FAATAOTO 31 - Tuvalu Revised Bible

Ko Manatu Fakatonutonu mō te Tupu

1Konei a muna malu kola ne fai ne te matua o te Tupu ko Lemuelu ki a ia:

2“A koe ko taku tama tagata totino eiloa, ko te tali ki aku talosaga. Se a te mea ka taku atu ne au ki a koe?

3Sa fakamaumau tou malosi mo au tupe ki fafine; e tokouke a tupu ko oti ne fakaseaoga ne fafine pena.

4Lemuelu, fakalogo mai. A tupu e se tau o inu i uaina io me fina ki kava.

5Kafai ko inu kava latou, ko puli i a latou a tulafono, kae ko se saga foki o fesoasoani ki tino mativa.

6A te kava e tau ki tino kola ka fai o mate, kola e mafatia olotou loto.

7Tuku atu ei latou ke inu, ke puli te lotou mativa mo te lotou se fiafia.

8“E tau mō koe o faipati mo tino kola e se mafai o fakaasi mai ne latou a mea e se malie ei latou. Puipui foki ne koe te saolotoga o tino fakaalofa.

9Ke fai koe mo sui o latou o faipati mō te lei o latou, kae ke fai foki koe mo famasino amiotonu. Puipui fakalei te saolotoga o tino mativa.”

Ko te Avaga Atamai

10Ko oko eiloa i te faigata o maua se avaga tela e fakatuagagina! E sili atu tena taua i teuga taua!

11A tena avaga e talitonu katoatoa ki a ia, tela la, e se mafai te tagata o mativa.

12I aso katoa e ola ei a ia, e fai faeloa ne ia a faiga lei ki tena avaga, seai eiloa ne faiga masei e fai ne ia.

13E nofo faeloa o fai ana galuega, o fai a vulu mo laugatu lino.

14E aumai ne ia meakai ki tena kaiga mai i koga mao, e pela mo vakamutu a te kau fai mea togi kola e aumai ne latou a meakai mai i fenua mao.

15E ala malu i te taeao o fakatoka meakai mō tena kaiga kae fakatonu foki ki ana tavini fafine a olotou galuega e tau o fai.

16Ka lavea ne ia ne laukele lei, kae togi ne ia, e fakaaoga foki ne ia ana tupe mō toki tena togavine.

17A ia se fafine galue malosi, e mafi kae e uke mea e maua mai i ana galuega.

18E iloa ne ia te taua o ana mea takitasi katoa kola ne faite, kae e galue sale foki eiloa ke tai leva te po.

19E faite eiloa ne ia ana filo kae laga foki eiloa ne ia ona gatu.

20E kaimalie a ia ki tino mativa mo tino fakaalofa.

21E se manavase lele eiloa a ia manafai ko to te kiona, me e toka a gatu moko mō tena kaiga katoa.

22E faite ne ia a sulukafu o moega, kae pei ki gatu lino gali kola e lanu kulakula.

23A tena avaga se tagata ko lauiloa, se tagata maluga foki eiloa i tena fa'kai.

24E faite ne ia a gatu mo fusi, kae togi atu ne ia ki tino fai mea togi.

25A ia se fafine malosi kae fakaaloalogina, kae e se manavase mo te aso taeao.

26Kafai e faipati, e lavea atu me se fafine e atamai i ana pati e fai.

27E uke ana galuega e fai sale, kae e onoono faeloa foki ki te tausiga o tena kaiga i mea e manako ki ei.

28Ana tamaliki e fiafia ki a ia, kae e tavae faeloa foki a ia ne tena avaga.

29Konei a muna a tena avaga, “E tokouke fafine avaga kola e lei, kae e sili atu eiloa koe i a latou katoa.”

30A te gali e faka'se tino, pela foki te matagali e mafai fua o matafi, ka ko te fafine tela e fakaava ki te Aliki e tau o tavaegina.

31E tau o tavae ne tatou te fafine tena ona ko ana mea katoa ne fai. E tau eiloa o fakaaloalogina a ia ne tino katoa.