ISAIA 19 - Tuvalu Revised Bible

Aikupito ka Fakasala ne te Atua

1 Iele 46.2-26; Eseki 29.1—32.32 Tenei te fekau e uiga ki a Aikupito. A te Aliki ka vau ki Aikupito, e sopo mai i luga i te kaumana. A tupua o Aikupito e polepole i ona mua, mo tino Aikupito foki ko oko eiloa i te mataku i ona mua.

2Muna a te Aliki, “Ka fai ne au te malo o Aikupito ke fakatau taua i a latou eiloa, ko taina ki taina, pela foki tuakoi ki tuakoi. A fa'kai kola e fai fili ka taua, pena foki a tupu kola e fai fili ka fakatau taua.

3Ka fakaseaoga ne au a fuafuaga a tino Aikupito, kae ofa foki ne au te tulaga lei mo te loto toa o tena kautau. Ka kalaga latou ki olotou tupua ke fesoasoani atu ki a latou; e olo foki ki tino fakatu agaga o fesili ki agaga o tino mate ki se fesoasoani.

4Ka tuku atu ne au Aikupito ke pule ne se tupu saua. Ko au, te Aliki Malosi, tena ne faipati atu.”

5A te vai i te Naila ka matuku ifo ki lalo, ko te mea eiloa ko masa pakupaku.

6Ka manogi masei a magā vai o te vaitafe i te taimi tela ka fanaifo ei o masa pakupaku. A mouku mo lakau i te vaitafe ka mage,

7mo lakau kaina katoa kola e toki i tafatafa o te Naila ka pakupaku, kae agina keatea.

8A tino katoa kola e ola i te Fai-ika i te Naila ka tagi; a olotou kafilo mo tili ka se aoga.

9A tino kola e faite laugatu lino ka fanoanoa;

10a tino fai mea laga mo tagata apo i galuega ka mafatia kae fanoanoa.

11A takitaki o te fa'kai ko Soani ne tino valea fua! A manatu fesoasoani kola e fai mai ne tino poto eiloa o Aikupito ne manatu valea! E pefea eiloa o fai atu latou ki te tupu i a latou ko sui o tino poto mo tupu taumua?

12Te tupu o Aikupito, ko fea au tino fakatonutonu poto? E se taumate kaati e mafai ne latou o fakaasi atu a fuafuaga a te Aliki Malosi e uiga mo Aikupito.

13A takitaki o Soani mo Mefisi ne tino valea fua. Ne tau o takitaki faka'lei ne latou a te malo, kae tela la, ne taki 'se fua ne latou.

14Ko te Aliki ne fai ne ia ke tuku atu ne latou a manatu fesoasoani kola e numi valevale. Tela la, a mea katoa e fai ne Aikupito e 'se katoa, kae ko takasese atu foki eiloa a ia e pela me se tino kona tela e 'mole atu i luga i ona luaga.

15E seai eiloa se tino i Aikupito e mafai o fesoasoani atu ki ei, me se tino maumea io me se tino mativa, me se tino takutakua io me se tino se takutakua.

Aikupito ka Tapuaki ki te Aliki

16I se aso mai mua nei, a tino o Aikupito ka mata mataku pela me ne fafine. Ka polepole latou i te mataku manafai ko lavea ne latou a te Aliki Malosi ko fola mai tena lima o fakasala latou.

17A tino Aikupito ka mataku faeloa i a Iuta i taimi katoa e fakamasaua atu ei ki a latou a te ikuga tela ko oti ne fakatoka ne te Aliki Malosi mō latou.

18Kafai e oko mai te taimi tena, a fa'kai e lima o Aikupito ka faipati ki te gana Epelu. A tino i kona ka fai olotou tautoga i te igoa o te Aliki Malosi. E tasi te fa'kai o fa'kai kona ka fakaigoa ko te “Fa'kai o te La.”

19Kafai e oko mai te aso tena, ka isi se fata-fai-taulaga mō te Aliki i te fenua o Aikupito, mo te pou fatu tela ne fakatapu ki a ia i te tuakoi o Aikupito.

20A mea kona ka fai mo fakailoga i te Aliki Malosi e nofo i Aikupito. Kafai ko fakasauagina a tino i kona, kae e kalaga ki te Aliki ke fesoasoani atu, ko uga mai ei ne te Aliki se tino ke vau o fakasao latou.

21A te Aliki ka fakasae atu ki tino Aikupito, tena la, ka talia ne latou a Ia kae tapuaki atu ki a Ia, kae aumai foki olotou taulaga ki a ia. Ka fai olotou tautoga malu ki a ia, kae fai foki ne latou a mea kola ne tauto latou o fai.

22A te Aliki ka fakasala ne Ia a tino Aikupito, ka oti ko toe fakasao foki ei ne ia latou. Ka fuli mai latou ki a Ia, kae ka lagona ne Ia olotou talo, ko fakasao ei ne Ia latou.

23Kafai e oko mai te taimi tena, ka isi se auala lasi mai i Aikupito ki Asulia. A tino o fenua kona e lua ka olo sale i te auala tena, kae ka tapuaki fakatasi a malo kona e lua.

24Kafai e oko mai te taimi tena, a Isalaelu ka tulaga fakatasi mo Aikupito mo Asulia, kae ka fai a malo kona e tolu mo fakamanuiaga ki te lalolagi katoa.

25A te Aliki Malosi ka fakamanuia ne ia latou, kae fai atu penei, “Aikupito, toku fenua, ka fakamanuia ne au a koe, pena foki koe e Asulia tela ne faite ne au, mo koe e Isalaelu, toku fenua filifilia.”