IOPU 32 - Tuvalu Revised Bible

Ko te Faipatiga a Eliu(32.1—37.24)

1Ona ko Iopu e talitonu eiloa me e seai eiloa se mea 'se ne fai ne ia, tena la, ko fiu foki ei te tokotolu kola e talitali sale ki ei, ko se toe talitali ki ei.

2Kae e isi se tagata e igoa ki a Eliu e tu i olotou tafa, ko se maua ne ia o taofi tena kaitaua, me i a Iopu e taumafai eiloa o fakasao a ia kae lou ne ia me ko te Atua e pogai ei tena malaia. A Eliu ko te tama tagata a Palakelu, se tino i te gafa o Pusi, i te kaukaiga o Lama.

3Ne ita foki a ia ki taugasoa o Iopu kola e tokotolu. Ko se mafai ne latou o tali a fakamatalaga a Iopu, tela la, ko pela me ko lavea atu me ko te Atua e pogai ei a te malaia o Iopu.

4Ona ko Eliu ko te tino foliki eiloa i kona, tena te mea ne faka'tali eiloa a ia ke oti katoa ne faipati a tino i kona.

5I te laveaga ne ia me ko se mafai ne te tokotolu kona o tali a fakamatalaga a Iopu, ko oko eiloa i tena kaitaua

6tena ne kamata ei a ia o faipati.

Eliu

Au e foliki ka ko koutou e ma'tua, tena te mea ne tai mataku ei au ma fakaasi atu oku mafaufauga.

7Ne faipati ifo au ki a au eiloa, me ko koutou e 'tau o faipati,

Ko koutou tino ma'tua e 'tau o fakaasi otou taofi.

8Ko te agaga o te Atua Malosi tela e aumai ne ia te poto ki tagata.

9E se ko te gasolo o matua e fai ne ia te tino ke poto io me fai ne ia te tino ke iloa ne ia te mea tonu.

10Tela la, au e manako ke fakalogologo mai koutou ki oku manatu konei ka faipati atu ne au.

11Au ne fakalogologo eiloa mo te kufaki i te taimi ne fai'pati ei koutou,

Ne fakatalitali atu eiloa au i te taimi ne salasala ei koutou ki fakamunaga 'poto.

12Ne saga tonu eiloa au o fakalogologo, kae ne lagona eiloa ne au me ko se mafai ne koutou o faka'se te faipatiga a Iopu.

13E fai mai pefea koutou me ko oti ne maua ne koutou a te poto?

Ko tau nei o tali ne te Atua a te faipatiga a Iopu, me e se mafai ne koutou.

14A Iopu ne faipati ki a koutou, seki faipati mai ki a au, moi ne faipati mai ki a au,

E se mafai eiloa ne au o avatu ki ei se tali pela mo otou tali.

15Iopu, ko seai ne lotou pati e mafai o fai atu;

Ko se mafai ne latou o tali tau faipatiga.

16E a, ka fakatali eiloa au, i a latou ko se faipati?

Ko tu fua i kona kae ko seai eiloa ne olotou pati e tau o fai.

17Ka avatu eiloa ne au a taku tali i te taimi nei,

Kae fakaasi atu foki ne au toku manatu.

18Au ko manako eiloa o na faipati, ko se maua ne au o fakatali.

Ko se mafai ne au o taofi aku pati.

19Kafai e seai se avanoaga ke faipati au,

Ko au ka mafa pela me se taga uaina e fonu i uaina fou.

20Ko se mafai eiloa ne au o fa'ki toku fia faipati;

Ko tau eiloa au o faipati.

21Au e se kaukau i se tino i te fakakinauga tenei;

E seai ne aku muna fakakolekole e fai ki se tino.

22E seiloa ne au o fakakolekole se tino, ka fakasala fua au ne te Atua manafai e fakakolekole ne au se tino.