ESEKIELU 7 - Tuvalu Revised Bible

Ko Pili mai te Gataga o Isalaelu

1A te Aliki ne faipati mai ki a au,

2ana muna, “Te tagata ola, konei aku muna e fai atu ki te fenua o Isalaelu, ko au ko te Aliki Sili: Tenei te gataga o te fenua katoa!

3“Isalaelu, te gataga ko pili mai. Ka fakalogo koe ki te mae o toku kaitaua, me ko fakamasino nei ne au a koe ona ko au mea ne fai. Ka taui atu ne au ki a koe, e tusa eiloa mo amioga masei a koe ne fai.

4Ka se fakasao eiloa ne au a koe, se alofa lele foki eiloa au ki a koe. Ka fakasala ne au a koe ona ko amioga masei a koe ne fai, ko te mea ke iloa ne koe i a au ko te Aliki.”

5Konei a muna a te Aliki Sili, “A puapuaga ka soko eiloa te oko mai ki luga i a koe.

6Ko palele. Tenei te gataga. A koe ko se aoga.

7A te gataga ko pili o oko mai ki a koutou kona e nofo i te fenua. Ko pili mai te taimi e se toe ai ei ne fakafiafiaga i faletapuaki i luga i mauga, na ko te numi valevale fua.

8“E se leva nei, kae ka lagona ne koutou a te malosi katoatoa o toku kaitaua. Ko fakamasino nei ne au koutou ona ko otou mea ne fai, kae ka taui atu eiloa ne au ki a koutou e tusa eiloa mo otou amioga masei ne fai.

9Ka se faka'sao eiloa ne au koutou, se alofa foki eiloa au ki a koutou. Ka fakasala ne au koutou ona ko otou amioga masei ne fai, ko te mea ke iloa ne koutou i a au ko te Aliki, kae ko au e fakasala ne au koutou.”

10A te aso o te puapuaga o Isalaelu ko pili o oko mai. A te fakasauaga ko oko eiloa i te fai malosi. A te fakamatamata ko se fakatau eiloa.

11A te fakasauaga e fua mai ne ia a te amio masei ke lasi. E se toe ai se mea lei a latou e toe, seai ne koloa, seai se gali, seai se 'malu.

12Ko pili mai te taimi. Ko pili mai te aso e se toe ai ei se aoga o te togi maiga o mea kae toe fakatau atu, me i te fakasalaga a te Atua e paku ki luga i tino katoa.

13E se toe ai se tino fai mea togi e ola i se taimi leva, ke oko ki te taimi e toe maua ei ne ia ana mea ne galo, me i te kaitaua o te Atua e i luga i tino katoa. A tino masei e se mafai o sao.

14Kafai e tagi te pu, a tino katoa ko fakatoka katoa. Kae e seai eiloa se tino e fano ki te taua, me i te kaitaua o te Atua ka paku ki luga i tino katoa.

Ko te Fakasalaga o Isalaelu

15A auala ko fonu i tino e taua, mo fale ko fonu i tino masaki kae mate fiakai. A tino i tua o te fa'kai ka mate i te taua, ka ko tino i loto i te fa'kai ka mate i te famai mo te fiakai.

16A nisi ka sola ki mauga e pela me ne lupe kola ne tele mai vanu i te mataku. A latou katoa ka tagi fita ona ko olotou agasala.

17A lima o tino katoa ka vaivai, mo olotou tuli ka polepole.

18Ka pei latou ki gatu lautaga, kae polepole olotou foitino. A olotou ulu ka vele, kae ka masiasi katoa latou.

19Ka pei keatea olotou aulo mo siliva i auala e pela me ne kaiga, me e se mafai ne aulo mo siliva o fakasao latou i te taimi ko fakaoko mai ei te kaitaua o te Aliki. E se mafai o fakaaoga ne latou a aulo mo siliva o fakamalie ei olotou manakoga, io me fakamakona ei olotou tinae. Ko aulo mo siliva ne takitaki ei latou ki te agasala.

20Ne fakamatamata latou i taimi mua i olotou fatu taua gali, kae ne fakaaoga ne latou o faite ki ei olotou tupua masei. Tena te pogai ne fai ei ne te Aliki a latou ke takalialia i olotou koloa.

21Muna a te Aliki, “Ka fai ne au a tino o fenua fakaatea ke o'mai o 'ta kae fao olotou mea, ka ko tino masei ka puke ne latou a olotou koloa katoa kae fakalailai i feitu fakatapuakiga.

22Kafai ko o'mai a tino faomea ki loto i toku Faletapu fakapelepele, o fakalailai ne latou i feitu fakatapuakiga, ka ko au e se fia saga eiloa ki ei.

23“A mea katoa ko numi valevale — a te fenua ko fonu i tino tatino, mo fa'kai ko fonu i te fakasaua.

24Ka aumai ne au te toe malo amio masei eiloa ki konei, ke puke mo latou a otou fale. A tagata mafi eiloa a koutou ka mataku manafai ko fai ne au a malo ki o'mai o fakalailai a otou koga tapuaki.

25A te loto fanoanoa ko pili mai. Ka salasala koutou ki te filemu kae ka se mafai o maua ne koutou.

26Ka taotaomaki eiloa a puapuaga, mo tala se fakafiafia loto ka oko mai faeloa. Ka fakamolemole koutou ki pelofeta ke fakaasi a mea e lavea mao ne latou. Ka seai ne mea e mafai o akoako ne faitaulaga ki tino, mo toeaina ka seai ne manatu fakatonutonu o latou e mafai o fai atu ki tino.

27A te tupu ka tagi fanoanoa, te pelenise ka seai sena fakamoemoega lei, mo tino ka polepole i te mataku. Ka fakasala ne au koutou e tusa eiloa mo otou mea ne fai, kae fakamasino koutou e pela eiloa mo te fakamasinoga ne koutou a nisi tino. Tena la, ka iloa ei ne koutou i a au ko te Aliki.”