ESETA 7 - Tuvalu Revised Bible

1Tena ne olo ei a te tupu mo Hamanu i te fakalua o taimi ki te 'kaiga a Eseta.

2I te taimi ne inu ei latou i te uaina, ne toe fesili atu te tupu ki a Eseta penei, “Eseta, se a te mea e manako koe ki ei? Fakaasi mai te mea e manako koe ki ei kae ka avatu ne au, faitalia manafai ko te afā o toku malo.”

3Ne tali atu a Eseta penei, “Tou Malu, kafai e tonu e talia ne koe toku manakoga se aogā tenei, a toku manako ko au ke ola, mo tino foki o toku fenua ke fakaola foki.

4A matou tino Iutaia ko pili nei o tamate. Moi fai pela matou e ave o fakapologa, penei e nofo malie eiloa au, se fanatu o fakalavelave koe. Kae nei, a matou ka fai o 'ta fakapalele!”

5Tena kae sili atu te Tupu ko Asuelu ki a Eseta penei, “Ko oi te tino tena e taumafai o fai se vaega mea pena? Tefea te tino tena?”

6Ne tali atu a Eseta, “A te fili o matou, te tagata tenei e taumafai o ta matou, ko te tagata masei tena ko Hamanu!”

Ne faka'pula atu a mata o Hamanu ki te tupu mo tena avaga, kae ko oko eiloa i tena mataku.

7Ne tu aka te tupu kae ko oko eiloa i te kaitaua, tiaki ei ne ia a te potu tena, kae fanatu ki tua i fatoaga o te palesi. Ko iloa ne Hamanu i te tupu ko taumafai eiloa ke fakasala a ia, tena ne nofo ei a ia o fakamolemole ki a Eseta ke fakasao a ia.

8I te taimi ne totuli ifo ei a ia i luga i te nofoaga o Eseta o fakamolemole ki ei ke alofa atu ki a ia, kae ulu mai mo te tupu ki loto i te potu, ko foki mai i tua i fatoaga. I te laveaga ne te tupu a te mea tena, ne kalaga ei a ia penei, “A te tagata tenei e taumafai o puke malo a Eseta i konei i oku mua, i loto i toku palesi?”

E seki oti a pati a te tupu, kae 'mai a eunuka o kofu te ulu o Hamanu.

9Tena, kae fai aka mo muna a te eunuka e toko tasi e igoa ki a Halapono penei, “A Hamanu ne faite foki ne ia se mea sisi tino i tena fale ko te mea ke sisi ne ia a Moletekai, te tagata ne fakasao ne ia a koe. A te mea sisi tino tena e tusa mo te luasefulu lua mita te loa!”

Ne fakatonu atu te tupu penei, “Sisi atu a Hamanu i ei!”

10Tena ne sisi ei a Hamanu i te mea sisi tino tela ne faite ne ia mo sisi a Moletekai. Tena, ne 'toka ei a te kaitaua o te tupu.