IELEMIA 36 - Tuvalu Revised Bible

Ko Faitau atu ne Paluka a te Peluga Pepa i te Faletapu

1 2Tupu 24.1; 2NTupu 36.5-7; Tani 1.1,2 I te fa o tausaga o te nofoaiga a te Tupu ko Ieoiakimo, te tama tagata a Iosia, i Iuta, ne faipati mai te Aliki ki a au penei,

2“Puke mai se pepa o tusi ki ei a mea katoa kola ne fai atu ne au e uiga ki a Isalaelu mo Iuta mo malo katoa. Tusi ki lalo a mea katoa kola ne fai atu ne au ki a koe, mai i te taimi ne kamata ei au o faipati atu ki a koe, i te taimi o te nofoaiga a te Tupu ko Iosia, ke oko mai ki te taimi nei.

3E se taumate kafai e 'logo a tino Iuta i te fakamaseiga tela e mafaufau au o fakaoko atu ki a latou, kaati ka fulitua latou ki olotou uiga masei. Tena la, ko fakamagalo ei ne au a olotou amioga masei mo olotou agasala.”

4Tena ne uga ei taku fekau ki a Paluka te tama tagata a Nelia, faipati ei ne au ki ei ke tusi ne ia, a mea katoa kola ne fai mai ne te Aliki ki a au. Ne fakamau eiloa ne Paluka a mea katoa kona ki te pepa tena.

5Oti aka, tuku atu ei ne au a fakatonuga konei ki a Paluka: “Au ko se talia ke fano ki loto i te Faletapu.

6Ka ko au e manako ke fano koe ki te Faletapu i te taimi e toe fakaliki'liki ei a tino i kona. Ka faitau atu ne koe a te pepa tena i te leo maluga, ko te mea ke lagona ne latou a mea katoa kola ne fai mai ne te Aliki ki a au, konei ne fakalau atu ne au ke tusi ne koe. Ke faitau atu ne koe a te pepa tena i te koga tela e mafai o lagona i ei ne tino katoa, pela foki a tino Iuta kola ne o'mai mai i olotou fa'kai.

7E se taumate ka talo atu latou ki te Aliki, kae fulitua ki olotou uiga masei, me i te Aliki ne ita kae kaitaua ki a latou.”

8Tena la, ne faitau atu eiloa ne Paluka a muna a te Aliki i te Faletapu, e pela eiloa mo taku fakatonuga ki a ia.

9I te iva o masina, i te lima o tausaga o te nofoaiga a Ieoiakimo te tupu i Iuta, ne fakaliki'liki ei a tino, ko te mea ke fiafia mai te Aliki ki a latou. A te fakalikilikiga tena e fai sāle eiloa ne tino katoa kola e nofo i Ielusalema pela foki mo tino katoa kola e o'mai ki kona mai i fa'kai o Iuta.

10Tena la, ne faitau atu ne Paluka mai i te pepa tena a mea katoa kola ne faipati ne au, ka ko tino e fakalogologo. Ne faitau atu ne ia a te pepa tena i te Faletapu, mai i te potu o Kemalia, te tama tagata a Safana, te failautusi o te fono. A tena potu e tu i te potu ki luga, i tafa o te auala ki te Mataloa Fou o te Faletapu.

Ko Faitau atu a te Peluga Pepa tena ki ofisa

11A Mikaio, te tama tagata a Kemalia, kae ko te mokopuna o Safana, ne lagona ne ia a te faitauga ne Paluka a te peluga pepa tela e tusi i ei a muna a te Aliki.

12Tena ne fano ei a ia ki te palesi, ki te potu o te failautusi o te fono, i kona e fai mai i ei a te fono a ofisa katoa. A Elisama, te failautusi o te fono, Telaia te tama tagata a Semaia, Elenatano te tama tagata a Akapola, Kemalia te tama tagata a Safana, Setekaia te tama tagata a Hanania, mo nisi ofisa katoa, e nofo mai i kona.

13Ne fakaasi atu ne Mikaio ki a latou a mea katoa kola ne faitau ne Paluka ki tino.

14Tena ne uga ei ne ofisa kona a Ieuti (te tama tagata a Netania, kae ko te mokopuna o Selemia, kae se mokopuna o te tama tagata a Kusi) ke fai ki a Paluka ke aumai a te peluga pepa tela ne faitau atu ne ia ki tino. Ne aumai eiloa ne Paluka a te peluga pepa tena ki a latou.

15Muna a latou, “Nofo ki lalo kae faitau mai a te peluga pepa tena ki a matou.”Tena ne faitau atu ei ne Paluka a te pepa tena ki a latou.

