FAKAASIGA 8 - Tuvalu Revised Bible

Ko te Fitu o Fakamailoga

1I te 'talaga ne te Tama Mamoe a te fitu o fakamailoga, filemu ei mea katoa i te lagi e tusa mo te afā itula.

2Matea atu ei ne au a agelu e tokofitu e 'tu i mua o te Atua; ne tuku atu ki a latou a pu e fitu.

3 Amo 9.1; Eso 30.1,3 Ne vau a te sua agelu tela e i a ia a te ipu aulo e fai ei taulaga 'sunu o tu i mua o te fata faitaulaga. Ne tuku atu ki a ia a taulaga 'sunu e uke o fakaopoopo ki talosaga a tino kelisiano katoa, kae ofo atu ne ia i luga o te fata faitaulaga tela e tu i mua o te nofogaaliki.

4Ko olo ake fakatasi a te manogi o te au o taulaga 'sunu mo talosaga a tino kelisiano, mai i lima o te agelu tela e tu i mua o te Atua.

5Levi 16.12; Esela 10.2; Eso 19.16; Faka 11.19; 16.18Ne puke atu a te agelu ki te ipu aulo, faka'fonu ne ia ki te afi mai i te fata faitaulaga, kae pei ifo ei ne ia ki lalo i te lalolagi. Ne lagona te pa'pa o fa'tili mo leo, mo te lapaga foki o uila mo te mafuie ne poko.

Ko Pu Fakatagitagi

6Mai tua ifo, fakatoka ei agelu e tokofitu o ili a pu e fitu.

7 Eso 9.23-25; Eseki 38.22 Ne ili ne te agelu muamua tena pu, to ifo ei i luga o te lalolagi te vaiua fatu mo te afi, ne pulutaki mo te toto. E tasi vaetolu o te lalolagi ne 'ka, e tasi vaetolu foki te aofaki o lakau ne 'ka, ne 'sunu foki a mouku katoa.

8Ne ili ne te tokolua o agelu a tena pu, to ifo ei i luga o te tai a te mea e foliga ki se matua mauga lasi e ka. Kae liu toto ei a te tasi vaetolu o te tai,

9'mate ei foki mo te tasi vaetolu o mea ola katoa i te tai, e tasi vaetolu foki a te aofaki o vaka ne fakamaseigina.

10 Isa 14.12 Ne ili ne te tokotolu o agelu a tena pu, to ifo ei mai i te lagi a te matuā fetu lasi eiloa e pela mo se lama ka, pakū ifo ei ki te tasi vaetolu o vaitafe mo vaipuna.

11Iele 9.15A te igoa o te fetu ko te 'Kona. E tasi vaetolu o te vai ne 'kona, kae tokouke foki a tino ne 'mate i te inuga ki te vai, i te mea ko to 'kona.

12 Isa 13.10; Eseki 32.7; Ioelu 2.10,31; 3.15 Ne ili ne te tokofa o agelu a tena pu, oko atu ei te malosi o tena leo ki te tasi vaetolu o te la, te tasi vaetolu o te masina, mo te tasi vaetolu o fetu; ko te mea ke galo te tasi vaetolu o olotou mainaga, e seai eiloa mo se mainaga ne matea i te tasi vaetolu o te ao, pela foki mo te tasi vaetolu o te po.

13Ne kilo atu oku mata, lavea ei ne au a te aeto e lele 'mao i luga e fai mai penei i te leo lasi: “Oi aue! Oi aue! Kalofa eiloa ki tino kola e 'nofo i te lalolagi, manafai ko 'tagi mai a leo o pu kola e 'tau o ili ne isi agelu e tokotolu!”