FAATAOTO 13 - Tuvalu Revised Bible

1A te tamaliki poto e fakalogo ki tena tamana manafai e fakatonu mai ne ia tena mea se ne fai, ka ko te tino fakamatamata e se mafai o talia ne ia i a ia e se.

2A tino amio lei e maua te lotou taui lei i muna a latou e fai, ka ko tino faitogafiti e manako faeloa ki te fakasaua.

3Fakaeteete i au muna e fai kae puipui fakalei tou ola. A te tino e faipati se mafaufau e fakamasei ne ia a ia eiloa.

4Me e pefea eiloa te lasi o te manako o se tino paie ki se mea, e se mafai eiloa o maua ne ia. A te tino galue malosi e maua ne ia a mea katoa e manako a ia ki ei.

5A tino faimeatonu e se fiafia ki te loi, ka ko muna e fai ne tino amio masei ne muna se aoga.

6A te amiotonu e puipui ne ia te tino amiotonu; a te amio masei e fakamasei ne ia a tino agasala.

7E isi ne tino e fia maumea, kae tela la e seai eiloa ne olotou mea. A nisi tino e fai pela i a latou e mativa kae tela la, e lasi te lotou maumea.

8A te tagata maumea e fakaaoga ana tupe o fakasao ei tena ola, kae e seai eiloa ne tino e olo o fakalavelave a tino mativa.

9A tino amiotonu e pela me ne moli e maina malosi; ka ko tino amio masei e pela me ne moli kola ka fai o mate.

10A te fakamatamata e mafua mai ei a fakalavelave. Se mea lei ke salasala koe ki manatu fakatonutonu.

11Ko te vave maua ne koe o tou maumea, ko te vave foki o galo atu. Ko te faigata o galuega e fai ne koe ke maua ne au mea, kae ka gasolosolo ake eiloa o uke au mea.

12Kafai ko se taunu te fakamoemoega, ko tena uiga, ko te loto foki ko fanoanoa, kae kafai e taunu se mea e manako koe ki ei, ko oko eiloa i tou fiafia.

13Kafai e se talia ne koe a manatu fakatonutonu lei, ko tena uiga koe ko salasala ki se fakalavelave; kafai e talia ne koe kae ka saogalemu koe.

14A akoakoga a tagata poto e pela me se punā vai o te ola; ka mafai o fesoasoani ki a koe i taimi o puapuaga.

15A te poto e fai ne ia te tino ke fakaaloalogina, ka ko tino kola e se fakatuagagina e tu nei i te auala ki te masei.

16A tino poto e muamua o fakaaoga olotou mafaufau kae koi tuai o puke olotou lima o fai se mea, ka ko tino valea e olo fua o fakaasi te lotou valea.

17A avefekau kola e se fakatuagagina e fakatupu fakalavelave, ka ko avefekau kola e fakatalitonugina ne tino, e aumai ne latou te fekau o te filemu.

18A te tino tela e se fia tauloto ka mativa kae masiasi. A te tino tela e talia ne ia ana mea se ne fai e fakaaloalogina ne tino.

19Se mea lei manafai e maua ne koe te mea e manako koe ki ei! A tino valea e se fia fulitua atu ki te masei.

20Kauga ki tino poto kae ka poto foki koe. Kafai e kauga koe ki tino valea kae ka se aoga koe.

21A tino agasala e tautaligina faeloa ne fakalavelave, ka ko tino amiotonu e maua ne latou te taui lei.

22A te koloa a te tagata amio lei e maua eiloa ne ana mokopuna manafai ko mate atu a ia, ka ko koloa a tino agasala e maua ne tino amiotonu.

23A fatoaga kola e se fakaaoga e mafai o fakaaoga ke maua ei ne meakai ma tino mativa, kae ko tino fai mea pikopiko e taofi ne latou fatoaga kona ke se fakaaoga.

24Kafai se fakasala ne koe tau tamaliki ko tena uiga a koe se alofa ki ei. Kafai e alofa koe ki a ia, e tau o fakatonu ne koe.

25A tino amiotonu e lava faeloa a mea e kai ei latou, ka ko tino amio masei e fia'kai faeloa.