1 TESALONIA 4 - Tuvalu Revised Bible

Ko te Olaga e Fiafia ki ei te Atua

1Tenei la e taina, konei a toe muna, e fakatagi kae fakamolemole atu matou ki a koutou i te igoa o te Aliki ko Iesu, e pela eiloa mo te mea ko oti ne tauloto ne koutou mai i a matou, a te olaga e fiafia ei te Atua, tela e 'tau o ola ei koutou, e penei mo te tulaga ko iai nei koutou i ei. Ia, e 'tau eiloa o fakasilisili ne koutou a te olaga tena.

2Me e iloa ne koutou a akoakoga ne tuku atu ki a koutou, e alatu i te pule a te Aliki ko Iesu.

3Tenei te loto o te Atua mo koutou: e manako ke tapu koutou, kae ke faka'mao koutou mai amioga fina lalolagi.

4A koutou tagata, e 'tau o iloa ne koutou o ola mo otou avaga fafine, i te agaga o te ava mo te fakaaloalo,

5kae sa salasala ki manako faka te lalolagi, e pela mo tino pouliuli e se iloa ne latou a te Atua.

6I te feitu la tenei e se 'tau mo se tino o fai sena mea 'se ki so se kelisiano io me fakaagasala ne ia. Ko oti foki ne taku muamua atu ne matou a te mea nei, kae nei ko toe fakatonu malosi atu ne matou ki a koutou, me i te Aliki e fakasala ne ia a tino kola e fai ne latou a mea 'se kona.

7A te Atua e seki kalagagina ne ia tatou ke ola i te olaga fina lalolagi, ka ko te olaga tapu.

8Tela la, so se tino e 'teke ne ia a te akoakoga tenei, e se 'teke ki te tino, kae 'teke ne ia a te Atua, tela e avatu ne ia ki a koutou a tona Agaga Tapu.

9E se toe aoga a te tusi atu ki a koutou e uiga ki te alofa atu ki otou taina talitonu. Me ko oti eiloa ne akoako koutou ne te Atua ke iloa ne koutou o fakatau a'lofa.

10Me ko oti ne fai penei ne koutou ki taina talitonu katoa i Maketonia. Tela la, ko toe fakamolemole atu matou e taina, ke momea ake eiloa otou faiga pena.

11Ke fai mo otou fakavae a te ola i te olaga filemu, ke kilo ifo eiloa koe ki au galuega e 'tau o fai, kae ke ola eiloa a te tino i ana galuega, e pela eiloa mo te motou faiatuga muamua.

12I te feitu tenei, e mafai ne koutou o tosina mai a loto o latou kola e se ne tino talitonu, ka ko se toe fakalagolago foki koutou ki se isi tino i mea e ma'nako koutou ki ei.

Ko te Toe Foki Mai o te Aliki

13Taina, a matou e manako ke iloa ne koutou a te mea tonu e uiga ki a latou kola ko 'mate, ko te mea ke se fanoanoa koutou, e pela mo ne tino ko seai ne olotou fakamoemoega.

14E talitonu matou i a Iesu ne mate kae toetu; tela la, e talitonu matou me toe faka'tu ne te Atua mo Iesu a tino 'mate kola e talitonu ki a ia.

15 1Koli 15.51,52 Me tenei eiloa a te akoakoga a te Aliki e fai atu ne matou: ko latou kola koi ola i te aso e foki mai ei te Aliki, e se mafai o 'mua atu i a latou kola ko 'mate.

16Ko te Aliki eiloa e vau mai te lagi mo tena leo e kalaga sale o fakatonu, mo te leo foki o te agelu pule, mo te leo foki o te pu a te Atua! Ko latou kola ko 'mate kae ne talitonu ki a Keliso, ko latou kona e 'tu muamua mai te mate;

17ka ko tatou la kola koi ola i te aso tena, ka 'luku fakatasi tatou mo latou i kaumana o fakafetaui ki te Aliki i te vateatea. Tela la, e fakatasi faeloa tatou mo te Aliki.

18Ke fakatau fakamafanafana kae fakamalosi te sua tino ki te sua tino ki akoakoga konei.