LEVITIKO 23 - Tuvalu Revised Bible

Ko 'Kaiga Faka‐te‐Lotu

1Ne tuku mai ne te Aliki ki a Mose

2a fakatonuga konei e uiga ki faiga o 'kaiga faka‐te‐lotu, i te taimi e maopoopo ei a tino Isalaelu mo tapuakiga.

3Eso 20.8-10; 23.12; 31.15; 34.21; 35.2; Teu 5.12-14 E ono aso e fai ei otou galuega, kae masaua i te fitu o aso, tela ko te Sapati, se aso malolo. I te aso tena e seai ne galuega e fai, kae e tau koutou o maopoopo o fai otou tapuakiga. A te Sapati e o te Aliki, faitalia me tefea te koga e nofo koe i ei.

4Fakasalalau atu a 'kaiga fiafia konei i taimi tonu e fakamanatu ei.

Ko te Paseka mo Falaoa se Faka'fete(Nume 28.16-25)

5 Eso 12.1-13; Teu 16.1,2 A te Kaiga o te Paseka, tela e fakaaloalo atu ei ki te Aliki, e kamata i te taimi e to ei te la i te po sefulu fa o te masina muamua.

6Eso 12.14-20; 23.15; 34.18; Teu 16.3-8 I te po sefulu lima e kamata ei te Kaiga o Falaoa se Faka'fete; e fitu aso e tapu se tino e kai ki se falaoa ne palu ki se mea faka'fete.

7I te aso muamua o aso konei, e tau mo koutou o maopoopo mo tapuakiga kae mo a e fai ne otou galuega i otou kaiga.

8Ofo atu otou taulaga meakai ki te Aliki i aso e fitu. I te fitu o aso ko toe maopoopo mai ei koutou mo tapuakiga, kae ke mo a e fai ne otou galuega i otou fale.

9-10Kafai ko oko mai koutou ki te fenua tenei ka tuku atu ne te Aliki mō koutou, i te taimi e kati ei otou saito, masaua o ave a te saitaga saito muamua ki te faitaulaga.

11Ka ofo atu ne ia ke fai mo taulaga fakapitoa ki te Aliki, ko te mea ke talia ne ia koutou. A te taulaga tena e ofo atu ne te faitaulaga i te aso mai tua o te Sapati.

12I te aso e ofo atu ei ne koutou te taulaga saito, masaua o ofo atu foki se tamā mamoe tagata ko tasi tena tausaga kae seai se pona.

13Fakatasi atu ki te mea tena, ofo atu foki e lua kilokalame o falaoa ne palu ki sinu olive ke fai mo taulaga meakai, ko te manogi o te taulaga tena e fiafia ki ei te Aliki. E tau foki o ofo atu e tasi te lita uaina ke fakatasi atu ki mea kona.

14E tapu se tino e kai ki saito fou kona, me e kai mata ne ia, me e tao ke liu falaoa, vagana ke oti ne avatu te taulaga tena ki te Atua. A te fakatonuga tenei e tau o tausi ne tino katoa o tou gafa i taimi katoa fakamuli.

Ko te 'Kaiga Fiafia o te Katiga o Saito(Nume 28.26-31)

15 Eso 23.16; 34.22; Teu 16.9-12 Lau faka'lei e fitu a vaiaso, e kamata mai i te aso i tua o te Sapati tela ne ofo atu ei ne koe tau fusi saito ki te Aliki.

16I te limasefulu o aso, te aso e tuakoi ki te fitu o Sapati, toe ofo atu ki te Aliki se taulaga saito fou.

17E tau mo kaiga takitasi o aumai se avā puta falaoa o tuku atu ke fai mo meaalofa fakapitoa ki te Aliki. A te puta e tasi e tau o lua kilokalame o te falaoa e palu ki te isi, kae e tau o tuku atu ki te Aliki ke fai mo taulaga o te saito muamua i saito o te taukai.

18Fakatasi atu ki te falaoa tenei, e tau o ofo atu ne te fenua e fitu tamā mamoe ko takitasi tausaga, e tasi te pulumakau tagata, kae lua kouti, kae ke seai katoa ne olotou pona. E tau o ofo atu a manu kona ke fai mo taulaga meakai ki te Aliki, fakatasi mo te taulaga saito mo te taulaga sunu. Ko te manogi o te taulaga tenei e fiafia ki ei te Aliki.

19Ofo atu foki se kouti tagata ke fai mo taulaga mo agasala kae e lua tamā mamoe tagata ko takitasi tausaga ke fai mo taulaga fakafetai.

20Ka ofo atu ne te faitaulaga a te falaoa mo te avā tamā mamoe ke fai mo meaalofa fakapitoa ki te Aliki kae puke ma faitaulaga. A taulaga konei e 'malu.

