SALAMO 146 - Tuvalu Revised Bible

Ko Tavaega o te Atua te Fakaola

1Viki atu koutou ki te Aliki!

Toku agaga, viki atu ki te Aliki!

2Ka viki au ki a ia i aso katoa e ola ei au;

Ka pese au ki toku Atua i aso katoa o toku olaga.

3Sa fakalagolago ki tino takitaki o te olaga nei;

Me seai se tino ola e mafai o fakaola ne ia a koe.

4Kafai e 'mate latou, e toe foki atu olotou foitino ki te laukele;

i te aso tena, ka fakagata ei olotou fuafuaga katoa.

5Amutia a te tino tela e maua ne ia te fesoasoani o te Atua o Iakopo,

Kae fakalagolago ki te Aliki tena Atua,

6 Galu 4.24; 14.15 Ko ia tela ne faite ne ia te lagi, te lalolagi mo te tai,

Mo mea katoa i ei.

E fakamaoni faeloa a ia ki ana feagaiga;

7E fai ana fakamasinoga mo te alofa ki tino puapuagatia,

Kae e tuku atu ne ia a meakai ki tino fia'kai.

E fakasaoloto ne te Aliki a pagota,

8Kae fakapula ne ia a mata o tino 'kivi.

Ka fakatu aka ne ia a latou kola e pakū ki lalo;

E alofa a ia ki ana tino amiotonu.

9E puipui ne ia tino fakaalofa kola e nofo i te 'tou fenua;

E fesoasoani a ia ki fafine ko mate olotou avaga mo tamaliki seai ne matua,

Kae fakaseaoga ne ia a fuafuaga a tino amio ma'sei.

10A te Aliki ko te tupu ki te se gata mai.

Siona, a tou Atua ka tupu i taimi katoa.

Viki atu koutou ki te Aliki!