IOPU 41 - Tuvalu Revised Bible

1 Sala 74.14; 104.26; Isa 27.1 E a, e mafai ne koe o faka'lave a Leviatana ki se kafilo io me sai tena laulaufaiva ki se lopu?

2E mafai ne koe o sele ona muagutu io me fakalave ona kauvae ki se kafilo?

3E mata e fakamolemole mai a ia ke tuku atu a ia ke fano?

E mata e fakamolemole mai a ia ki a koe ke atafai atu koe ki a ia?

4E mata e mafai o fai mai ke fai se feagaiga a koulua,

Kae tauto mai ke tavini mai a ia mō koe ki te se gata mai?

5E mata e sai ne koe a ia e pela me se manu eva fakalata,

Pela me se mea e fakafiafia ei au tavini fafine?

6E mata ka fakatau manako a tino Fai-ika ki a ia?

E mata e selesele a ia ne tino fai mea togi ko te mea ke togi atu ki tino?

7E mafai ne koe o velovelo tena pakili ke fonu i tao,

io me sana tena ulu ki te matasana lasi?

8E tasi eiloa te taimi e fakapatele ei koe ki ei,

Ko koe eiloa ko se toe fia fepaki ki ei;

Ka se toe puli eiloa i a koe te lua fepakiga tena.

9So se tino e lavea ne ia a Leviatana ka galo tena loto toa kae siga ki lalo i te laukele.

10Kafai e fakagasue ne se tino, ko ia eiloa ko kaitaua;

E seai se tino e mafai o tu i ona mua.

11Ko oi te tino e mafai o fai taua atu ki a ia kae e sao eiloa?

E seai eiloa se tino i te lalolagi e mafai o fai ne ia te mea tena.

12Ke fakamatala atu ne au a te lasi o vae o Leviatana,

Kae fakamatala atu foki ne au te lasi o tena malosi.

13E seai se tino e mafai o fakapu ne ia tena pakili io me fakamasei te gatu tau tena e pei ei a ia.

14Ko oi te tino e mafai ne ia o fai ke fakamaga tena gutu tela e fonu i nifo fakamataku?

15A tena tua ne faite ki laina o talita, kola ne sai fakatasi kae ko makeke eiloa pela me ne fatu.

16A talita takitasi e moe faii eiloa i tena tua, tela ko seai se matagi e mafai o sao i te va.

17A talita kona e sai fakatasi katoa eiloa, tela la,

Seai eiloa se mea e mafai ne ia o futi ke 'to keatea.

18E 'lapa te mainaga manafai e mafatua a ia,

Ka ko ona mata ko gasolo o maina pela mo te la ko fanake.

19E 'ka mai te ulaga afi mai i tena gutu,

Mo kalokaloafi e eva mai i tena gutu.

20A te au e 'pusa mai fua i ona puisu, e pela mo te au o te afi mai i mouku kola e tafu i lalo o te ulo.

21A tena manava e kamata mai i ei te ulaga o te afi;

A te ulaga afi ko vau ki tua mai i tena gutu.

22A tena ua, ko oko eiloa i te malosi, tela la,

A tino kola e fetaui mo ia ka mataku.

23E seai eiloa se koga i tena pakili e vaivai;

A tena pakili e makeke katoa pela me se fiti.

24A tena fatu makeke e se lagona ne ia te mataku,

E makeke eiloa e pela me se fatu solo saito.

25Kafai ko tu a ia ki luga, a tino katoa ko mataku katoa,

Ke oko foki eiloa ki tino malosi ko oko eiloa i te lotou mataku, ko se mafai o fai se mea.

26E seai se pelu e mafai o fakapakia a ia, e seai se tao,

io me se matasana, io me se tao velo e mafai o fakapakia ei te manu tena.

27A te fiti ki a ia e pela fua me se kau saito i te gavalivali,

Ka ko te palasi ki a ia e malulu fua pela me se lakau pala.

28E seai se matasana e mafai o mataku ki ei a ia;

A fatu lasi kola e peipei ki a ia e pela fua me ne potu mea o kau saito.

29A te lakau pago ki a ia, e pela fua me se potu mea o te kau saito,

E katakata a ia manafai e velovelo atu a tao a tagata.

30A unafi i tena tinae e pela me ne matifiga o tiā kele;

E sua ne latou a te laukele pelapela e pela me se mea tofa saito.

31E fakagasue ne ia te tai ke pela me se vai e 'puna kae fai ke punapuna pela me se ulo sinu.

32E fano i mua, ka ko i ona tua e pela me se auala gali kae e fuli foki ne ia te tai ke liu tapiaga kena.

33E seai se mea i te lalolagi nei e fakatusa ki ei;

A ia se manu e seai se mataku i ei.

34Ke oko foki eiloa ki te toe manu fakamatamata eiloa e se taua i tena kiloga;

A ia ko te tupu o manu katoa o te vao.