1I te vaitaimi foki eiloa tena, ne masaki malosi te Tupu ko Hesekia, toe itiiti eiloa kae mate. Ne fanatu te pelofeta ko Isaia, te tama tagata a Amota, o asi ki a ia, kae fai atu penei, “A te Aliki ko fai mai ki a koe ke fakatoka faka'lei a mea katoa ke toka, me i a koe se lei tou masaki. Fakatoka i a koe e mate.”
2Ne fuli atu Hesekia ki te pui kae talo penei:
3“Te Aliki, au ne tavini atu eiloa ki a koe mo te fakamaoni, kae ne taumafai faeloa au o fai te mea e manako koe ke fai ne au.” Tena, kae tagi a ia i te fanoanoa.
4Tena ne fakatonu atu te Aliki ki a Isaia
5ke foki atu ki a Hesekia o fai atu ki a ia penei, “Au, te Aliki te Atua o tou tupuga ko Tavita, ko oti ne lagona ne au tau talo kae ko oti foki ne lavea ne au ou loimata; ka toetuku atu ne au e sefulu lima tausaga e toe ola ei koe.
6Ka fakasao ne au a koe mo te fa'kai o Ielusalema mai i te tupu o Asulia, kae ka tumau taku puipuiga ki a Ielusalema.”
7Ne tali atu Isaia, “Ka tuku atu ne au se fakailoga e fakatalitonu ei me ka tausi eiloa ne ia a tena feagaiga.
8I luga i te kakega tela ne faite ne te Tupu ko Aasa, a te Aliki ka faite ne ia se ata o te toe foki ki tua e sefulu 'maga.” Tena, ne foki eiloa te ata ki tua e sefulu 'maga.
9I te leiga a Hesekia mai i tena masaki, ne tusi ei ne ia a te pese o tavaega tenei:
10Au e leake eiloa nei i au ka fano ki te
Lalolagi o tino mate
I te taimi koi malosi ei au,
Ko se ola ei au ki te gataga tonu o toku ola.
11Au e leake eiloa nei me ka se toe lavea ne
Au a te Aliki i te lalolagi o tino ola tenei,
Io me ko so se tino ola ake.
12A toku ola ne oti kae gata,
E pela me se faleie tela ko tapale ki ialo,
Pela me se laugatu tela ko kati keatea mai i te mea laga laugatu.
Au e leake eiloa nei i toku ola ko fakagata ne te Atua.
13I po katoa, au e tagi faeloa i te mae,
E pela eiloa me isi se leona e fatifati ne ia oku ivi.
Au e leake eiloa nei i toku ola ko fakagata ne ta Atua.
14A toku leo ko oko eiloa i te vaivai,
Kae tagi fanoanoa au pela me se lupe.
A oku mata ko vaivai eiloa i te kilokiloga ki te lagi.
Te Aliki, fakasao mai au mai i fakalavelave katoa konei.
15Ne a aku pati e tau o fai? Ko oti ne fai ne te Aliki a te mea tenei.
A toku fatu ko mae, ko se mafai o to taku moe.
16Te Aliki, au e ola mō koe, mō koe fua tokotasi;
Fakalei toku masaki kae tuku mai au ke ola.
17A toku mae ka fuli ki te filemu
E fakasao ne koe toku ola mai i mea faigata katoa;
E fakamagalo foki ne koe agasala katoa.
18E seai se tino i te lalolagi o tino mate
E mafai o tavae ne ia koe;
A tino mate e se mafai o talitonu ki tou fakamaoni.
19Ko tino ola e tavae atu ki a koe,
E penei mo au tenei e tavae atu ki a koe.
A tamana e fai ki olotou fanau i a koe e fakamaoni.
20Te Aliki, ne fakalei ne koe toku masaki.
Ka ta omotou kitala kae usu ou vikiga,
E usu ne matou ou vikiga i tou Faletapu
I aso katoa o omotou olaga.
21A Isaia ne fai ki te tupu ke tuku te sua o te mati ki luga i tena fakafoa, kae ka lei a ia.
22Tena, kae fesili atu te Tupu ko Hesekia penei, “Se a te fakailoga e iloa ei ne au me e mafai eiloa au o fano ki te Faletapu?”
Who We AreWhat We EelieveWhat We Do
2025 by iamachristian.org,Inc All rights reserved.
