1 NOFOAIGA TUPU 22 - Tuvalu Revised Bible

1Muna a Tavita, “Tenei te koga ka fakatu ei te Faletapu o te Aliki te Atua. Tenei te fata-fai-taulaga tela ka ofo sale i ei a taulaga sunu a tino Isalaelu.”

Ko Fakatokatokaga mō te Faitega o te Faletapu

2Ne fai te fakatonuga a te Tupu ko Tavita ke maopoopo a tino fakaatea katoa kola e nofo i luga i Isalaelu, kae fakagalue ne ia. A nisi o latou e fakatoka ne latou a fatu lasi mo faite te Faletapu.

3Ne aumai ne ia a fiti e uke ke faite ki ei a fao mo kalamu mō mataloa laupapa, mo palasi e uke, seai se tino e mafai ne ia o fua.

4Ne fai a ia ki tino Tulo mo tino Saitonu ke aumai a alasi e uke.

5Ne mafaufau aka Tavita penei, “A te Faletapu tela ka faite ne taku tama ko Solomona kaati ka se fakatau eiloa i te gali kae takutakua. A Solomona koi foliki kae seki masani fakalei, tela la, e 'tau o fakatoka atu nei ne au a mea mo te Faletapu.” Ne lasi eiloa te fakatokaga a Tavita i mea mo te faitega o te Faletapu, koi tuai ei a ia o mate.

6Ne uga tena fekau ki tena tama tagata ko Solomona kae fakatonu atu ne ia ke faite se faletapu mō te Aliki, te Atua o Isalaelu.

7 me i te taimi o tena nofoaiga, ka avatu ne au te filemu mo te saogalemu.

10Ko ia ka faite ne ia se faletapu mo oku. Ka fai a ia mo aku tama, kae ka fai au mo tamana o ia. A tena laina tupu ka pule faeloa i luga i Isalaelu ki te se gata mai.’ ”

11Ne faipati eiloa Tavita, ana muna, “Taku tama, a te Aliki tou Atua ke fakatasi atu ki a koe kae talosia ke tausi tena tautoga o fakataunu manuia ne ia tau galuega i te faitega o se faletapu mo ia.

12A te Aliki ke avatu ne ia te atamai mo te poto, ko te mea ke mafai ne koe o 'taki Isalaelu e tusa mo tena Tulafono.

13Iosu 1.6-9 Kafai e fakalogo koe ki tulafono katoa kola ne aumai ne te Aliki ki a Mose mo Isalaelu, kae ka manuia koe. Ke lotomalosi koe, kae toka tou loto, kae ke mo a koe e mataku i so se mea.

14Ka ko te Faletapu, ko oti ne taumafai au o fakaputu e tusa mo te 3,400 tani o te aulo, kae e silia atu i te 34,000 tani o te siliva ke fakaaoga i te faitega o te Faletapu. A te palasi mo te fiti e toka foki; se maua o fai i te uke. E toka foki te fatu mo te lakau, kae e tau o toe 'sala mai ne koe me e se lava.

15E tokouke foki au tino galue. E isi ne tagata ke galue i te koga e aumai ei te fatu, e isi foki ne tino poto i galuega ki fatu, mo kamuta, kae e tokouke foki a tino atamai i galuega valevale kola e mafai o galue

16ki aulo, siliva, palasi mo fiti. Na kamata nei te galuega, kae ke fakatasi atu te Aliki ki a koe.”

17Ne fakatonu ne Tavita a takitaki katoa o Isalaelu ke fesoasoani katoa ki a Solomona.

18Muna a ia penei, “A te Aliki te otou Atua ne fakatasi atu ki a koutou kae avatu ne ia te filemu ki a koutou mai i otou fili i otou feitu katoa. Ne tuku mai ne ia ke fakatakavale ne au a tino kola ne nofo sale i te fenua tenei muamua, kae nei ko i lalo o te otou pulega mo te pulega a te Aliki.

19Tela la, ke tavini atu koutou ki te Aliki te otou Atua mo otou loto mo agaga kātoa. Na kamata nei o faite te Faletapu, ko te mea ke na avatu ki ei a te Pusa o te Feagaiga a te Aliki mo nisi mea tapu katoa kola e fakaaoga i tapuakiga ki a ia.”