LEVITIKO 11 - Tuvalu Revised Bible

Ko Manu kola e tau o kai(Teu 14.3-21)

1Ne tuku atu ne te Aliki ki a Mose mo Alona a fakatonuga konei

2mo tino Isalaelu. E mafai ne koutou o kai so se manu i te laukele

3tela e mavae ona alofivae kae kai fakalua tena mama,

4-6kae ke mo a koutou e kai ki te kamela, te patia io me ko te lapiti. A manu kona e se 'ma me e kai fakalua olotou mama, kae e se ma'vae olotou alofivae.

7Sa kai ki puaka me e se 'ma. E ma'vae olotou alofivae, kae e se kai fakalua olotou mama.

8Sa kai ki manu konei io me fakapatele ki olotou foitino manafai e mate me e se 'ma.

9E mafai ne koutou o kai ki so se ika o te tai tela e isi ne ana tala mo unafi,

10kae sa kai ki so se mea ola i te tai tela e seai ne ana tala mo ne unafi.

11A ika pena e se 'ma. E se tau o kai koutou ki ei, io me fakapatele ki olotou foitino manafai e mate.

12E tapu koutou e kai ki so se mea e ola i te vai kae seai ne ana tala mo unafi.

13-19Ke mo a koutou e kai ki manu eva konei: te aeto, te lulu, te oka, te falakone, te pusate, te valatua, te kolou, te osetelite, te sikala, te matuku, te pelikane, te komolane, te hupose mo te pea.

20A manu foniki katoa e taki ono vae, kae e isi ne kapakau o latou e se 'ma,

21na ko manu foniki fua kola e tafukefuke.

22E mafai ne koutou o kai a te se akelise, te kilikiti, mo te sikusikulauniu.

23Ka ko manu foniki katoa kola e isi ne kapakau kae tolo i lalo, ne manu lailai katoa.

24-28So se tino e patele ki foitino 'mate o manu konei ka lailai a ia ke oko eiloa ki te afiafi: ko manu fai alofivae, kae se ko manu kola e mavae olotou alofivae kae kai fakalua ki olotou mama, mo manu vae faa kola e isi ne mania. Sose tino ne puke ki foitino 'mate o manu kona, e tau o 'ta faka'lei ona gatu, kae ka lailai eiloa ke oko ki te afiafi.

29-30A mole, kimoa, kiole mo pili ne manu lailai.

31So se tino e patele ki olotou foitino, me mate me ikai, ka lailai eiloa ke oko eiloa ki te afiafi.

32Kafai e tō se manu pena ki luga i sose mea, me se lakau, me se laugatu me se mea faite ki pakili manu, me se lautaga, ka lailai eiloa a te mea tena. E tau la ke ufi te mea tena ki te vai, kae e tumau eiloa tena lai'lai ke oko ki te afiafi.

33Kae kafai ne to se manu o manu kona ki loto i se tiā fatu, a mea katoa i loto i te tiā tena ka lai'lai, kae ko te tiā tena e tau o 'foa.

34Kafai e isi ne vai i loto i se tiā pena ne maligi ki luga i meakai, ko meakai kona ka lailai, e pena foki mo te vai tena i loto i te tiā ka lailai.

35So se mea e to ki ei se manu mate ka lailai, kafai se ogaumu fatu ne to ki ei te manu, e tau o ofa.

36Kafai ne to ki loto i se vaipuna io me ko te vaisameni, e 'ma faeloa a vai kona. Kae kafai e patele atu ki se isi mea ake, e lailai eiloa te mea tena e patele ki ei.

37Kafai ne to se manu pena ki luga i fuaga saito kola ka ave o toki, a te fuaga tena e 'ma faeloa.

38Kae kafai ne siu i te vai a te fuaga tena kae patele ki ei se manu mate pena, ka lailai te fuaga tena.

39Kafai ko mate se manu lei i te kai, kae patele atu ki ei so se tino, a te tino tena e lailai ke oko eiloa ki te afiafi.

40Kae kafai se tino ne kai ki se vaega o te manu tena, e tau mo ia o 'ta faka'lei ona gatu, kae ko ia e lailai eiloa ke oko ki te afiafi.

41E se tau o kai ne koutou a manu foniki kola e olo sale i luga i te laukele,

42me ne manu tolo, io me ne manu e sasale ki vae e fa, io me ne manu e uke olotou vae.

43Sa kai ki manu kona i a koutou ma lailai.

44Levi 19.2; 1Pete 1.16Au ko te Aliki te otou Atua, tela la, e tau mo koutou o fakatapu otou foitino, me i a au e 'malu.

45Ko au ko te Aliki, ne aumai ne au koutou keatea mai Aikupito, ko te mea ke fai au mo otou Atua. E 'tau mo koutou o fai koutou ke 'malu.

46Tena te tulafono e uiga ki manu vae fa mo manu eva, mea ola e nofo i te vai, mo mea katoa e olo sale i luga i te laukele.

47E 'tau mo koutou o fakaeteete ke lavea ne koutou a manu 'ma i feitu faka tapuakiga mo manu se 'ma, pela foki a manu e tau o kai mo manu e se 'tau o kai.