LEVITIKO 5 - Tuvalu Revised Bible

Ko Taulaga mo te Fakamagaloga o Agasala

1Konei a feitu e tau ei o ofo atu a taulaga mo te fakamagaloga o agasala. Kafai se tino ne manakogina mai te fono tulafono ke molimau i te fono kae se fakaasi ne ia a te mea ne lavea io me ne lagona ne ia, ka maua a ia ne se fakasalaga.

2Kafai se tino ne puke ki se mea lailai, pela mo te manu mate, kae se ko tena loto ke puke a ia ki ei; ko taku a ia se tino se 'ma kae ko se foki a ia, i te taimi ne iloa ake ei ne ia tena mea ne fai.

3Kafai se tino ne patele ki so se mea masei o te tino mo te se iloa, e agasala a ia i te taimi eiloa ko iloa ei ne ia a tena mea ne fai.

4Kafai se tino ne sona fai tena tautoga, ki so se mea, e agasala a ia i te taimi eiloa ne iloa ne ia tena mea ne fai.

5Kafai se tino ko agasala, e tau mo ia o fakaasi tena agasala;

6ko te taui la o tena agasala, e tau mo ia o aumai se mamoe fafine io me se kouti fafine mo fai tena taulaga ki te Aliki. Ka ofo atu ne te faitaulaga te taulaga a te tagata tena e agasala mo te fakamagaloga o ana agasala.

7Kafai e se maua se mamoe io me se kouti a te tino, e tau o aumai ne ia ki te Aliki se ava lupe io me se ava tamā lupe e togi ei ana agasala. E tasi ke fai mo taulaga mo te fakamagaloga o agasala, kae tasi ke fai mo taulaga sunu.

8Ka aumai ne te tagata tena a manu eva kona ki te faitaulaga tela ka ofo mua ne ia a te manu eva mo te fakamagaloga o agasala. Ka mio ne ia te ua o te manu eva kae ke mo a e unu ne ia keatea,

9ko apiapi atu ei ne mu toto ki te feitu o te fata-fai-taulaga. A te toega o te toto ke ligi ki te feitu ki lalo o te fata-fai-taulaga. A te mea tena se taulaga mo te fakamagaloga o agasala.

10Ka oti ko toe ofo atu foki ei ne ia a te sua manu eva mo fai te taulaga sunu, e pela eiloa mo te tulafono. E pena te taulaga e ofo atu ne te faitaulaga mo te fakamagaloga o agasala a te tagata tena, ko magalo ei a ia.

11Kafai e se mafai o maua ne te tino se ava lupe io me ne tamā lupe e lua, e mafai o aumai ne ia e tasi te kilokalame o falaoa, mo fai tena taulaga mo te fakamagaloga o ana agasala. E se tau o ligi ne ia ne sinu olive ki te falaoa, io me ne mea fakamanogi, me i te mea nei se taulaga mo te fakamagaloga o agasala, kae se se taulaga saito.

12Ka aumai ne ia a te falaoa ki te faitaulaga, tela ka āsu ne ia ne mu falaoa ki tena lima, e fakailoga ei me ko oti katoa ne ofo atu ki te Aliki, ko sunu ei ne ia i luga i te fata-fai-taulaga ke fai mo taulaga meakai. A te mea tena se taulaga mo te fakamagaloga o agasala.

13E pena te taulaga e ofo atu ne te faitaulaga mo te fakamagaloga o agasala a te tagata tena, tena ko magalo ei a ia. A te toega o te falaoa e puke ma te faitaulaga, e pela eiloa mo te faiga i taulaga saito.

Ko Taulaga e Toe Togi atu ei te Agasala tela e seki Togi

14Konei a tulafono ne tuku atu ne te Aliki ki a Mose.

15Kafai e agasala a te tino me e seki togi atu ne ia a lafoga taua ki te Aliki, e tau o aumai ne ia ki te Aliki se mamoe tagata io me se kouti e sui ei te lafoga tela e seki togi ne ia. A tena togi e fua eiloa ki te fua faka‐te‐malo.

16E tau o togi ne te tino a te lafoga tela e seki togi ne ia kae fakaopoopo atu ki ei a te luasefulu pasene. E tau o tuku atu ne ia ki te faitaulaga, kae ka ofo atu ne te faitaulaga a te manu mo te fakamagaloga o agasala a te tagata tena, tena ko magalo ei a ia.

17Kafai se tino ne agasala me ne ofa ne ia se fakatonuga a te Aliki mo te se iloa, e agasala eiloa a ia, tela la, e tau eiloa o togi ne ia tena fakasalaga.

18E tau o aumai ne ia ki te faitaulaga mo fai te taulaga e toe togi atu ei tena agasala, se mamoe tagata io me se kouti tagata, kae seai se pona. A tena togi e pela eiloa mo te togi‐faka‐te‐malo. Ka ofo atu ne te faitaulaga a te taulaga tena mo te fakamagaloga o agasala a te tagata tena, tena ko magalo ei a ia.

19A te mea tena se taulaga o te toe togiga ne ia o te agasala ne fai ne ia ki te Aliki.