FAATAOTO 19 - Tuvalu Revised Bible

1E sili atu te tino mativa kae fakamaoni i lo te tino gutu loi kae valea.

2A te tino loto pole kae se atamai e se lei; a te pole vale e mafai o ave ne ia koe ki koga e tupu ei fakalavelave.

3E isi ne tino e fakamasei ne latou a latou eiloa i olotou uiga valea, kae ka oti aka, ko lou ei ne latou me ko te Aliki ne pogai ei te lotou masei.

4A tino maumea e maua faeloa olotou taugasoa, ka ko taugasoa o tino mativa e se mafai o tumau.

5Kafai e fai ne koe se fakamatalaga loi i te fono tulafono, a koe e fakasala. Seai eiloa se auala e mafai o sao ei koe.

6A tino katoa e taumafai ke lei olotou va mo tino maluga; a tino katoa e manako ke taugasoa latou mo tino kola e tufa sale olotou mea.

7A taina o te tagata mativa e se fia saga mai eiloa ki a ia; setioa o seai ne ona taugasoa. Me e pefea eiloa tena taumafai ke maua ne ona taugasoa, kae e se mafai eiloa o maua.

8Tauloto a mea katoa e mafai ne koe o tauloto, ko tou fesoasoani tena ki a koe eiloa; kafai e masaua ne koe au mea ne tauloto kae ka maumea koe.

9So se tino tela e faipati ne ia se tala loi i te fono tulafono e se mafai o sao mai i te fakasalaga; ko malaia eiloa a ia.

10A tino valea e se tau o ola i se olaga maumea, pela foki a pologa e se tau o pule ne latou a tino maluga.

11Kafai koe se tagata atamai, e mafai eiloa ne koe o taofiofi tou kaitaua. Kafai e isi se tino ne fai ne ia se mea se ki a koe, kae se saga koe ki ei, ko tena uiga ko maua ne koe te mea tafasili i te taua.

12A te kaitaua o te tupu e pela eiloa mo te gulu o te leona, ka ko tena atafai e pela eiloa me se vaiua logomalie.

13A te tamaliki tagata valea e fakamasiasi ne ia tena tamana, ka ko te fafine gutu kotekote e pela me se motimotiga o te vai.

14E mafai o avatu ne matua ne fale mo tupe ki tena tama tagata, ka ko te Aliki fua e mafai ne ia o avatu ki ei se avaga atamai.

15A te tagata paie e moe faeloa, kae e iku eiloa ki te fiakai.

16Tausi ki tulafono a te Atua kae ka ola leva koe; kafai e se saga koe ki ei ko koe ka mate.

17Kafai e avatu ne koe ne mea ki tino mativa, e pela eiloa me se mea e tuku atu ne koe ki te Aliki, tela la, e toe taui mai ne te Aliki ki a koe e tusa eiloa mo tou aga'lei.

18Taumafai o akoako fakalei au tamaliki i te taimi koi foliki ei, kae koi mafai foki ne latou o tauloto. Kafai e se fai ne koe, ko tena uiga e fai ne koe ke masei olotou olaga.

19Kafai e isi se tino e vave kaitaua, tuku eiloa ke fepaki mo fakalavelave. Kafai e aumai ne koe a ia keatea mai i fakalavelave i se taimi, ko tena uiga e toe fai foki ne koe pena i se taimi.

20Kafai e fakalogo koe ki manatu fakatonutonu, kae loto fiafia o tauloto, kae ka maua ne koe te poto i se aso.

21A tino e fai olotou vaega fuafuaga e uke mo aso fakamuli, ka ko te loto o te Aliki e fai eiloa.

22E fakamasiasi te kai manako; e lei atu a tino mativa i lo tino loi.

23Fakalogo ki te Aliki kae ka ola leva koe, ka tokagamalie tou olaga kae sao mai fakalavelave.

24E isi ne tino ko to lasi te paie ko se maua eiloa ne latou o tuku meakai ki olotou gutu.

25A tino fakamatamata e tau o fakasala, ko te mea ke se toe fai ne latou te amioga tena. Kafai koe se tagata poto, e talia eiloa ne koe ke fakatonu atu ne se tino au mea se ne fai, kae saga tonu foki koe o tauloto a mea kona.

26A te tino e fai fakamasei ne ia tena tamana kae afuli keatea tena matua mai i tena fale, se tino se alofa kae masei.

27Taku tama, kafai ko se saga koe o tauloto, kae ka toe puli i a koe a mea ne iloa muamua ne koe.

28Kafai se molimau e taumafai o fakamasei te sua tino, ko tena uiga e faigata o isi se mea tonu i te koga tena. A tino amio masei e fiafia ki amioga masei.

29A te tagata valea e tau o kini.