IELEMIA 1 - Tuvalu Revised Bible

1Ielemia Mai mua o te fakatakavalega ne Papelonia a Iuta, te pelofeta ko Ielemia ne fautua ki tupu, faitaulaga, mo tino e uiga mo te fakamasinoga a te Atua tela ka oko mai. E ui eiloa te mafā mo te faigata ki olaga o tino a fekau konei, kae ko te pelofeta ko Ielemia ne takutonu foki ne i a te taimi tela ka fai ei ne te Atua se feagaiga fou (ma'liega) mo ana tino filifilia. A te tusi tenei e tusi i ei a muna ne faipati ne Ielemia te tama tagata a Hilikia, se faitaulaga e tokotasi mai i faitaulaga o te fa'kai ko Anatota, i te koga laukele o Peniamina.

22Tupu 22.3—23.27; 2NTupu 34.8; 35.19 A te Aliki ne faipati ki a Ielemia i te sefulutolu o tausaga i te nofoaiga a te Tupu ko Iosia te tama tagata a Amoni i Iuta,

32Tupu 23.36; 24.7; 2NTupu 36.5-8; 2Tupu 24.18; 25.21; 2NTupu 36.11-21 ne toe faipati foki te Aliki ki a Ielemia i te nofoaiga a Ieoiakimo, te tama tagata a Iosia. Fakamuli ifo, ne toe faipati atu foki te Atua ki a Ielemia i taimi e uke, ke oko eiloa ki te sefulutasi o tausaga o te nofoaiga a Setekaia, te tama tagata foki a Iosia. I te lima o masina o te tausaga tena, ne ave fakapagota ei a tino Ielusalema.

Ko Kalagagina Ielemia

4Muna a te Aliki ki a au,

5“Ne filifili ne au a koe kae seki avatu ei ne au te ola ki a koe; koi tuai koe o fanau, kae ko leva ne filifili ne au a koe ke fai mo pelofeta ki malo.”

6Ne tali atu au penei, “Te Aliki Sili, e se iloa ne au o faipati, au koi foliki.”

7Ka ko te Aliki ne fai mai ki a au penei, “Sa fai mai pena i a koe e foliki, kae fano o folafola atu a mea katoa ne fakatonu atu ne au ke fai ne koe ki tino kola e uga ne au koe ki ei.

8Sa mataku i a latou, me i a au e fakatasi atu ki a koe o puipui koe. Ko au, te Aliki, tena ne faipati atu!”

9Tena la, ne kapa mai te lima o te Aliki, fakapatele mai ki oku laugutu, kae fai mai ki a au penei, “Fakalogo mai, ka avatu nei ne au a muna e tau o faipati ne koe.

10I te aso nei, ko avatu ne au ki a koe a te pule i fenua mo malo, te pule o unu kae ofa a mea, o fakamasei kae fakatakavale, o faite kae toki a mea.”

Ko Fakaasiga e Lua

11Ne fesili mai te Aliki ki a au penei, “Ielemia, se a tau mea e lavea?”

Ne tali atu au, “Se kaula o te lakau ko te alamoni.”

12Muna a te Aliki, “E tonu koe, kae tenei au e onoono faka'lei ke taunu aku pati ne fai.”

13Ne toe faipati mai te Aliki ki a au, ana muna, “E isi aka foki se mea ko lavea ne koe?”

Ne tali atu au, “E lavea ne au a te ulo ko 'puna i ma'tu, kae ko pili o maligi mai ki te feitu tenei.”

14Muna a te Aliki ki a au, “A te masei valevale ka oko mai ki a latou katoa kola e nofo i te fenua tenei, e vau mai i ma'tu,

15me i a au ka kalaga ki malo katoa mai i ma'tu ke o'mai. A olotou tupu ka faite olotou nofogaaliki i mataloa o Ielusalema pela foki i ona pui, pela foki i nisi fa'kai o Iuta.

16Ka fakasala ne au oku tino me ne agasala; ne tiakina ne latou a au, ne ofo atu olotou taulaga ki nisi atua, kae faite foki ne latou a tupua o tapuaki ki ei.

17Ielemia, fakatoka o fano o fai atu ki a latou a mea katoa ne fakatonu atu ne au ke fai ne koe. Sa mataku nei i a latou, i te mea ma silia atu te mea e fai ne au o fakamatakutaku koutou i te taimi e nofo tasi ei koutou mo latou.

18-19Ielemia, fakalogo mai! A tino katoa i te fenua tenei, ko tupu o Iuta, ko tino maluga, ko faitaulaga, mo tino o te fenua, ka takalialia i a koe. Kae i te aso nei, ka avatu ne au a te 'mana e mafai ei ne koe o fakafesagai ki a latou; ka pela koe me se fa'kai malosi, se pou fiti, io me se pui palasi. E se mafai o fakatakavale ne latou a koe, me i au e fakatasi atu faeloa o puipui koe. Ko au, te Aliki, tena ne faipati atu.”