ESEKIELU 14 - Tuvalu Revised Bible

Ko Fakaseaoga ne te Atua te Tapuaki Ki Tupua

1E isi ne takitaki o Isalaelu ne o'mai o fesili mai ki a au e uiga ki te loto o te Aliki.

2Tena, kae faipati mai te Aliki ki a au,

3ana muna, “Te tagata ola, a tagata konei ko tuku katoatoa atu eiloa olotou loto ki tupua, kae ko tuku atu eiloa latou ke taki ne tupua kona ki te agasala. I te lotou fakatau e avatu ne au se tali ki a latou?

4“Faipati atu nei ki a latou, kae fai atu ki ei aku muna ki a latou, ko au ko te Aliki Sili: So se tino Isalaelu tela ko oti ne tuku katoatoa atu tena loto ki tupua, kae tuku atu eiloa a ia ke taki ne tupua ki te agasala, kae ko vau o fesili ki se pelofeta, e maua eiloa te tali o tena fesili mai i a au — ko te tali tela e tau ki ana tupua e uke!

5A tupua katoa kona ko fai ne latou a tino Isalaelu ke fulitua mai ki a au, ka ko toku fakamoemoe, a taku tali ka tuku atu ki a latou ka fai ne ia latou ke toe foki mai katoa ki a au.

6“Tela la, fai atu ki te kau Isalaelu aku muna konei: Fuli mai, kae tiaki otou tupua masei.

7“Kafai so se tino Isalaelu io me se tino fakaatea e nofo tasi mo tino Isalaelu e fulitua mai ki a au o tapuaki atu ki tupua, kae e fano o fesili ki se pelofeta, ko au, te Aliki, ka tuku atu ne au te tali ki a ia!

8Ka se talia ne au a ia. Ka fai ne au a ia mo akoakoga. Ka ave keatea ne au a ia mai i te fakapotopotoga a oku tino, ko te mea ke iloa ne koutou i a au ko te Aliki.

9“Kafai se pelofeta ko tuku atu ne ia se tali se tonu, ko tena uiga, ko au, te Aliki, ne fakaloiloi ne au ko te mea ke fai ne ia se tali se tonu. Ka ave keatea ne au a ia mai i te fenua o Isalaelu.

10A te pelofeta mo te tagata ne fesili ki a ia ka fakasala katoa i te fakasalaga e tasi.

11Ka fai ne au a te mea tena ke mo a e tiakina au ne te kau Isalaelu, ke mo a foki e fakalailai olotou foitino i olotou agasala. Ka fai latou mo oku tino, ka ko au ka fai mo Atua o latou.” Ko te Aliki Sili tena ne faipati atu.

Ko Noa, Taneli mo Iopu

12A te Aliki ne faipati mai ki a au,

13ana muna, “Te tagata ola, kafai se fenua ko agasala mai ki a au, kae se fakamaoni mai ki a au, ka fola atu toku lima ki ei o fakamasei a te koga e maua mai i ei ana meakai. Ka aumai ne au se oge o tamate a tino fakatasi mo manu.

14E ui eiloa e nofo te tokotolu tagata, ko Noa, Taneli mo Iopu i kona, a te lotou lei e sao fua eiloa latou i ei.” Ko te Aliki Sili tena ne faipati atu.

15“Io me e mafai o aumai ne au a manu o te vao ke tamate ne latou a tino, kae fai te fenua ke fakamataku, ke seai se tino e mafai o faimalaga i loto i ei;

16kae kafai foki eiloa e nofo a te tokotolu tagata kona i kona — au e fai tonu atu eiloa — ka se mafai foki eiloa ne te lotou fakamaoni o fakasao olotou tamaliki tonu eiloa. Ko olotou ola fua e sao, ka ko te fenua ka pela me se vao.

17“Io, me e mafai o aumai ne au a te taua ki te fenua, kae aumai a meatau fakamataku ke tamate ei a tino fakatasi mo manu,

18kae kafai foki eiloa e nofo a te tokotolu tagata kona i kona, au e fai tonu atu eiloa, a te lotou lei ka se mafai foki eiloa o sao i ei olotou tamaliki tonu eiloa, ko latou aka eiloa e sao.

19“Kafai e aumai ne au se famai ki te fenua tenei, i toku kaitaua, kae tamate a tino e tokouke, pela foki a manu,

20Kafai foki eiloa e nofo a Noa, Taneli mo Iopu i kona, au e fai tonu atu eiloa, e se mafai foki eiloa o fakasao ne latou olotou tamaliki tonu eiloa. A te fakamaoni o latou e fakasao fua i ei latou.”

21 Faka 6.8 Konei a muna a te Aliki Sili: “Ka aumai ne au aku fakasalaga fakamataku kona e fa ki luga i Ielusalema — ko te taua, te oge, manu fekai, mo te famai — ke ta fakapalele ei a tino fakatasi mo manu.

22Kafai se tino ne sao fakatasi mo ana tamaliki, kilo fakalei ki ei manafai e olo atu ki a koutou. Onoono ki te masei o olotou amioga, kae ka talitonu koutou i te fakasalaga ne aumai ne au ki Ielusalema e tau eiloa;

23tena la, ka iloa ei ne koutou me e isi faeloa se pogai lei i mea katoa e fai ne au.” Ko te Aliki Sili tena ne faipati atu.