ESEKIELU 2 - Tuvalu Revised Bible

1E fai mai penei, “Te tagata ola, tu ki luga. Au e fia faipati atu ki a koe.”

2I te taimi ne faipati mai ei te leo tena, kae ne ulu mai te agaga o te Atua ki loto i a au, fakatu aka ne ia au ki luga, kae lagona atu ne au te leo e faipati mai eiloa penei,

3“Te tagata ola, ko uga atu nei ne au a koe ke fano ki tino Isalaelu. A latou ne teke kae fulitua mai ki a au, kae koi tumau eiloa te lotou teke mai ki a au, e pela eiloa mo olotou tupuga.

4A latou ne tino lotomakeke kae se ava mai ki a au. Tela la, ko uga atu nei ne au a koe ke fano o folafola atu aku muna konei e fai atu ki a latou.

5Faitalia me e fakalogo atu ki a koe io me ikai, kae ke iloa ne latou me e isi se pelofeta ko oti ne oko atu ki a latou.

6“Ka ko koe, te tagata ola, e se tau o mataku ki a latou, io me ko olotou muna e fai. Ka fulitua latou ki a koe, kae takalialia i a koe; e pela eiloa me se tino e nofo tasi mo akalava. Kae ke tumau eiloa tou se mataku ki tino teke kona io me ko olotou muna e fai.

7Ka faipati ne koe ki a latou a mea katoa kola e fai atu ne au ke faipati ne koe, faitalia eiloa me e fakalogo me ikai. Ke masaua ne koe i a latou ne tino loto teke.

8“Te tagata ola, fakalogo mai ki aku muna konei e fai atu. Sa loto teke pela mo latou. Fakamaga tou gutu o kai a mea konei ka avatu ne au.”

9Faka 5.1 E lavea ne au te lima i oku mua, e puke mai ne ia a te peluga pepa.

10Ne fola aka ne te lima tena a te peluga pepa, lavea ei ne au me e isi ne tusitusiga i feitu katoa e lua — ko muna o te tagi fanoanoa e tusi i kona, mo muna o te tagi malosi mo te tagi fita.