1 SAMUELU 27 - Tuvalu Revised Bible

Ko Tavita mo te kau Filisitia

1Ne fai aka a Tavita ki a ia eiloa penei, “I se aso fakamuli nei, ko au ka tamate ne Saulo. A te mea sili e tau o fai ne au, ko au ke sola ki Filisitia, ke se toe sala au ne Saulo i Isalaelu, tena, ka saogalemu ei au.”

2Tena, ne olo fakavave atu a Tavita mo tena potukau e onoselau ki a Akisa, te tama tagata a Maoka, te tupu o Kata.

3Ne nofo eiloa a Tavita mo tena kau mo olotou kaiga i kona. A Tavita ne nofo eiloa i kona mo ana avaga e tokolua; ko Ainoama mai Ieseleelu, mo Apikaila te avaga a Napalu tela ko oti ne mate, mai Kalamelu.

4I te logoga o Saulo i a Tavita ko oti ne sola ki Kata, tena seki toe sala ei a ia ki ei.

5Muna a Tavita ki a Akisa, “Kafai koe ko toku taugasoa, tuku mai se fa'kai foliki mo oku nofo. Tou malu, se tau mo au o nofo mo koe i te fa'kai lasi.”

6Tena, ne tuku atu ei ne Akisa te fa'kai foliki o Sikilaka. Tena te pogai ne fai ei a Sikilaka mo fa'kai o tupu o Iuta talu mai te taimi tena.

7E sefulu ono masina ne nofo ei a Tavita i Filisitia.

8I te vaitaimi tena, a Tavita mo tena kau e taua sale ki tino o Kesula, Kilisi mo Amaleka, kola ko leva ne nofo i te kogā fenua tena. E faitaua sale atu a ia ki olotou fenua, ke oko eiloa ki Sula i te auala ki lalo i Aikupito,

9kae tamate a tagata katoa, mo fafine, kae puke a mamoe mo pulumakau, mo asini, mo kamela, ke oko foki eiloa ki gatu. Ka oti, ko foki atu ei a ia ki a Akisa,

10tela e fesili atu sale penei, “A koe ne faitaua i fea i te taimi tenei?” Ka ko Tavita ka tali atu pela, i a ia ne faitaua ki te feitu ki saute o Iuta, io me ko te laukele o te kaukaiga o Ielamele, io me ko te laukele tela ne nofo ei a tino Keni.

11A Tavita e tamate faeloa ne ia a tino katoa, tagata mo fafine, ko te mea ke seai eiloa se tino e foki atu ki Kata o fakaasi te mea tonu tela e fai ne ia mo tena kau. Tena te mea ne fai ne Tavita i aso ne nofo ei a ia i Filisitia.

12Ka ko Akisa ne talitonu eiloa i a Tavita, tela ne mafaufau aka a ia penei; “Ko oko eiloa i te takalialia o tena fenua i a ia, tela la, kaati ka tavini mai eiloa a ia ki a au i tena olaga katoa.”