LEVITIKO 18 - Tuvalu Revised Bible

Ko Amioga Masei e se tau o Fai ne Tino Isalaelu

1Ne faipati mai a te Aliki ki a Mose

2ke faipati atu ki tino Isalaelu penei, “Au ko te Aliki te otou Atua.

3Sa tau'tali ki amioga a tino Aikupito, te fenua ne nofo koutou i ei, io me ko amioga a tino o te fenua o Kanana, te fenua tenei e 'taki ne au koutou ki ei.

4Faka'logo ki aku tulafono kae fai a mea e fakatonu atu ne au. Au ko te Aliki te otou Atua.

5Nee 9.29; Esela 18.9; 20.11-13; Luka 10.28; Loma 10.5; Kala 3.12 Tau'tali ki faifaiga mo Tulafono ko oti ne tuku atu ne au. Ka sao otou ola manafai e faka'logo koutou. Au ko te Aliki.”

6Konei a fakatonuga ne tuku mai ne te Aliki. Sa moe mo se tino o tou kaiga.

7Sa fakamasiasi ne koe tou tamana o moe mo tou matua. E se tau foki mo koe o fakamasiasi tou matua tonu.

8Levi 20.11; Teu 22.30; 27.20Sa fakamasiasi ne koe tou tamana o moe mo nisi avaga a ia.

9Levi 20.17; Teu 27.22Sa moe mo tou tuagaene io me se tuagaene fai o koe, e tusa eiloa me ne 'tupu tasi aka koulua i te fale e tasi io me ikai.

10E tapu koe e moe mo tou mokopuna fafine; a te mea tena se fakamasiasiga fua o koe.

11E tapu koe e moe mo se afā tuagaene o koe; a ia se tuagaene foki o koe.

12-13Levi 20.19,20E tapu koe e moe mo te tuagane o tou tamana, io me ko te taina o tou matua.

14E tapu koe e moe mo se avaga a te taina o tou tamana; me i a ia se matua foki o koe.

15Levi 20.12E tapu koe e moe mo te avaga a tau tama tagata,

16Levi 20.21 io me ko te avaga a tou taina.

17Levi 20.14; Teu 27.23E tapu koe e moe mo se tamaliki fafine io me se mokopuna fafine o se fafine ko oti ne moe mo koe, seiloa fua i te mea manafai e kaiga mo koe, a te mea tena se mataifale.

18E tapu e puke mai ne koe te taina o tau avaga ke fakaopoopo ki au avaga, i taimi koi ola ei tau avaga.

19 Levi 20.18 Sa moe mo se fafine i te taimi e maua ei a ia i te masaki o fafine, me i a ia e se 'ma.

20Levi 20.10Sa moe mo te avaga a te sua tagata, i a koe ma se 'ma.

21Levi 20.1-5Sa tuku atu se tamaliki a koe ke fakaaoga i tapuakiga ki te atua ko Moloka, me e taku valea ei te igoa o te Aliki.

22Levi 20.13E tapu se tagata e moe mo te sua tagata; a te Atua e se fiafia ki te mea tena.

23Eso 22.19; Levi 20.15,16; Teu 27.21E tapu se tagata io me se fafine e moe mo se manu; a te mea tena e lailai ei te tino.

24Sa fai ne koutou a amioga kona, i a koutou ma se 'ma, me kona a amioga e fai ne tino fapaupau, e se 'ma ei latou, tino fapaupau kona kola ne nofo i te fenua tenei kae seki oko mai koutou, kae konei ka afuli keatea ne te Aliki ko te mea ke ulu atu koutou o nofo i te fenua.

25Ko amioga a latou ko faka'lailai ei ne latou a te fenua, tela la, ko fakasala ne te Aliki a te laukele kae fai ne ia ke teke atu ki tino e nofo i luga i ei.

26Tela la, e 'tau mo koutou o tausi ki aku fakatonuga mo tulafono, kae ke moa ma fai ne koutou ne amioga fakatakalialia, ke oko foki loa ki tino fakaalofa kola e ola fakatasi koutou.

27Me i tino kola ne ola muamua i te fenua tena, ne fai katoa ne latou a amioga fakatakalialia konei tela ko se 'ma ei te laukele;

28tena, ka se teke ei koutou ne te laukele e pela mo te tekega ne ia a tino fapaupau kola ne nofo i ei kae seki oko mai koutou.

29E iloa eiloa ne koutou me i so se tino e fai ne ia se amioga fakatakalialia penei ka se taku se tino o te fenua o te Atua.

30Tena ne faipati mai ei te Aliki penei, “Faka'logo ki fakatonuga konei e tuku atu ne au, kae sa tau'tali ki amioga a tino konei ne nofo i te fenua tenei kae seki oko mai koutou, kae sa fakalailai otou foitino o fai amioga se 'lei konei. Au ko te Aliki te otou Atua.”