NEEMIA 1 - Tuvalu Revised Bible

1Tenei te tala o Neemia, te tama tagata a Hakalia, mo ana mea ne fai.

Ko te Alofa o Neemia mo Ielusalema

I te masina o Kisilevu, i te luasefulu o tausaga o te nofoaiga a Aletaseta te tupu o Pelesia, ka ko au, ko Neemia, e nofo i Susa, te laumua o te fa'kai.

2A toku taina e toko tasi ko Hanani ne o'mai mo nisi tino mai i Iuta, kae ne fesili au ki ei me e a Ielusalema, pela foki mo taina Iutaia kola ne foki mai i te tafeaga i Papelonia.

3Ne fai mai latou kona, me i tino Iutaia kola ne foki mai i te tafeaga kae ko nofo nei i te lotou fenua ko oko eiloa i te puapuaga, ka ko tino fakaatea foki kola e nofo tasi latou e kilo mo te fakatauemu ki a latou. Ne fai mai foki a latou ki a au, i pui o Ielusalema koi maofa eiloa, mo mataloa foki o te fa'kai e seki toe faite eiloa talu mai te taimi ne sunu ei.

4I taku logoga i mea kona, ne sagasaga ifo au ki lalo kae tagi.

E fia eiloa aso ne tagi fanoanoa ei au kae seki kai eiloa. Ne talo au ki te Atua, aku muna,

5“Te Aliki te Atua o te lagi! A koe se Atua tafasili i te maluga, tela la, matou e nofo mo te ma'taku ki a koe. A koe e tausi fakamaoni eiloa ki tau feagaiga mo tino kola e alofa ki a koe, kae tau'tali i au fakatonuga.

6Te Aliki, kilo alofa mai ki a au, kae fakalogo mai ki aku talosaga i ao mo po mō au tavini ko tino Isalaelu. Au ko fakatoese atu e tusa mo te agasala ko oti ne fai ne matou, te fenua o Isalaelu. A au mo oku tupuga ko oti ne agasala ki a koe.

7Ne fai ne matou a uiga se 'lei i ou mua, kae seki fai ne matou au fakatonuga. E seki tausi foki ne matou a tulafono kola ne tuku mai ne koe ki a matou e auala i tau tavini ko Mose.

8Levi 26.33 Masaua ne koe au muna ne fai ki a Mose penei: ‘Kafai e se fakamaoni mai koutou tino Isalaelu ki a au, kae ka fakasalalau ne au koutou i malo kesekese.

9Teu 30.1-5 Kae kafai e toe fuli mai koutou ki a au, kae tautali i aku fakatonuga, ka toe aumai ne au koutou ki te koga ne filifili ne au ke tapuaki mai a tino ki a au, tiga eiloa koutou e nofo salalau i feitu valevale o te lalolagi.’

10“Te Aliki, mea nei ko au tavini, ko ou tino tonu. Ne fakasao ne koe latou i tou 'mana mo tou malosi.

11Fakalogo mai nei ki taku talo mo talosaga a nisi o au tavini kola e fakaaloalo ki a koe. Tuku mai te manuia ki a au i te aso nei, kae fai ne koe te tupu ke alofa mai ki a au.”

I aso mua, au se tino ligiligi uaina a te tupu.