IOPU 39 - Tuvalu Revised Bible

1E iloa ne koe te taimi e fanau i ei a kouti o mauga?

Kai onoono eiloa koe ke fanau se tia vao?

2E iloa ne koe te leva o te taimi e tauave ei ne latou olotou tama? E iloa ne koe te taimi e fanau ei?

3E iloa ne koe te taimi ka ta'kato ifo ei o faka'to mai olotou tama ki te lalolagi?

4I te vao, a olotou tama e gasolo ake o malosi;

E olo atu latou keatea, se toe foki mai.

5Ko oi ne avatu ne ia te saolotoga o asini vao?

Ko oi ne ana fakasaolotogina kae tuku ke taka sale fua?

6Ne avatu ne au te vao ke fai mo koga e nofo ei latou,

Kae tuku atu latou ke nofo i kogā koga laugatasi.

7E faka'mao latou keatea mai i fa'kai logoā,

Kae seai se tino e mafai ne ia o faka'lata a manu kona kae fai ke galue.

8A mauga ko koga e kaikai ei latou, ko koga e salasala ei latou ki so se vao lauusiusi mo olotou kai.

9E mata e mafai se pulumakau vao o galue mō koe?

E mata e talia ne ia o moe i tau falemanu i se po e tasi?

10E mata e mafai ne koe o 'sai se manu e tasi ki te lopu,

Kae fai ne koe ke fakamalū te laukele?

Io me fai ne koe ke 'toso ne ia te mea tofa laukele i au fatoaga?

11E mafai ne koe o fakatuaga ki tena malosi,

Kae fakamoemoe ke fai ne ia au galuega mafa?

12E fakamoemoe koe ke tau mai ne ia a fua o au fatoaga kae fakaputu mai ne ia au saito mai i te koga solo saito?

13E se faka'tau eiloa i te vave o te kapatā o kapakau o te manu ko te ositelite!

Kae e seai se ositelite e mafai o eva pela me se matuku.

14A te ositelite e tuku ana fua i te laukele ko te mea ke fakavelavela i te vela o te one.

15E seai ne ona manatu me e mafai o laka ne se tino,

io me se manu vao.

16E fai ana faiga e pela eiloa me e se o ia a fua,

Kae e se manatu 'mafa ki te maumau o ana fitaga.

17Ko au ne fai ne au te manu tena ke valea,

Kae seki ave ne au ki ei te poto.

18Kae kafai ko kamata o tele, ko mafai ei o kata ki so se solofanua mo te tino e sopo i ei.

19Iopu, ko koe ne fai ne koe a solofanua ke malosi kae tuku atu ki a latou a fulu ua gali?

20Ko koe ne fai ne koe ke evaeva pela me ne se akelise kae fakamatakutaku a tagata ki olotou gulu?

21E tukeli ne latou a te laukele i te vanu;

Kae tele ki loto i te taua mo olotou malosi katoa.

22E se iloa ne latou te uiga o te mataku,

E seai se pelu e mafai o fai ne ia latou ke toe ma'fuli mai.

23A meatau kola e ave ne olotou tino i solofanua e gasuesue kae malāpu i te mainaga o te la.

24A solofanua ko tele fa'kefu i mua me ko 'pole i te fia olo o taua;

i te tagiga o pu, ka ko se mafai eiloa o 'tu malie.

25E 'gulu latou i taimi katoa e tagi ei te pu;

E mafai o iloa ne latou me e isi se taua e fai kae seki pilipili atu eiloa latou ki te koga tena e fai ei te taua,

Kae e lagona ne latou a ofisa e fai olotou fakatonuga.

26E a, e fakaakoako ne koe a te manu ko te oka ke eva i te taimi e fola ei ona kapakau faka'saga ki saute?

27E mata e fakatali eiloa te aeto ki se fakatonuga mai i a koe,

Ko fatoa faite ei sena ofaga i koga maluga i luga i mauga?

28E fai tena fale i kaupapa maluga, kae fai ne ia a papa tu makaikai mo fai tena olo fakalafi.

29Mai i kona, e onoono ei a ia ki koga pili mai mo koga 'mao ki ne manu ke tamate o kai.

30 Mata 24.28; Luka 17.37 A aeto e maopoopo fakatamilo i foitino 'mate,

Ka ko punuā aeto e inu i toto o manu 'mate kona.