TEUTELONOME 31 - Tuvalu Revised Bible

Iosua ko Sui ne ia a Mose

1Ne faipati atu eiloa a Mose ki tino Isalaelu, ana muna penei,

2Nume 20.12 “Ko tusa nei mo te selau luasefulu tausaga o toku olaga, ko se maua nei ne au o takitaki koutou. A te Aliki ne fai mai foki ki a au ke se sopo atu au ki te sua feitu o te Iolitana.

3Ko te Aliki te otou Atua ka fanatu i otou mua o ta fakapalele a malo kona e nofo i kona, ko te mea ke nofo koutou i te lotou fenua. Ko Iosua ka fai mo takitaki o koutou, e pela eiloa mo muna a te Aliki.

4Nume 21.21-35 Ka fakatakavale ne te Aliki a tino o fenua kona, e pela eiloa mo te fakatakavalega ne ia a Sekono mo Oko, ko tupu o Amoli, kae fakamasei foki te lotou fenua.

5Ka tuku atu ne te Aliki te manumalo ki a koutou i a latou, kae ka fai eiloa ne koutou te mea ne fai atu ne au ke fai ki a latou.

6Ke malosi otou loto kae sa mataku. Sa mataku i a latou. A te otou Atua, tela ko te Aliki, e fakatasi atu eiloa ki a koutou. E se mafai eiloa o tiaki ne ia koutou.”

7Ne kalaga atu a Mose ki a Iosua, kae fai atu ki a ia i mua o tino Isalaelu penei, “Ke malosi tou loto kae sa mataku; ko koe nei ka taki ne koe a tino ki te fenua tela ne tauto ne te Aliki ki tou tupuga.

8Iosu 1.5; Epe 13.5 Ko te Aliki ka takitaki ne ia koe kae fakatasi atu foki ki a koe. Ka se mafai eiloa o tiaki ne ia a koe, tela la, sa loto vaivai io me mataku.”

A te Tulafono e Tau o Faitau i te Taki Fitu o Tausaga

9Tena, ne tusi ne Mose a te Tulafono a te Atua, tuku atu ei ne ia ki faitaulaga sa Levi, kola e pule i te Pusa o te Feagaiga, pela foki ki takitaki o Isalaelu.

10Teu 15.1,2; Teu 16.13-15 Ne fai atu tena fakatonuga ki a latou penei, “I te fakaotiga o tausaga e fitu, i te tausaga tela e fakamagalo ei a kaitalafu, masaua o faitau a te mea tena i te Kaiga Fiafia o Fale Fakamalumalu.

11Faitau atu ki tino Isalaelu, i te taimi e o'mai ei o tapuaki ki te Aliki te otou Atua i te koga tapuaki ki te Aliki tenei e tasi.

12Kalaga atu ki tagata, fafine mo tamaliki katoa mo tino fakaatea kona e nofo i otou fa'kai, ko te mea ke lagona ne tino katoa kae ke iloa foki ne latou o fakaaloalo ki te Aliki te otou Atua kae fakalogo mo te fakamaoni ki ana akoakoga.

13I te faiga tena, ka lagona ei te Tulafono a te Aliki te otou Atua ne otou tino kola e seki lagona eiloa ne latou. Tena la, ka mafai ei latou o fakalogo ki a ia i aso e nofo ei latou i te fenua tena ka puke ne koutou i te feitu atu o te Iolitana.”

Ko te Toe Fakatonuga a te Aliki ki a Mose

14Muna a te Aliki ki a Mose penei, “Ko se mao nei kae galo atu koe. Kalaga atu ki a Iosua, kae aumai ki a au i toku Faleie, ke na tuku atu ne au a fakatonuga ki a ia.” Ne olo atu a Mose mo Iosua ki te Faleie o te Aliki,

15kae fakasae atu te Aliki ki a laua e foliga ki te pou kaumana e tu i te mataloa o te Faleie.

