TANIELU 11 - Tuvalu Revised Bible

1Ko te tiute o ia o fesoasoani mai ki au, kae 'pulu foki ne ia a au mai fakalavelave.

2A te mea tenei ka fakailoa atu ne au se mea tonu eiloa.”

Ko te Malo o Aikupito mo te Malo o Sulia

Muna a te agelu, “E toe tokotolu a tupu ka fai mo tupu i Pelesia, kae e isi foki se tupu i te tokofa tela ka fai mo tupu i tua o te tokotolu kona, kae ka maumea atu a ia i tupu katoa i ona mua. Kafai ko tugamalie eiloa tena malosi mo tena maumea, kae ka faitaua atu a ia ki te malo o Eleni.

3“Tena, kae ka tu mai te tupu takutakua. Ka pule a ia i se malo lasi, kae ka pule eiloa a ia i te mea e fai ne ia.

4Kae kafai ko tugamalie eiloa tena malosi, kae ka vaevae tena malo ki vaega e fa. A tupu kola e seki o'mai mai tena gafa ka fai mo tupu o sui a ia, kae ka se maua eiloa ne latou a te malosi o ia.

5“A te tupu o Aikupito ka fai foki mo tupu malosi. E toko tasi mai ana tino ma'luga ka sili atu tena malosi i a ia, kae ka fai mo tupu i se malo lasi atu.

6I tausaga e uke fakamuli ifo, ka fai ne te tupu o Aikupito se feagaiga fakataugasoa mo te tupu o Sulia, kae avatu ki ei tena tama fafine ke fai mo ana avaga. A te va fakataugasoa tena ka se tumau. A te fafine tena mo tena avaga, mo tena tama, mo tavini kola ne olo mo ia ka tamate katoa.

7E se leva mai tua ifo, kae ka fai mo tupu se tino e kaiga mo te fafine tena. Ka taua atu a ia tena ki te kautau a te tupu o Sulia, ka ulu atu latou ki loto i te lotou olo, fakatakavale ei ne ia latou.

8Ka puke ne ia a fakatusa o olotou atua, mo mea aulo mo siliva kola ko oti ne fakatapu ki atua kona, o ave ne ia ki Aikupito. Ka maua te filemu i te va o malo kona i ne nai tausaga,

9kae se leva foki, ko te tupu o Sulia ka taua atu ki Aikupito, kae ka afuli latou ne te kautau a Aikupito.

10“A tama tagata a te tupu o Sulia ka fakatoka o taua, kae ka fakamaopoopo ne latou se kautau lasi eiloa. E tokotasi mai i a latou ka fanatu e pela me se lofiaga o taua atu ki te fa'kai o te fili tela e isi sena olo.

11Ka fanatu te tupu o Aikupito i tena kaitaua o taua ki te tupu o Sulia, kae ka fakatakavale ne ia tena kautau lasi eiloa.

12Ka fakamatamata a ia i tena manumalo mo te uke o sotia ne ta ne ia, kae ka se tumau tena manumalo.

13“Ka foki atu te tupu o Sulia o toe fakamaopoopo se kautau e lasi atu i te kautau muamua. Kafai ko oko mai te taimi tonu, ka toe fanatu a ia mo se kautau lasi atu, kae toka atu foki i te kautau muamua.

14Tena, kae ka tokouke foki a tino ka teke atu ki te tupu o Aikupito. Tanielu, kae ka isi foki ne tino fakasaua mai tou fenua ka teke atu foki, e tusa mo te fakaasiga ne lavea ne latou, kae ka se manumalo latou.

15Tena, a te tupu o Sulia ka nikoi ne ia se fa'kai e fai tena olo, fakatakavale eiloa ne ia. A sotia o Aikupito ka ita ma taua; ke oko foki eiloa ki sotia ma'losi o latou ka seai ne olotou malosi.

16Ka pule eiloa te kau Sulia i te mea e fai ne latou ki te kau Aikupito, kae ka seai eiloa se tino e teke. Ka tu a ia i te Fenua o te Feagaiga kae pule katoatoa eiloa a ia i ei.

