1 NOFOAIGA TUPU 14 - Tuvalu Revised Bible

Ko Galuega a Tavita i Ielusalema(2Samu 5.11-16)

1Ne uga mai ne te Tupu o Tulo ko Hilamo, a avefekau ki a Tavita ke fai mea togi laua; ne aumai ne ia ki a Tavita a lakau ko alasi mo fatu ko oti ne talai, mo kamuta ke faite te palesi.

2Tena la, ko iloa ei ne Tavita i a ia ko fakamautakitaki ne te Aliki ke fai mo tupu o Isalaelu, kae ko fakamanuia foki ne ia tena malo mo te lei o tena fenua.

3Ne avaga Tavita ki nisi fafine i kona i Ielusalema, tena ne toe fakaopoopo aka foki ana tama tagata mo tama fafine.

4Konei a igoa o ana tamaliki ne fanau i Ielusalema: ko Samua, Sopapa, Natano, Solomona,

5Ipela, Elisua, Elipeleti,

6Noka, Nefeku, Iafia,

7Elisama, Peliata, mo Elifeleti.

Ko te Manumalo i te kau Filisitia(2Samu 5.17-25)

8I te logoga o te kau Filisitia i a Tavita ko fai mo Tupu o Isalaelu katoa, ne olo atu te lotou kautau ke puke fakapagota mai a ia. Tena, ne fanatu ei Tavita o fakafetaui ki a latou.

9Ne oko atu te kau Filisitia ki te Vanu o Lefaima, kamata eiloa o tau.

10Ne fesili Tavita ki te Atua penei, “E a, e fano au o taua ki te kau Filisitia? E mata e aumai ne koe te manumalo?”

Ne tali mai te Aliki, “Fano o taua! Ka avatu ne au te manumalo!”

11Tena la, ne taua atu Tavita ki a latou i Paala Pelasima, fakatakavale eiloa ne ia latou. Muna a ia penei, “A te Atua ko fakaaoga ne ia a au o ofa te kautau a te fili e pela me se lofiaga.” Tena la, ne fakaigoa eiloa te koga tena ko Paala Pelasima.

12I te telega o te kau Filisitia, ne tiaki olotou tupua, kae ne fai te fakatonuga a Tavita ke ave katoa o sunu.

13E seki leva kae toe foki mai a te kau Filisitia ki te vanu, toe kamata foki o ta a tino i kona kae fao olotou mea.

14Ne toe kalaga Tavita ki te Atua, kae tali mai te Atua, “Sa taua atu ki a latou mai i te feitu tenei, kae olo o taua mai i te sua feitu, i tafa o lakau ko palosami.

15Kafai ko lagona ne koutou te leo e pela me ne tino e sasale i taulu o lakau, ko koutou eiloa ko taua atu ki a latou, me i a au ka fanatu i otou mua o fakatakavale te kautau a Filisitia.”

16Ne fai eiloa ne Tavita a te mea ne fakatonu mai ne te Atua, tena ne afuli atu eiloa ne ia a te kau Filisitia mai i Kipeona, ke oko atu eiloa ki Kesela.

17Ne salalau te igoa o Tavita i koga katoa, ka ko te Aliki ne fai ne ia a malo katoa ke ma'taku ki a ia.