FAATAOTO 5 - Tuvalu Revised Bible

Ko Polopolokiga e Uiga ki te Mulilua

1Taku tama, saga tonu mai kae fakalogo mai ki toku poto mo toku atamai.

2Tena la, ka iloa foki ei ne koe o fai fakalei ou uiga, mo au muna foki ka fakaasi mai i ei i a koe se tagata poto.

3A laugutu o te avaga a te sua tagata e mafai o magalo pela mo te hani, mo tena sogi e molemole pela me se sinu olive,

4kae kafai ko palele atu, seai se mea lei e maua ne koe mai ei, na ko te mae fua mo te puapuaga.

5Ka ave ne ia koe ki lalo i te lalolagi o tino mate; a te auala e sasale ei a ia ko te auala ki te mate.

6E se fia nofo a ia i te auala o te ola, ne kalo keatea mai i ei kae ko se iloa ne ia te mea ko tupu.

7Aku tama tagata, fakalogo mai ki a au, kae sa puli aku muna ne fai atu.

8Fakamao keatea mai i fafine pena! Sa fakapilipili atu foki eiloa ki tena mataloa.

9Kafai e fakapilipili koe ki ei, ka maua ne nisi tino te tulaga fakaaloalogia tela ne nofo mo koe muamua, kae ka mate koe i lima o tino masei kae koi tamataene koe.

10Ao, ka puke ne nisi tino tou maumea, mo mea ne galue fita koe ke maua ka puke ma se tino fakaatea.

11Ka takato fita koe i luga i tou moega tela ka mate koe i ei, mo ou kano mo tou foitino ka olo o seai,

12kae ka fai ake koe penei, “Ai a e se mafai ei ne au o tauloto te mea lei? Ai a e se mafai ei ne au o talia se tino ke fakatonu ne ia au?

13Au ne seki fakalogo ki oku faiakoga, ne seki saga tonu au ki a latou.

14Tenei la ko poi au i au ko fakamasiasigina i mata o tino.”

15Fakamaoni ki tau avaga tonu, kae alofa fua eiloa koe ki a ia tokotasi.

16A tamaliki a koe kola ne fai i nisi fafine ka se aoga ki a koe.

17Ko au tamaliki e tupu ake o fesoasoani ki a koe, se ko tino fakaatea.

18Tela la, fiafia fakatasi mo tau avaga kae taumafai ke fiafia koe ki te tamafine ne avaga koe ki ei —

19tela e matagali kae foitino lei pela me se tia. Ona mata gali ke fakafiafia ei koe, mo tena alofa ke fakapulupulu ne ia koe.

20Taku tama, ai a ka sona alofa fua ei koe ki se isi fafine fakaatea? Ai a e manako ei koe ki te gali o te avaga a te sua tagata?

21A te Aliki e lavea ne ia au mea katoa e fai. A ia e onoono faka'lei ki a koe i so se koga e fano koe ki ei.

22A agasala a te tagata amio masei se malei. E lavelavea foki eiloa a ia i te tili o ana agasala.

23E mate atu a ia me e se mafai ne ia a taofi ona manakoga. A tena valea ka ave ne ia a ia ki te tanuga.