17“A te tupu o Sulia ka mafaufau ke fano tena malaga ki te fenua o tena fili, kae ave ne ia tena kautau katoa. Ka avatu ne ia tena tama fafine ke avaga mo te tupu o te malo tela e fai fili mo ia, ke fai se va fakataugasoa o laua, ko tena togafiti tena ke ta fakapalele ne ia te malo tena e fai fili mo ia; ka se taunu tena togafiti masei tena.

18Ka oti i kona, ka taua atu a ia ki malo kola e pili ki te tai, kae ka fakatakavale eiloa ne ia a malo e uke i malo kona. Kae ka fakatakavale a ia ne se takitaki mai se fenua fakaatea, ko fakagata ei tena fakamatamata; ka toe faka'foki atu eiloa ne ia a muna fakamatamata a te tupu o Sulia ki a ia.

19Ka foki atu te tupu ki olo o tena fenua, kae ka takavale a ia, tena foki eiloa tena gataga.

20“Ka vau se tupu mai ana tua, tela ka uga ne ia se ofisa ke fakapuapuaga a tino i faiga o lafoga, ko te mea ke mumea aka te maumea o tena malo. E se leva foki kae ka mate te tupu tena, e se mate i se taua io me i mua o tino.”

Ko te Tupu Amio Masei o Sulia

21Ne fakamatala eiloa te agelu, ana muna: “A te tupu o Sulia tenei ka tao mai nei se tagata masei kae se ko ia e tau o fai mo tupu. Ka vau a ia i se auala fakapoi o puke te malo ki tena malosi mo te fai togafiti.

22So se tino eiloa e teke ki a ia, ke oko foki eiloa ki te Faitaulaga Sili a te Atua, e tamate.

23Ka fakatogafiti ne ia a nisi malo o fai feagaiga mo latou, tena ka gasolo eiloa a ia o malosi e ui eiloa e foliki tena malo.

24Ka taua atu a ia ki te itu malo maumea, seai se fakailoaga, kae fai ne ia a mea e seki fai eiloa ne ona tupuga. Ka vaevae ne ia i tino kola e tau'tali i a ia, a koloa mo mea kola ne fao ne ia i nisi malo. Ka fai ana fuafuaga o taua atu ki nisi fa'kai kola e isi ne olo, ka ko tena taimi ko pili fua nei o palele.

25“Ka taumafai eiloa a ia o fakamaopoopo se kautau lasi o taua atu ki te tupu o Aikupito tela e fakatoka foki o taua mai ki ei mo tena kautau lasi kae malosi. A te tupu o Aikupito ka fakaloiloigina, tena ka se manumalo ei.

26Ko tino fakatonutonu totino eiloa a ia ka fakamasei ne latou a ia. Ka tokouke eiloa ana sotia ka mate, ka ko tena kautau ka fulu faka'ma.

27Tena, ka kai tasi te tokolua tupu kona i te taipola e tasi, ka ko manatu o laua ne manatu ma'sei, kae ka fakatau fakaloiloi eiloa laua i a laua. Ka se maua ne laua a mea e manako laua ki ei me seki oko mai a taimi o mea kona.

28A te tupu o Sulia ka foki atu ki tena fenua mo mea katoa ne fao ne ia mai nisi malo, mo tena fakamoemoega ke ofa ne ia te lotu a tino o te fenua o te Atua. Ka fai eiloa ne ia a te mea e loto a ia ki ei, ka oti ko foki atu ei a ia ki tena fenua.

29“Fakamuli ifo, ka toe taua atu a ia ki Aikupito, kae i te taimi tenei, ka se pau mo te taimi muamua.

30Ka o'mai a tino Loma i olotou vakamutu o teke a ia, kae ka mataku a ia.

“Tena, ka foki atu a ia mo te kaitaua, ko taumafai ei o ofa a te lotu a tino o te fenua o te Atua. Ka tautali a ia i muna a tino kola ne tiaki ne latou te lotu tena.

