IELEMIA 30 - Tuvalu Revised Bible

Ko Tautoga a te Aliki ki Tena Fenua

1A te Aliki, te Atua o Isalaelu,

2ne fai mai ki a au penei, “Tusi ki lalo i se tusi, a mea katoa kola ne fai atu ne au ki a koe,

3me ko pili mai te taimi e toe fakafou aka ei ne au a tino o toku fenua, tino Isalaelu mo Iuta. Ka toe fakafoki mai ne au latou ki te fenua tela ne tuku ne au mo olotou tupuga, kae ka toe puke foki eiloa ne latou. Ko au, te Aliki, tena ne faipati atu.”

4Muna a te Aliki ki tino Isalaelu mo Iuta,

5“E lagona ne au te 'tagi o te ma'taku,

te 'tagi o te ma'taku kae se o te filemu.

6Tu o mafaufau!

E mafai ne se tagata o fanau ne ia se tamaliki?

Ai a la e lavea atu ei ne au a tagata katoa e

puke olotou lima ki olotou tinae,

e pela me se fafine ka fai o fanau?

Ai a e lau'tea ei a tino katoa?

7A te aso fakamataku ko pili o oko mai;

e seai se aso e mafai o fakapau mo te aso tenei—

se taimi o puapuaga mo toku fenua,

kae ka sao eiloa latou.”

8Muna a te Aliki Malosi, “Kafai e oko mai a te aso tena, ka fati ne au a te amo i olotou ua, kae tala filifili kola e sai ei latou, kae ka se toe fai latou mo pologa a tino fakaatea.

9Ka tavini mai latou ki a au, te Aliki te lotou Atua, kae ka fakasopo ne au se tino i te gafa o Tavita ke fai mo tupu.

10 Iele 46.27,28 “Toku fenua, sa ma'taku;

tino Isalaelu, sa mataku.

Ka faka'sao ne au koutou mai i te malo mao tena,

mai i te malo tena ne nofo fakapagota koutou i ei.

Ka foki mai koutou ki te otou fenua o ola i te filemu;

Ka saogalemu koutou, kae se toe ai se tino

e fai ne ia koutou ke mataku.

11Ka vau au ki a koutou o fakasao koutou.

Ka 'ta fakamasei ne au a malo katoa kola ne fakasalalau ne au ki ei koutou,

ka ko koutou e se 'ta fakamasei.

E se tiakina atu ne au koutou ke olo kae se fakasala;

kafai e fakasala ne au koutou, e fakasala eiloa i te mea tau.

Ko au, te Aliki, tena ne faipati atu.”

12Muna a te Aliki ki tino o tena fenua,

“A otou pakiaga e se mafai o lei,

a otou pakiaga e se mafai o mafu.

13E seai se tino ke tausi fakalei ne ia a koe,

seai se tino ke fai ne ia ou pakiaga ke lei.

Seai se fakamoemoega i a koe e toe lei.

14A au fiafaiga ko puli i a latou a koe;

ko se saga mai lele eiloa ki a koe.

Ne ta ne au a koe pela me se fili;

a te fakasalaga o koe ko oko eiloa i te malosi

ona ko au agasala ko to uke

mo au amioga masei ko oko eiloa i te uke.

15Sa toe fakatagi mai e uiga ki ou pakiaga;

a koe e se toe lei.

E fakasala ne au a koe penei

ona ko au agasala e uke

mo au amioga masei ko to uke.

16Kae nei, a tino katoa kola ne o'mai o folo koe,

ka folo ne te fili,

ka ko otou fili katoa ka ave fakapagota.

A tino kola ne fakasaua ne latou koutou,

ka fakasauagina,

a latou kola ne olo atu o fao otou mea,

ka 'fao malo foki olotou mea.

17Ka toe fai ne au koutou ke lei;

Ka fakalei ne au otou pakiaga,

faitalia eiloa te faipati sāle o otou fili penei,

‘A Siona se tama tiaki;

e seai se tino e saga ki ei.’

Ko au, te Aliki, tena ne faipati atu.”

18Muna a te Aliki,

“Ka toe fakafoki ne au oku tino ki te lotou fenua

kae ka toe alofa au ki kaiga takitasi katoa;

Ielusalema ka toe faite,

mo tena palesi ka toe fakafou.

19A tino i kona ka usu pese o vikiga;

ka pakalaga latou i te fiafia.

Ka gasolo eiloa latou o tokouke e alatu i taku fakamanuiaga;

ka maua foki ne latou se tulaga fakaaloalogina

e alatu i taku fakamanuiaga.

20Ka toe fakafoki mai ne au te malosi taumua o toku fenua

kae toe fakamautakitaki fakalei ne au;

Ka fakasala ne au a tino katoa kola ne fakasaua ki a latou.

21-22A te takitaki o latou se tino foki eiloa mai i te lotou malo,

a pelenise o latou, ne tino foki eiloa o latou.

Ka vau a ia manafai e fekau atu au ki a ia,

me ko oi te tino e sona vau kae seki fekau atu au ke vau?

Ka fai latou mo oku tino,

ka ko au ka fai mo Atua o latou.

Ko au, te Aliki, tena ne faipati atu.”

23-24A te kaitaua o te Aliki se afā, se matagi malosi tela ka agi i ulu o tino amio masei. E se mafai o gata ke oko eiloa ki te taimi e oti ei a mea ne mafaufau a ia o fai. I aso konei mai mua, kae ka malamalama fakalei a tino o tena fenua i mea konei.