SALAMO 39 - Tuvalu Revised Bible

Te Fakatoesega a te Tino Puapuagatia

1Au ne fai ake penei, “Au ka fakaeteete i aku mea e fai,

Kae ka se fai foki toku laulaufaiva mo mea e agasala ei au;

Ka se faipati foki au ki se mea manafai e pili mai a tino amio ma'sei.”

2Au ne filemu, seki ai loa saku pati ne fai,

E se faipati foki eiloa au e uiga ki se mea 'lei!

Ka ko oku puapuaga ne gasolo eiloa o ma'sei,

3A toku loto foki ne fonu i te manavase.

Ko te taimi e mafaufau malosi ei au,

Ko te taimi foki tena e gasolo ei au o maua ne fakalavelave;

Ne seki mafai ne au o taofi toku fia fesili penei:

4“Te Aliki, e fia tausaga e ola ei au?

Afea e mate ei au?

Fakailoa mai me oti mafea toku ola.”

5Ko oko eiloa i te toetoe o toku ola ne fai ne koe!

A te leva o toku olaga e pela fua me se mea e seai i tau kilokiloga.

E tonu eiloa i tino ola katoa e pela fua me ne laumatagi,

6E pela fua me ne ata.

A mea katoa e fai ne ia e seai se aoga;

E fakaputu ne ia a koloa, kae se iloa ne ia me ko oi te tino ka puke ma ia.

7Tela la, te Aliki, se a te mea e fakamoemoe au ki ei?

Au e fakamoemoe eiloa ki a koe.

8Fakaola mai au mai aku agasala katoa,

Kae ke mo a e 'kata mai a tino va'lea ki a au.

9Au ka filemu, ka seai eiloa saku muna e fai,

Me ko koe ne fai ne koe au ke puapuaga penei.

10Sa toe fakasalagina au! Ko tai mate ake eiloa au i au kiniga.

11E fakasala ne koe te tino i ana agasala, i tou kaitaua,

Kae e fakamasei ne koe a mea kola e fiafia a ia ki ei,

E pela me se mogamoga.

E tonu eiloa i te tagata e pela fua me se lau matagi!

12Te Aliki, fakalogo mai ki taku 'talo,

Kae fakalogo mai foki ki taku fakatagi;

Vau o fesoasoani mai ki a au i taimi e tagi ei au.

E pela eiloa mo oku tupuna katoa,

Au se tino fua ne 'kami ne koe mo se taimi toetoe.

13Tuku mai au ke fiafia malie ake, ka koi tuai au o fano keatea ko galo atu ei au.