21I te aso tena e seai ne galuega a koutou e fai, kae maopoopo o fai tapuakiga. Ko tino Isalaelu e tau o tausi ki fakatonuga konei i taimi katoa fakamuli, faitalia te koga e nofo ei latou.

22 Levi 19.9,10; Teu 24.19-22 Kafai ko kati otou fatoaga, sa kati a saito i tafatafa o otou fatoaga; sa foki ki tua o kati a saito kola ne tiakina. Tuku a mea kona ma tino ma'tiva mo tino fakaalofa. A te Aliki ko te otou Atua.

Ko te 'Kaiga Fiafia o te Tausaga Fou(Nume 29.1-6)

23-24A te po muamua o te fitu o masina ke fakamanatu ne koutou me se aso malolo taua, kae ke maopoopo mai koutou ki faigā tapuakiga manafai ko tagi mai te pu.

25Ofo atu se taulaga meakai ki te Aliki, kae sa fai galuega o te aso.

Ko te Aso o te Fakamaga(Nume 29.7-11)

26-27 Levi 16.29-34; Nume 29.7-11 I te po sefulu o te fitu o masina ko te aso e fai ei te sauniga faka te lotu o te tausaga, e faka'ma ei a agasala a te fenua. I te aso tena e tapu se tino e kai, kae maopoopo katoa mō tapuakiga, kae ofo atu se taulaga meakai ki te Aliki.

28Sa fai ne galuega i te aso tena me ko te aso e fai ei te sauniga o te fakamaga o agasala.

29So se tino e kai i te aso tena ka se taku se tino o te fenua o te Atua.

30So se tino e galue i te aso tena, ka tamate ne te Aliki.

31A te fakatonuga tenei e fakasino ki tino katoa e tupu mai i a koutou, faitalia me tefea te koga e nofo ei latou.

32Mai te taimi e to ei te la i te po iva o te masina ke oko ki te taimi e to ei te la i te po sefulu, ko te aso tena e tau o fakamanatu ne koutou me se aso malolo, se aso e se tau mo koutou o kai ki se meakai.

Ko te 'Kaiga Fiafia o Fale Fakamalumalu(Nume 29.12-40)

33-34 Teu 16.13-15; Ioa 7.2; Esela 3.4; Eso 23.16; Nume 29.12; Saka 14.16 A te 'Kaiga Fiafia o Fale Fakamalumalu e kamata i te po sefulu lima o te fitu o masina kae e tusa mo te fitu o aso e fai ei.

35I te aso muamua o aso konei, e tau mo koutou o maopoopo o fai tapuakiga kae mo a e fai ne otou galuega.

36I aso takitasi o aso konei e fitu, e tau o ofo ne koutou ne taulaga meakai. I te valu o aso ko toe maopoopo fakatasi ei koutou o fai tapuakiga kae ofo atu se taulaga meakai. A te aso tena se aso fai tapuakiga, tela la, seai ne galuega e tau o fai.

37(Kona a kaiga fiafia faka-te-lotu kola e fakaaloalo ei ne koutou te Aliki i taimi e maopoopo ei koutou o fai tapuakiga kae ofo atu mo taulaga meakai, taulaga sunu, taulaga saito, taulaga manu, mo taulaga uaina i aso takitasi.

38A 'Kaiga fiafia konei e fakaopoopo ki Sapati i vaiaso takitasi, ka ko taulaga konei e fakaopoopo ki meaalofa a koutou kola e masani o fai sale, pela foki ki otou taulaga e fakataunu ei otou feagaiga mo otou taulaga o te loto malie kola e tuku atu ne koutou ki te Aliki.)

39Kafai ko oti ne kati otou fatoaga saito, masaua o fakamanatu te 'kaiga fiafia tena i aso e fitu, e kamata i te po sefulu lima o te fitu o masina. A te aso muamua se aso e fakakese, e malolo koutou i ei.

40I te aso tena, puke mai a fuaga lakau tafasili i te lei mai otou fatoaga, puke mai foki ne kaula o pama mo kaula o lakau fai lau, ko kamata ei se 'Kaiga Fiafia Faka‐te‐Lotu e fakaaloalo ei ki te Aliki te otou Atua.

41Fakamanatu te 'kaiga tena i aso e fitu. A te fakatonuga tena e tau o tausi ne tino e tupu mai i a koutou i taimi katoa fakamuli.

42A tino Isalaelu katoa e tau o nofo i fakamalumalu i aso e fitu,

43ko te mea ke iloa ne otou fanau fakamuli me ne fakanofo ne te Aliki a tino Isalaelu i fakamalumalu i te taimi ne taki mai ei ne ia latou keatea mo Aikupito. A ia ko te Aliki te otou Atua.

44E pena te tukuatuga ne Mose ki tino Isalaelu a fakatonuga mo te fakamanatuga o 'Kaiga Fiafia Faka‐te‐Lotu e fakaaloalo ei ki te Aliki.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help