2 KOLINITO 7 - Tuvalu Revised Bible

1Taina fagasele, ona ko te mea ko maua ne tatou a folafolaga a te Atua, ke faka'ma la tatou mai feitu kola e fakamasei ne latou te foitino mo te agaga, ka ke ola tatou i te olaga tapu katoatoa mo te mataku ki te Atua.

Ko te Fiafia o Paulo

2Tuku mai otou loto ki a matou. E seki faka'se ne matou se tino, me fakamasei, io me takolekole.

3E se fai atu ne au a te mea nei o fakamasei ei koutou; e pela eiloa mo aku pati ko oti ne fai atu muamua, me pele koutou i omotou loto, e pena foki matou ki a koutou, me ko te tou 'mate io me ko te tou ola fakatasi.

4E talitonu toku loto katoa ki a koutou; ko lasi foki toku fakamatamata ona ko koutou, me ne fakafiafia mai koutou ki a au i oku puapuaga katoa.

5 2Koli 2.13 E oko foki eiloa ki te motou okoga ki Maketonia, e seai eiloa se taimi ne malo'lo ei matou. E uke mea faigata i koga valevale, ne kinau matou mo nisi tino ne ma'taku foki matou.

6Ka ko te Atua tela e fakamalosi ne ia a tino loto vaivai, ne fakamalosi ne ia matou i te oko mai o Tito.

7E se ko tona oko mai fua ne ala ei o fia'fia matou, kae pela foki mo tena tala e uiga ki te otou fakamalosi atu ki a ia. Ne fai mai ne ia ki a matou me ko oko eiloa te otou fia fetaui mai ki a au, pela foki mo te otou loto fanoanoa mo te toka o koutou o fakasao au mai mea faigata; tela la, ko na silia atu ei toku fiafia nei.

8Kafai ko taku tusi ne fai ne ia koutou ke fanoa'noa, ka ko au e se fanoanoa i ei. Ne 'tau o fanoanoa au manafai ne iloa ne au me ne fanoa'noa koutou mo se vaitaimi ona ko taku tusi.

9Kae nei, au e fiafia faeloa; e se ki te feitu ki aku faiga ke fanoanoa koutou, kae fiafia au ona ko fai te otou fanoanoa mo ala e salamo ei koutou ki otou agasala. Ne fakaaoga ne te Atua te fanoanoa tena; tela la, e seai foki se mea faka'mae loto ne fai ne matou ki a koutou.

10I te fanoanoa tela e fakaaoga ne te Atua o fuli ne ia a loto o tino o takitaki atu ki te fakaolataga; kae seai se toe fanoanoa e maua i ei! Ka ko te fanoanoa faka te lalolagi, e tupu mai ei te mate.

11Onoono ake me se a te mea ne fai ne te Atua ki te otou fanoanoa; ne fakatupu ne ia i ei te loto finafinau o fakamaonia i a koutou ne tino e se agasala. Ne fai ne ia ke kaitaua koutou, ke fakasala ei ne koutou te tino tela ne agasala. Mai feitu konei ko fakamaonia i ei me e 'ma katoa koutou i ei.

12Tela la, ne seki tusi atu au ona ko te tino tela ne tusi atu ne au e fai ne ia te masei io me ko te tino tela ne fakamaseigina, kae ona ke fakamaina atu ki a koutou i mua o te Atua, te lasi o te otou alofa mo matou.

13Tena te pogai ne loto ma'losi ei matou.

Kae se gata fua eiloa i te motou loto ma'losi, ka ko na silia atu ei te motou fia'fia ki a Tito, i te mea ne fakafilemu ne koutou katoa tona mafaufau.

14Ka koi tuai o fano keatea mai konei, ne faipati fakamatamata au ki a ia e uiga mō koutou, kae i tena okoatuga ki a koutou, ne maua ake ne ia me i mea katoa ne taku atu ne au ki a ia e uiga mo koutou e tonu katoa.

15Ka ko tena alofa mo koutou ko gasolo ake o malosi, i te masaua ne ia te otou fia'fia o faka'logo, e pela foki mo te talia ne koutou a ia i te loto katoatoa.

16Au ko fiafia me ko talitonu katoatoa au ki a koutou!