FAATAOTO 17 - Tuvalu Revised Bible

1E sili atu manafai e kai au mu falaoa mo tou mafaufau e tokagamalie, i lo te fano o koe o kai i se 'kaiga lasi i te fale e fonu i fakalavelave.

2A te tavini atamai e mafai o silia atu tena pule i lo te tama tagata a tena matai, kae maua foki ne ia se vaega i koloa a tena matai.

3A te aulo mo te siliva e tofotofo ki te afi, ka ko te loto o te tagata e tofotofo ne te Aliki.

4A tino amio masei e fakalogologo ki manatu masei, ka ko tino loi e fakalogo ki tala loi.

5Kafai koe e kata ki tino mativa, ko tena uiga a koe e teke ki te Atua tela ne faite ne ia latou. A koe e fakasala manafai e fano koe o kata se tino e maua ne se fakalavelave.

6A toeaina e fakamatamata i olotou mokopuna, e pela eiloa mo tamaliki e fakamatamata i olotou tamana.

7A tino kola e fakaaloalogina ne tino e se ti loi sale, ka ko tino valea e seai ne muna aoga e mafai o faipati ne latou.

8E isi ne tino e mafaufau pela i te togi o se tino ke fai te mea e loto koe ki ei e pela me se vavega; e talitonu latou me e mafai o fai so se mea manafai e togi a tino ke fai ne latou a galuega pena.

9Kafai koe e manako ki tino ke fiafia atu ki a koe, e tau o fakamagalo ne koe a mea se a latou e fai atu ki a koe. Kafai e tausisi faeloa koe ki mea se ne fai atu ki a koe, e ofa fua ne koe te va lei o koe mo ou taugasoa.

10A te tagata poto e tasi eiloa te taimi e kote ei, ko te mea eiloa ko iloa ne ia te mea e tau o fai, ka ko te tino valea e kini fakaselau kae e se mafai o iloa ne ia te mea e tau o fai.

11A te mate e vau pela me se avefekau amio masei ki tino amio masei kola e fakatupu faeloa ne latou a fakalavelave.

12E lei atu manafai e fetaui koe mo te matua ulosa tela ko galo ana tama, i lo te fetaui o koe mo se tino valea tela e saga o fai sena galuega valea.

13Kafai e taui ne koe te lei ki te masei, ko tena uiga ka se mafai o fano keatea te masei mai i loto i tou fale.

14A te kamataga o se finauga, e pela eiloa manafai ko kamata o maofa te mea tela e taofi ne ia te tafe o te vaitafe; e tau o fakagata koi tuai o gasolo o lasi te maofaga.

15A te Aliki e se fiafia ke fakasala a tino amiotonu kae fakasao a tino amio masei.

16E seai se aoga e fakaaoga ei ne se tino valea ana tupe mo ona akoga, me e seai sena mafaufau.

17A takaga e masani o fiafia fakatasi kae fakatau alofa. A taina e tau o fakatau fesoasoani i taimi o fakalavelave.

18Ko te tino valea fua e tauto ke togi ne ia a te kaitalafu a te sua tino.

19A te tino e fiafia ki te agasala e fiafia o fakatupu fakalavelave. Kafai koe e faipati fia mafi i taimi katoa, ko tena uiga a koe e sala ki se fakalavelave.

20So se tino e mafaufau ki amioga masei, kae faipati ki mea masei, e se mafai o maua ne ia se mea lei, ko te puapuaga fua.

21A te tamana e fanoanoa faeloa, manafai tena tama tagata e fai faeloa ne ia a uiga valea.

22Kafai koe e matafiafia faeloa, kae ka tumau te malosi i a koe. Kafai koe e fanoanoa faeloa kae pili mai te mate.

23A famasino amio masei e talia ne latou a togi fakakolekole, ko tena uiga ko se fai ne latou te mea tonu.

24A te tagata poto e taumafai o fai a galuega lei, ka ko te tino valea e se tumau i se koga e tasi.

25A te tamaliki valea e aumai ne ia te fanoanoa ki tena tamana mo te mafatia ki tena matua.

26E se tonu manafai e fakasala te tino amiotonu; kafai e fakasala a tino amio lei, ko tena uiga ko se fai te mea tonu.

27A te tino tela e talitonu ki tena poto, e se gutu faipati. A tino kola e filemu e lasi te mea e iloa ne latou.

28E mafai foki eiloa o leake nei a tino i te tino valea tela se tino poto kae malamalama manafai e nofo filemu kae se gutu faipati.