ESEKIELU 18 - Tuvalu Revised Bible

Ko Tiute Tauave o Tino Takitokotasi

1A te Aliki ne faipati mai ki a au,

2Iele 31.29 ana muna, “Se a te fataoto tenei e faipati soko ne tino i te fenua o Isalaelu?

‘A matua e kai ne latou a vine 'kona,

Kae kavasia i ei a olotou fanau. ’

3Muna a te Aliki Sili, “Au ko te Atua ola ” ko fai tonu atu me ka se toe faipati soko eiloa ne koutou a te fataoto tena i Isalaelu.

4A te ola o tino katoa e pule ne au, ko te ola o matua, pena foki te ola o tamaliki. A te tino tela e agasala ko te tino foki tena e mate.

5Muna a te Aliki Sili, “Kafai e isi se tino amio lei, e amiotonu kae fakamaoni.

6E se tapuaki ki tupua a te kau Isalaelu, e se kai foki ki taulaga kola e ofo atu i faletapuaki kola e tapu. E se fakalata ne ia a te avaga a te sua tagata, e se moe foki mo se fafine i te taimi e masaki fakafafine ei te fafine tena.

7E se fakaloiloi ne ia se tino, io me fao malo ne ia ana mea. E fakafoki ne ia a te togi e aumai ne te tino tela ne fakaaoga ne ia sena mea; e fagai ne ia a tino fiakai kae fakalavalava ne ia a tino e seai ne gatu.

8E se tuku fakakaitalafu ne ia ana tupe ke maua se pasene a ia i ei. E se manako o fai se amioga masei, kae e fai ne ia ana ikuga i kinauga mo te fakamaoni.

9Levi 18.5 A te tino pena e fakalogo ki aku fakatonuga kae tausi fakalei ki aku tulafono. A ia e amiotonu, kae ka ola eiloa a ia.”

10“Kafai la e isi se tama tagata a te tagata tenei, tela e faomea kae tatino, kae e fai ne ia a mea

11kola e seki fai eiloa ne tena tamana. E kai ki taulaga kola e ofo i faletapuaki fapaupau, kae e fakalata ne ia a avaga a nisi tagata.

12E fakaloiloi ne ia a tino mativa, e faomea, e puke foki ne ia a te togi fakaleoleo tela e tuku mai ne te tino ne fakaaoga ne ia sena mea. E fano ki faletapuaki fapaupau, tapuaki ki tupua mataga,

13kae tuku fakakaitalafu ana tupe mo se pasene. E mata e ola a ia tena? Ikai, e se ola. Ne fai ne ia a amioga masei katoa kona, tela la, e mate eiloa a ia. Ko tena se eiloa ko ala ei a ia o mate.

14“Kafai la e isi se tamaliki tagata a te tagata tenei. E lavea ne ia a agasala katoa ne fai ne tena tamana, kae e se tautali a ia i ei.

15E se tapuaki ki tupua a te kau Isalaelu, e se kai foki i taulaga e ofo atu i faletapuaki fapaupau. E se fakakolekole ne ia a te avaga a te sua tagata

16io me fakapuapuaga ne ia se tino io me fao a mea a se tino. E fakafoki eiloa ne ia a te togi fakaleoleo tela e tuku mai ne te tino ne fakaaoga ne ia tena mea. E fagai ne ia tino mativa kae fakalavalava a tino seai ne gatu.

17E se manako o fai amioga masei, kae e se tuku fakakaitalafu ana tupe mo se pasene. E tausi ki aku tulafono kae fakalogo ki aku fakatonuga. Ka se mate a ia ona ko agasala a tena tamana, kae ka ola eiloa a ia.

18A tena tamana ne fakaloiloi kae fao ne ia a mea a tino, kae fai amioga masei ki tino katoa. Tela la, e mate eiloa a ia ona ko agasala ne fai ne ia.

19“Kae ne fesili mai koutou penei: Ai a e se puapuaga ei te tamaliki i agasala a tena tamana? A te tali, ona ko te tamaliki ne fai ne ia te mea tonu mo te mea lei. Ne tausi ki aku tulafono kae tautali fakalei ki ei, tela la, e ola eiloa a ia.

20Teu 24.16 Ko te tino agasala e mate. E se tau o puapuaga te tamaliki i agasala a tena tamana, e pena foki te tamana e se tau o puapuaga i agasala a tena tama. A te tagata amio lei e maua tena taui lei ona ko ana mea lei ne fai, ka ko te tagata amio masei e puapuaga foki eiloa i ana mea se lei ne fai.

21“Kafai se tagata amio masei ko fakagata tena fai agasala kae ko tausi ki aku tulafono, kafai e fai ne ia a te mea tonu kae lei, e se mate eiloa a ia; e ola eiloa a ia.

22Ka fakamagalo ana agasala katoa, kae ka ola eiloa a ia, me ne fai ne ia te mea tonu.”

23Muna a te Aliki Sili, I tau fakatau, au e fiafia o kilokilo ki se tino masei ke mate?” “Ikai, e sili atu toku fiafia ke salamo ko te mea ke ola.

24“Kae kafai se tagata amiotonu ko se fai ne ia a mea lei, kae ko kamata o fai a amioga masei kae mataga, kola e fai ne tino amio masei, e mata e tumau eiloa tena ola? Ikai! E se toe manatua a mea lei ne fai ne ia. Ka mate a ia ona ko ana agasala mo tena se fakamaoni.

25“Kae e fai ake otou muna penei, ‘A te mea e fai ne te Aliki e se tonu. ’ Fakalogo mai ki a au, koutou tino Isalaelu. A koutou e mafaufau pela i aku mea e fai e se tonu? Ko otou mea e fai e se tonu.

26Kafai se tagata amiotonu ko se fai ne ia te mea lei, kae ko kamata o fai a amioga masei, kae mate, e mate ona eiloa ko amioga masei ne fai ne ia.

27Kafai se tagata amio masei ko fakagata a uiga masei, kae ko fai ne ia a te mea tonu kae lei, ko fakasao eiloa ne ia a tena ola.

28Ko iloa aka ne ia te se lei o ana mea ne fai, ko fakagata ei tena fai agasala, tela la, e se mate eiloa a ia, kae ka ola eiloa.

29Ka ko koutou tino Isalaelu e fai ake penei, ‘A te mea e fai ne te Aliki e se tonu. ’ A koutou e mafaufau pela i aku faiga e se tonu, ne? Ko koutou e se tonu otou mea e fai.

30“Nei, a au, te Aliki Sili, ko fai atu ki a koutou tino Isalaelu me ka fakamasino ne au a koutou taki tokotasi e tusa eiloa mo otou mea taki tokotasi ne fai. Fulitua atu ki otou uiga masei, kae sa faigina ke ta fakapalele koutou ona ko otou agasala.

31Tiakina a amioga masei ne fai sale ne koutou, kae fakafou otou loto mo otou mafaufau. Ai a e manako ei koutou, tino Isalaelu, ke mate koutou?

32Au se manako ke mate se tino. Fulitua atu ki otou agasala kae ka ola koutou.” Ko muna kona a te Aliki Sili.