31Tani 9.27; 12.11; Mata 24.15; Male 13.14 A nisi o ana sotia ka fakaseaoga ne latou te Faletapu. Ka fakagata ne latou a taulaga fai i aso takitasi, kae fakatu aka ne latou a te Mea Fakamataku.

32Ka fakatogafiti ne te tupu a tino kola ko oti ne tele keatea mai te lotou lotu, ke kau atu ki a ia, ka ko tino kola e talitonu ki te Atua e taua mai eiloa ki te tupu.

33A takitaki poto o te fenua ka fakasalalau atu te lotou poto ki nisi tino. I se taimi, ka mate a nisi o latou i te taua io me mate i te afi, ka ko nisi ka fao malo olotou mea kae pei ki falepuipui.

34I te taimi e fakatau ta'tino ei a tino, ka ko tino o te Atua ka maua ne latou se fesoasoani foliki e ui eiloa a te tokoukega kola e kau atu ki a latou e kau fua ke 'sao latou.

35A nisi o takitaki poto kona ka mate, kae e lei me ka faka'ma ei a tino i feitu faka tapuakiga. Ka tumau eiloa te mea tena ke oko ki te taimi e oko mai ei te gataga, te taimi tela ko oti ne fakasino ne te Atua.

36 2Tesa 2.3,4; Faka 13.5,6 “A te tupu o Sulia ka pule eiloa i te mea e manako a ia o fai. Ka fai ana muna fakamatamata i a ia e sili atu i so se atua, ke oko foki eiloa ki te Atua Maluga. Ka mafai eiloa ne ia o fai te mea tena ke oko ki te taimi e fakasala ei a ia ne te Atua. A te Atua ka fai eiloa ne ia a te mea ko oti ne fuafua ne ia ke fai.

37A te tupu tena ka se saga ki te atua tela e tapuaki ki ei ona tupuga, pela foki te atua tela e fia'fia ki ei a fafine. Ka se saga eiloa a ia ki so se atua me i ona manatu, me e sili atu a ia i so se atua.

38Ka fakaaloalo ne ia a te atua tela e puipui ne ia a olo o fa'kai. Ka ofo atu ne ia ne aulo, siliva, mo fatu taua mo nisi meaalofa ki se atua e seki tapuaki ki ei ona tupuga.

39Ka fakaaoga ne ia a tino e tapuaki ki atua fakaatea ke puipui ne latou ona olo. Ka taui fakalei ne ia a tino kola e talia ne latou tena pule, ka fakasopo ne ia latou ki tulaga maluga, kae avatu foki ne ia a laukele e taui ei te lotou fakamaoni ki a ia.

40“Kafai ko pili mai a te toe taimi o te tupu o Sulia, kae ka vau a te tupu o Aikupito o fai taua ki ei, ka ko te tupu o Sulia ka taua mai foki ki te tupu o Aikupito mo tena malosi katoa, mo kaliota, solofanua mo vakamutu e uke. Ka taua atu a ia ki fenua e uke, e pela me se lofiaga.

41Ka taua mai foki a ia ki te Fenua o te Feagaiga, kae ta ne ia i taki sefulu afe, ka ko tino Etoma, Moapi mo tino e toe o Amoni ka sola keatea.

42Kafai ko taua atu a ia ki fenua katoa kona, kae e aofia foki i ei a Aikupito.

43Ka ave keatea ne ia a koloa funa o Aikupito, ko siliva mo aulo mo nisi koloa taua. Ka fakatakavale ne ia a te fenua o Lipia mo Sutana.

44Ka oko mai a tala mai te saegala mo matu, kae ka mataku a ia, taua atu eiloa a ia, ta valevale eiloa a tino e tokouke.

45Ka fakatu aka ne ia ana faleie lasi i te va o te tai mo mauga, te koga e tu ei te Faletapu. Kae ka mate eiloa a ia, ka seai se tino e fesoasoani ki a ia.”