nei, a tena kato ko malo faka eiloa i te fia inu.

Ko Muna Polopoloki kola e seki Saga ki ei a Tino

9Ke tumau eiloa te valea o koutou! Ke tumau foki te kivi o otou mata! Ko'na kae seki inu ki uaina! Takasese kae seai eiloa se motigā kava kai miti koutou ki ei!

10Loma 11.8A te Aliki ko oti ne fai ne ia koutou ke takamiomio, kae fai foki ne ia koutou ke moe palapala. A pelofeta ne tau o fai mo mata o te fenua, ka ko te Atua ko oti ne faka kivi ne ia latou.

11A uiga o fakaasiga fakapelofeta katoa ka 'funa mai i a koutou; ka pela me se peluga pepa tela e mau ei te fakailoga ke tapu e tala. Kafai e ave ne koe ki se tino tela e iloa ne ia o faitau, kae fai koe ki ei ke faitau atu ki a koe, kae ka tali mai a ia me e se mafai ne ia me ko oti ne fakamau ki ei te fakailoga ke tapu ma tala.

12Kafai e tuku atu ne koe ki se tino tela e se iloa o faitau, kae fai koe ki ei ke faitau atu ki a koe, kae ka fai mai a ia me e se mafai ne ia i a ia e se iloa o faitau.

13 Mata 15.8,9; Male 7.6,7 Muna a te Aliki, “A tino konei e fai pela i a latou e tapuaki mai ki a au, ka ko olotou muna e fai e seai ne uiga, mo olotou loto foki e tuku eiloa i se koga fakaatea. A te lotu a latou ko tulafono mo tu a latou, kola ne tauloto ne latou i olotou loto.

141Koli 1.19 Tela la, ka fakapoi ne au latou ki se fakasalaga, kae tautali atu foki sua fakasalaga mo sua fakasalaga. A tino poto ka valea, a te lotou poto ka se aoga.”

Ko te Fakamoemoega mō Aso Fakamuli

15A tino kola e taumafai o funa olotou fuafuaga mai i te Aliki, ka malaia! E fai olotou aofaga i se auala funa, kae leake eiloa nei me e seai se tino e lavea ne ia olotou mea e fai, io me e iloa ne ia.

16Isa 45.9Loma 9.20 Ko fuli'se ne latou a mea katoa. Ko oi e tāua atu, ko te one, io me ko te tino tela e faite ne ia a mea ki te one? E mafai ne se mea ne faite ne se tagata o faipati mai ki a ia penei, “E seki faite ne koe au”? Io me e fai mai ki a ia penei, “E se iloa ne koe tau mea tena e fai?”

17E pela mo te faigā muna penei, a te togā vao pupu eiloa e se leva ko fai mo laukele e toki ei lakau kaina, ka ko te laukele tena e toe foki eiloa ki te toga vao pupu.

18Kafai e oko mai te aso tena, a tino taliga tuli ka mafai o lagona ne latou se tino e faitau atu se tusi ki a latou i se leo maluga, mo tino kivi kola ne nofo faeloa i te pouliga, ka pula olotou mata kae matea ne latou a mea.

19A tino mativa mo tino malalo ka toe maua ne latou te fiafia tela e aumai ne te Aliki, te Atua tapu o Isalaelu.

20Ko te gataga tena o tino kola e pule fakasaua ki nisi tino kae se ava ki te Atua. A tino agasala katoa ka 'ta fakapalele.

21A te Atua ka 'ta fakapalele ne ia a latou kola e fakamasei ne latou a nisi tino, tino kola e taofi ne latou te fakasalaga o tino amio masei, mo tino kola e fai tala loi ko te mea ke se sao a tino amiotonu i te fakamasinoga.

22Tela la, muna a te Aliki, te Atua o Isalaelu tela ne fakasao ne ia a Apelaamo mai i fakalavelave, “Tino o toku fenua, a koutou ka se toe fakamasiasigina, ka se toe lau'tea foki otou mata i te ma.

23Kafai ko lavea ne koutou a tamaliki konei ka avatu ne au ki a koutou, kae ka talia ne koutou i a au ko te Atua tapu o Isalaelu. Ka fakaaloalo mai koutou ki a au, kae ma'taku mai ki a au.

24A tino valea ka mafai o malamalama, ka ko tino kola e musumusu faeloa ka fiafia ke akoakogina latou.”