16Muna a te Aliki ki a Mose, “Ko se leva nei kae mate atu koe, kae mai tua ifo, a tino ka se fakalogo mai ki a au, kae ofa foki ne latou te feagaiga tela ne fai ne au mo latou. Ka tiakina ne latou a au kae tapuaki atu ki atua fapaupau o fenua kona ka uluatu latou ki ei.

17Kafai e tupu te mea tena, ko au ka kaitaua ki a latou; ka tiakina ne au latou kae ka fakamaseigina valevale latou. Ka uke a mala e oko ki a latou, kae ke iloa aka ne latou i mea konei e tupu ki a latou, me i a au, te lotou Atua, ko se fakatasi atu ki a latou.

18Ka se fesoasoani au ki a latou, me ne fai ne latou a amioga se lei, kae ne tapuaki foki ki atua fakaatea.

19“Tusi ki lalo te pese tenei. Akoako atu ki tino Isalaelu, ko te mea ke fai mo molimau o te lotou se fakalogo.

20Ka ave ne au latou ki lalo i te fenua maumea kae laukele ola, e pela mo taku tautoga ki olotou tupuga. I kona ka maua ei ne latou a meakai e manako latou ki ei, kae nofo i se olaga gali. Kae ka fuli atu latou o tapuaki ki atua fakaatea. Ka teke mai latou ki a au, kae ofa taku feagaiga,

21kae ka uke a mala e oko atu ki a latou. A te pese tenei ka usu faeloa i taimi nei, kae ka fai mo molimau ki te lotou amioga se lei ne fai. Ke oko mai foki eiloa ki te taimi nei, koi tuai nei o ave ne au latou ki loto i te fenua ne tauto au o tuku mo latou, kae e iloa eiloa ne au a te mea e mafaufau nei ki ei.”

22I te aso foki eiloa tena, ne tusi ne Mose te pese kae akoako atu ne ia ki tino Isalaelu.

23 Nume 27.23; Iosu 1.6 Tena, kae faipati atu te Aliki ki a Iosua, te tama tagata a Nuno, ana muna, “Sa mataku kae fakamalosi. Ka taki ne koe a tino Isalaelu ki loto i te fenua ne tauto au o tuku mo latou, kae ka fakatasi atu eiloa au ki a koe.”

24Ne fakamau ki lalo ne Mose a te Tulafono a te Atua ki te tusi, kae ne onoono fakalei eiloa a ia ke seai se mea e tiakina.

25I te otiga ne tusi ne ia, ne fai atu ei a ia ki faitaulaga i te gafa o sa Levi kola e tausi ne latou te Pusa o te Feagaiga a te Aliki, ana muna,

26“Puke te tusi tenei, tela e tusi ei a Tulafono a te Atua, kae tuku ki tafa o te Pusa o te Feagaiga a te Aliki te otou Atua, ko te mea ke tuku eiloa i kona ke fai mo molimau ki te se lei o amioga a tino o tena fenua.

27E iloa ne au te makeke o olotou loto mo te fia teke. Ko oti ne teke latou ki te Aliki i aso ne ola ei au, kae ka tumau foki eiloa te lotou teke ki te Aliki manafai ko galo atu au.

28Fakamaopoopo mai a takitaki o otou matakaiga, mo tino maluga, ko te mea ke faipati atu ne au a mea konei; ka kalaga au ki te lagi mo te lalolagi ke fai mo aku molimau e uiga ki te se lei o latou.

29E iloa ne au me kafai ko mate atu au, a tino ka fai a amioga masei kae teke ki mea ne akoako atu ne au ki a latou. I ne taimi fakamuli, kae ka oko atu a mala ki a latou, me ka faka'ita ne latou te Aliki o fai a mea ne fakatapu atu ke se fai ne latou.”

Ko te Pese a Mose

30Tena ne lau aka ei ne Mose a muna o te pese, ka ko tino Isalaelu katoa e fakalogologo.