ESEKIELU 28 - Tuvalu Revised Bible

Ko Muna Fakapelofeta ki te Tupu o Tulo

1A te Aliki ne faipati mai ki a au,

2ana muna, “Te tagata ola, fai atu ki te pule o Tulo, i a au, te Aliki Sili, ko fai atu penei: A koe ko fete faka eiloa i te fakamatamata, kae fai ake koe pela i a koe se atua. A koe e fai ake pela i a koe e sagasaga i luga i te nofogaaliki pela me se atua, kae nikoi koe ne te tai. A koe e fai pela i a koe se atua, kae tela la, a koe se tino ola fua, se se atua.

3A koe e leake nei i a koe e poto atu i a Taneli, kae mafaufau pela me e seai se mea funa e se mafai o se iloa ne koe.

4A tou poto mo tou iloa ko fai ne ia koe ke maumea i aulo mo siliva.

5E atamai koe i te faiga o mea togi, kae e maua faeloa tau tupe silia. Ko oko eiloa i tou fakamatamata i tou maumea!

6“Konei la aku muna ki a koe, ko au ko te Aliki Sili. Ona ko koe e leake nei i a koe e poto pela me se atua,

7ka aumai ne au a te fili fakasaua o ta koe. Ka fakamasei ne latou a mea gali katoa a koe kola ne maua i tou iloa mo tou poto.

8Ka tamate ne latou a koe kae tuku atu koe ki te tanuga e sua i te vai.

9Kafai ko o'mai latou o ta koe, e mata koi fai koe pela i a koe se atua? Kafai ko fakafesagai koe mo tino ka o'mai o tamate koe, kae ka iloa ne koe i a koe se tino ola fua kae se se atua.

10Ka mate koe pela me se kuli i lima o tino fakaatea fapaupau. Ko au, te Aliki Sili, tena ne tuku atu ne au te fakatonuga.”

Ko Takavale te Tupu o Tulo

11A te Aliki ne toe faipati mai ki a au,

12ana muna, “Te tagata ola, tagi ona ko te ikuga tela ka oko ki te tupu o Tulo. Fai ki ei i a au, te Aliki Sili, ko fai atu penei: A ou uiga muamua ne fai mo akoakoga lei ki tino. A koe ne gali kae poto muamua!

13A koe ne nofo i Etena, te fatoaga a te Atua, kae teu ki vaega fatu taua valevale: ko lupi mo taemani; topasi mo pelila; kaneli mo iasipi; safaila, emela, mo kaneti. E isi ne ou teuga aulo taua, ne faite ne latou mo koe i te aso ne faite ei koe.

14Ne tuku atu ne au te agelu fakamataku ki kona ke leoleo ne ia koe. A koe ne nofo i luga i toku mauga tapu kae sasale i luga i fatu malapulapu.

15Ko oko eiloa i te lei o au faiga mai i te aso ne faite ei koe ke oko mai ki te taimi tenei ko kamata ei koe o fai amioga masei.

16A koe ko saga atu eiloa o fai au mea togi, tena ko ala ei koe o fakasaua kae fai agasala. Tena la, ne fai malo ei ne au a koe ke fano keatea mai i toku mauga tapu, kae ne afuli koe ne te agelu tela e leoleo ne ia koe mai i fatu malapulapu kona.

17A koe ne fakamatamata i tou gali, ka ko tou takutakua ko fai ne ia koe ke pela me se vale. Ona ko te mea tena, ne pei ei ne au a koe ki lalo i te laukele kae tiakina koe i kona ke fai mo akoakoga ki nisi tupu.

18Ne fai ne koe amioga masei i au pisinisi, tela la, ou koga tapuaki ko se aoga katoa. Tena ne sunu ei ne au te fa'kai ke ii ki lalo i te laukele. A latou katoa kola e kilo atu ki a koe ka liu lefu.

19A koe ko galo atu, ko galo atu eiloa ki te se gata mai, ka ko malo katoa kola ko iloa ne latou a koe ko oko eiloa i te mataku, e mataku i a latou ma iku ki te ikuga tela ne oko koe ki ei.”

Ko Muna Fakapelofeta ki Saitonu

20 Ioelu 3.4-8; Saka 9.1,2; Mata 11.21,22; Luka 10.13,14 A te Aliki ne fai mai ki a au,

21ana muna, “Te tagata ola, fakamalaia atu te fa'kai o Saitonu.

22Fai atu ki tino i kona a muna a aku, te Aliki Sili, e uiga ki a latou: Saitonu, au ko tou fili; ka tavae au ne tino ona ko aku faiga ki a koe. Ka iloa ne latou i a au ko te Aliki, manafai e fakaasi atu ne au toku malu i te fakasalaga ne au o tino kona e nofo i a koe.

23Ka avatu ne au a famai ki a koe, kae fakatafe a toto i ou auala. Ka ta mai koe i ou feitu katoa, kae ka mate ou tino. Tena la, ka iloa ei ne koe i a au ko te Aliki.”

Isalaelu ka Fakamanuia

24Muna a te Aliki, “A malo katoa i tafa o Isalaelu kola ne fai fakamasei ne latou a Isalaelu ka se toe fai pela me ne mouku io me ne lakau talatala o fakapakia a Isalaelu. Tena la, ka iloa ei ne latou i a au ko te Aliki Sili.”

25Muna a te Aliki Sili, “Ka fakafoki mai ne au a tino Isalaelu mai i malo kola ne fakasalalau ne au ki ei latou, kae ka iloa ei ne malo katoa i a au e tapu. A tino Isalaelu ka nofo i te fenua tonu o latou, te fenua tela ne tuku ne au ki taku tavini ko Iakopo.

26Ka nofo latou i kona mo te saogalemu. Ka faite olotou fale kae toki olotou togavine. Ka fakasala ne au a olotou tuakoi katoa kola ne fai fakamasei ki a latou, kae ka maua ne Isalaelu te filemu. Tena la, ka iloa ei ne latou i a au ko te Aliki te lotou Atua.”