2 NOFOAIGA TUPU 11 - Tuvalu Revised Bible

Ko Muna Fakapelofeta a Semaia(1Tupu 12.21-24)

1I te okoatuga o te Tupu ko Leopoamo ki Ielusalema, ne fakamaopoopo ne ia e tusa mo te selau valusefulu afe sotia 'lei eiloa mai i matakaiga o Iuta mo Peniamina. A tena fakamoemoega ke fano a ia o taua ki te malo o Isalaelu ki matu, ke tumau eiloa tena pule i a latou.

2Ka ko te Aliki ne fai ki te pelofeta ko Semaia

3ke fakaoko atu ki a Leopoamo mo tino katoa o matakaiga o Iuta mo Peniamina a te fekau tenei:

4“Sa olo o taua atu ki otou taina Isalaelu. Foki ki otou fale, koutou katoa. A te mea tena ne tupu, ko te mea ne manako au ki ei.” Ne faka'logo katoa latou ki te fakatonuga a te Aliki, tena ne seki olo ei o taua ki a Ielopoamo

Ko Faite ne Leopoamo a Pui o Fa'kai

5A Leopoamo ne nofo eiloa i Ielusalema, kae ne faite ne ia a pui o fa'kai o Iuta mo Peniamina konei:

6ko Peteleema, Etama, Tekoa,

7Petesula, Soko, Atulama,

8Kata, Malesa, Sifo,

9Atolaima, Lakisa, Aseka,

10Sola, Aitialona, mo Hepelona.

11Ne pui eiloa ne ia a fa'kai kona ke malosi kae fili aka ne ia ne takitaki o kautau ke fai mo takitaki i fa'kai takitasi. Ne tuku ne ia i fa'kai takitasi kona a meakai, sinu olive mo uaina,

12mo talita mo tao. I te faiga tena, e fakamautakitaki ei ne ia a Iuta mo Peniamina i lalo o tena pulega.

Faitaulaga mo Sa Levi ko O'mai ki Iuta

13Ne o'mai a faitaulaga mo te kau sa Levi mai i kogā fenua katoa o Isalaelu ki Iuta i saute.

14Ne tiakina ne te kau sa Levi a olotou laukele moukua, mo nisi manafa o latou, kae o'mai ki Iuta mo Ielusalema, me ko se talia latou ne te Tupu o Isalaelu ko Ielopoamo mo ana sui, ke fai mo faitaulaga a te Aliki.

151Tupu 12.31 Ne fili ne Ielopoamo ana faitaulaga ke tavini atu i koga tapuaki fapaupau, kae ke tapuaki atu foki ki temoni mo tupua e foliga ki pulumakau tagata.

16Mai i matakaiga katoa o Isalaelu, a tino kola e manako tonu eiloa o tapuaki ki te Aliki, te Atua o Isalaelu, ne tautali atu i te kau sa Levi ki Ielusalema, ko te mea ke mafai ne latou o ofo olotou taulaga ki te Aliki, te Atua o olotou tupuga.

17I te faiga tena, ne gasolo ei o malosi a te malo o Iuta. E tolu tausaga ne lago malosi ei ne latou a Leopoamo, te tama tagata a Solomona, kae ola e pela eiloa mo te lotou olaga i aso o te nofoaiga a te Tupu ko Tavita, pela foki i te nofoaiga a te Tupu ko Solomona.

Ko te Kaiga o Leopoamo

18A Leopoamo ne avaga ki a Malata, te tama fafine a Ielimota, te tama tagata a Tavita. A te matua o Malata ko Apihaila, te tama fafine a Eliapo kae ko te mokopuna o Iese

19E tokotolu tama tagata a Leopoamo mo Malata, ko Ieusa, Semalia, mo Sahama.

20Fakamuli ifo, ne toe avaga a Leopoamo ki a Maaka, te tama fafine a Apisaloma. E tokofa la tama tagata: ko Avia, Atai, Sisa, mo Selomita.

21A avaga a Leopoamo e tusa mo te tinogafulu mo te tokovalu, kae e tinoono ana avaga fakasalasala. E tinolua mo te tokovalu ana tama tagata, kae e tinoono ana tama fafine. Mai i ana avaga katoa, ko Maaka eiloa e fagasele i tena loto.

22A tena tama tagata e fiafia malosi a ia ki ei ko Avia, kae ne fili foki eiloa ne ia ke sui tulaga i a ia, o fai mo tupu.

23Ne tofitofi faka'lei eiloa ne Leopoamo a tama tagata a ia ki tofi e tau o fai ne latou, kae tufa ne ia ke nofo i fa'kai o Iuta mo Peniamina kola ko oti ne pui ke malosi. Ne avatu ne ia mea e uke ma latou, kae fili foki ne ia ne avaga e uke ma latou.