16I te otiga ne faitau ne Paluka a te pepa tena, ne fakatau kilo te sua tino ki te sua tino mo te 'poi, fai atu ei latou ki a Paluka penei, “E 'tau o fakailoa ne matou a te mea tenei ki te tupu.”

17Tena ne fesili atu ei latou ki a ia penei, “Fakaasi mai me ne tusi pefea ne koe a mea konei? Ko Ielemia ne fakalau atu ne ia kae tusi ne koe?”

18Ne tali atu Paluka penei, “Ko Ielemia ne fakalau mai ne ia a muna katoa kona ki a au, kae ne tusi ne au ki te vaitusi ki te peluga pepa tenei.”

19Tena ne fai atu ei latou ki a ia penei, “A koulua mo Ielemia e tau o olo o muni. Sa fakaasi ki se tino te koga e olo koulua ki ei.”

Ko 'Sunu ne te Tupu a te Peluga Pepa Tena

20Ne tuku ne ofisa kona a te peluga pepa tena i te potu o Elisama, te failautusi o te fono, kae olo atu latou ki te potu o te tupu, o fakaasi atu ki ei a mea katoa kona.

21Tena ne uga ei ne te tupu a Ieuti ke fano o puke mai a te peluga pepa tena. Ne puke mai ne ia mai i te potu o Elisama, faitau atu ei ne ia ki te tupu mo ofisa katoa kola e 'tu i ona tafa.

22A te taimi tena, ko te taimi o te 'tau 'moko, tela la, a te tupu e sagasaga i tafa o te afi i tena palesi o te tau 'moko.

23I te otiga ne faitau ne Ieuti e tolu me e fa palakalafa, kae 'kati keatea ne te tupu a te vaega o te pepa tena ko oti ne faitau, ki te tama naifi, o pei ki te afi. Ne katikati sale eiloa ne ia pena a te peluga pepa, ke oko ki te taimi ne palele katoa te pepa tena ki loto i te afi.

24A te tupu mo ana ofisa kola ne lagona ne latou a mea kona e se ma'taku, se fanoanoa foki.

25E ui eiloa ne fakamolemole atu a Elenatano, Telaia mo Kemalia ki te tupu ke sa 'sunu a te peluga pepa tena, kae e se saga mai eiloa a ia ki a latou.

26Tena, ne fai tena fakatonuga ki te Pelenise ko Ielameele, mo Selaia te tama tagata a Asilielu, mo Selemia te tama tagata a Apateeli, ke puke fakapagota a maua mo taku failautusi ko Paluka. Ka ko maua ko oti ei ne fakamuni ne te Aliki.

Ko toe Tusi ne Ielemia a te Suā Peluga Pepa

27I te otiga ne 'sunu ne te Tupu ko Ieoiakimo a te peluga pepa tela ne fakalau ne au kae tusi ne Paluka, ne toe fai mai te Aliki ki a au

28ke puke te sua peluga pepa o tusi ki ei a mea katoa kola ne tusi i te peluga pepa muamua.

29A te Aliki ne fai mai ki a au ke fai atu au ki te tupu penei, “Ko oti ne 'sunu ne koe a te peluga pepa, kae ne fesili foki koe ki a Ielemia me ai a ne tusi ei ne ia i te tupu o Papelonia e vau o fakamasei a te fenua tenei kae tamate a tino mo manu i ei.

30Tela la, i te taimi nei, a au, te Aliki, ko fai atu ki a koe e te Tupu ko Ieoiakimo, me ka se toe ai se tino i tou gafa e toe fai mo tupu i te malo o Tavita. A tou foitino mate ka 'pei ki te matafale ke 'kasa ne te la i te ao kae 'siu i te sau i te po.

31Ka fakasala ne au a koe mo tino i tou gafa, mo au ofisa, ona ko agasala a koutou katoa ne fai. A koe, mo tino Ielusalema, mo tino Iuta, e seki saga mai lele eiloa ki aku muna polopoloki ki a koutou, tela la, ka aumai ne au ki a koutou katoa a te mala tela ne folafola ne au me e fakaoko mai.”

32Tena, ne toe puke aka ne au a te sua peluga pepa, tuku atu ne au ki taku failautusi ko Paluka, kae ne tusi ne ia a mea katoa kola ne fakalau atu ne au ki a ia. Ne tusi ne ia a mea katoa kola ne tusi i te peluga pepa muamua, mo fekau e pau eiloa mo fekau kola ne faipati ne au ke tusi ne ia.