ISAIA 56 - Tuvalu Revised Bible

A Malo katoa ka Aofia i Tino o te Atua

1Muna a te Aliki ki tino o tena fenua, “Fai te meatonu kae lei, me ko pili nei o fakasao ne au koutou.

2Ka fakamanuia ne au a latou kola e tausi fakamaoni ki te Sapati kae se solisoli ne latou. Ka fakamanuia foki ne au a latou kola e se amio masei.”

3A te tino fakaatea tela ko kau atu ki tino o te Aliki, e se tau o faipati penei, “Ka se talia ne te Aliki ke tapuaki fakatasi au mo tino o tena fenua.”

A te tagata tela ko oti ne fakaeunuka, e se tau o mafaufau pela, ona ko se mafai o maua ne ana tamaliki, ko se kau ei a ia i tino o te Atua.

4Muna a te Aliki ki te tino pena, “Kafai e fakaava mai koe ki a au, o faka'malu ki te Sapati, kafai foki e fai ne koe a mea kola e fiafia au ki ei kae tausi fakamaoni ki taku feagaiga,

5kae ka masaua faeloa tou igoa i loto i toku Faletapu pela foki i tino o toku fenua. Ka sili atu te takutakua o tou igoa i lo te fakaaloalogina e maua ne koe manafai ne isi ne au tama tagata io me ne au tama fafine. E se mafai eiloa o puli koe.”

6Ne fai mai foki te Aliki ki tino fakaatea kola ko fai mo tino o tena fenua, kola e alofa ki a ia kae tavini ki a ia, kola e faka'malu ki te Sapati kae tausi fakamaoni ki tena feagaiga:

7Mata 21.13; Male 11.17; Luka 19.46 “Ka aumai ne au koutou ki Siona, toku mauga tapu, ka avatu ne au te fiafia ki a koutou i loto i toku fale talo, kae talia foki ne au a taulaga kola e ofo mai ne koutou i luga i taku fata-fai-taulaga. A toku Faletapu ka fai mo fale talo ki tino o malo katoa.”

8A te Aliki Sili, tela ne fakafoki mai ne ia a tino o tena fenua mai i te tafeaga, ko oti ne tauto me ka toe aumai foki ne ia a nisi tino fakaatea ke kau mai ki tino o tena fenua.

A Takitaki o Isalaelu ko Fakaseaoga

9A te Aliki ko oti ne fai ki malo fakaatea ke o'mai pela me ne manu fe'kai o folo a tino o tena fenua.

10Muna a ia, “A takitaki, kola ne tau o akoako ne latou toku fenua, ko kivi olotou mata! Seai se mea e iloa ne latou. E pela latou me ne kuli leoleo kola e se mafai o tagi — e takatokato fua kae fai olotou moemiti. Ko latou eiloa ko fiafia ki te moe!

11E pela eiloa latou me ne kuli mata meakai kola e se mafai o makona. A takitaki konei e seai se malamalama o latou. E fakatau saga eiloa o fai a mea e fiafia latou ki ei, kae fakatau salasala foki eiloa a te tino ki te mea e lei ei a ia.

12E ko'na kae fai olotou muna penei, ‘Tatou ka olo o sala mai ne uaina o inu ki te mea e mafai ne tatou! Ka gali atu a te aso taeao i lo te aso nei!’ ”