SALAMO 94 - Tuvalu Revised Bible

A te Atua ko te Famasino o Tino Katoa

1Te Aliki, a koe ko te Atua e fakasala tino;

Fakaasi mai tou ita!

2A koe ko te famasino o tino katoa;

Tu ake o avatu te taui e 'tau ki a latou kola e fakamaua'luga!

3E gata afea te fiafia o tino amio ma'sei?

Te Aliki, e gata afea?

4Ka gata afea te fakamaualuga o tino ofa tulafono mo te fai'pati fia sili ki olotou agasala?

5Te Aliki, ko tuki pala ne latou tou fenua kae fakasaua ki ou tino.

6E 'ta ne latou a fafine ko 'mate olotou avaga mo tamaliki ko seai ne olotou matua,

Kae tamate foki ne latou a tino fakaatea e nofo i te motou fenua.

7E fai mai foki latou penei, “A te Aliki se lavea mai ne ia tatou;

E se matea foki ne te Atua o Isalaelu.”

8Toku fenua, ai a ko fai ei koutou pela me ne tino fakasupasupa?

E 'poto afea koutou?

9A te Atua ne fai ne ia otou taliga, e a, e se lagona ne ia?

Ne fai foki ne ia o'tou mata, e a, e se matea ne ia?

10A ia ko te pule o malo katoa, e a, e se fakasala ne ia latou?

A ia ko te faiakoga o tino katoa, e a, e se iloa ne ia?

11 1Koli 3.20 E iloa ne te Aliki olotou mafaufauga;

E iloa foki ne ia te se aoga o olotou manatu.

12Te Aliki, amutia te tino e fakatonu ne koe,

Mo ia foki tela e akoakogina ne koe ki au tulafono!

13Ne avatu ne koe ki a ia te filemu i taimi o puapuaga,

Ke oko ki te taimi e keli ei te lua ke malei i ei a tino amio masei.

14Me i te Aliki e se mafai o tiaki lele ne ia tena fenua;

E se mafai foki o tuku tiaki ne ia ona tino.

15A te fakamasinoga tonu ka toe fai i loto i fono fakamasino,

Kae ka 'lago ki ei a tino amiotonu katoa.

16Ko oi e tu fakatasi mo au o 'teke atu ki tino amio ma'sei?

Ko oi foki e kau ki au o 'teke atu ki tino fai mea 'se?

17Moi se fesoasoani mai te Aliki ki a au,

Penei ko leva ne oko vave atu au ki te fenua o tino 'mate.

18Te Aliki, au ne kalaga atu penei, “Au ko siga”;

Ka ko tou alofa tumau ne taofi ake ne ia au ki luga.

19I taimi e manavase kae se toka ei au, ko koe e fakamafanafana

Kae fakafiafia mai ki a au.

20A koe e se kau fakatasi mo famasino amio ma'sei,

Kola e fakatulafono ne latou a te mea 'se.

21Kola foki e fai fili ki tagata amio 'lei,

Kae tamate ne latou a tino se 'tau o fakasala ki te mate.

22Ka ko te Aliki e 'pui ne ia au;

Ko toku Atua e tausi ne ia a au.

23Ka fakasala ne ia latou ona ko olotou amio ma'sei,

Kae fakapalele foki ne ia latou ona ko olotou agasala;

A te Aliki te tou Atua ka fakamalaia ne ia latou.