ESEKIELU 3 - Tuvalu Revised Bible

1 Faka 10.9,10 Muna a te Atua, “Te tagata ola, kai te peluga pepa tenei; ka oti ko fano ei koe o faipati ki tino Isalaelu.”

2Tena la, ne fakamaga toku gutu, tuku mai ei ne ia a te peluga pepa ke kai ne au.

3Muna a ia penei, “Te tagata ola, kai te peluga pepa tenei e avatu ne au; fakafonu ki ei tou tinae.” Ne kai ne au, e pela eiloa mo te hani i te magalo.

4Tena kae fai mai te Atua penei, “Te tagata ola, fano o folafola atu ki tino Isalaelu a muna katoa konei e fai atu ne au ke fano koe o fai.

5A koe e se uga ne au ki se fenua tela e faipati ki se gana fakaatea, kae ko Isalaelu tena e uga ne au koe ki ei.

6Kafai e uga ne au a koe ki malo takutakua kola e faipati ki gana faigatā kola e se malamalama koe i ei, ka fakalogo atu eiloa a tino kona.

7Kae e seai eiloa se tino Isalaelu e fia fakalogo; e se fia fakalogo mai foki ki a au. A latou katoa e lotomakeke kae fui fakalogo.

8Ka fai nei ne au a koe ke loto makeke kae toa pela mo latou.

9Ka fai ne au a koe ke mautakitaki pela me se kaupapa, kae makeke pela me se taemani; sa mataku ki tino loto teke kona.”

10Ne faipati mai eiloa te Atua, ana muna, “Te tagata ola, saga tonu mai, kae masaua a mea katoa ne fai atu ne au ki a koe.

11Ka oti, ko fano ei koe ki tagata o tou fenua kola ne ave fakapagota, kae fai atu ki a latou a muna konei e fai atu ne au, te Aliki Sili, ki a latou, faitalia me e saga mai ki ei io me ikai.”

12Tena, kae sau aka ei au ne te agaga o te Atua, kae lagona atu ne au mai i oku tua a te leo pakū tela e fai mai penei, “Ke vikia te malu o te Aliki i te lagi!”

13Ne lagona atu ne au a te leo o kapakau o manu e kapatā i luga i te ea, mo te leo o teka, pela eiloa mo te gulu o se mafuie.

14Ne oko mai a te mana o te Aliki ki a au mo te malosi katoatoa, kae i te taimi ne ave ei au ne tena agaga, ne lagona ifo ne au te mae mo te kaitaua.

15Tena la, ne vau ei au ki Tele Apipa i tafa o te vaitafe ko Kepa, te koga e nofo ei a te kau kola ne aumai fakapagota. Ne nofo au i kona i aso e fitu, kae ko oko eiloa i te mafa o toku loto i te mea ne lavea kae lagona ne au.

Esekielu ko Fili ne te Aliki ke Fai mo Tino Leoleo(Eseki 33.1-9)

16I te otiga o aso kona e fitu, kae faipati mai te Aliki ki a au.

17Muna a ia penei, “Te tagata ola, ko fai ne au a koe mo tino leoleo o te malo o Isalaelu. Ka fakaoko atu ne koe ki a latou a muna polopoloki konei ne tuku atu ne au ki a koe.

18Kafai e fakailoa atu ne au i te tino amio masei tela ko pili o mate, kae e seki fakailoa ne koe ki ei ke fuli ona uiga ke fakasao tena ola, ka mate eiloa a ia mo ana agasala, kae ka lou ne au me ko koe e pogai ei te mate o te tagata tena.

19Kafai ne polopoloki ne koe a te tagata amio masei, kae e se fakagata ana uiga masei, ka mate eiloa a ia mo ana agasala, kae ka sao koe i te feitu tena.

20“Kafai se tagata amiotonu ko kamata o fai amioga masei, kae ko fakapuapuaga ne au tena olaga, ka mate eiloa a ia manafai e seki polopoloki ne koe. Ka mate a ia ona ko ana agasala, ka se manatua ne au a mea lei ne fai ne ia, kae ka lou ne au me ko koe e pogai ei te mate o te tagata tena.

21Kafai ne polopoloki ne koe se tagata lei ke se toe fai ne ia te agasala, kae ne fakalogo atu ki a koe, ko se fai ei ne ia a te agasala, ka ola a ia, ka ko koe ka sao foki tou ola.”

Esekielu ko se Maua o Faipati

22Ne lagona ne au a te mana o te fakatasi mai o te Aliki, kae lagona atu ne au ana muna e fai mai ki a au penei, “Tu ki luga o fano ki te vanu. Ka faipati atu au ki a koe i kona.”

23Tena ne fano ei au ki te vanu, i kona ne lavea ei ne au a te malu o te Aliki, e pela eiloa mo te laveaga ne au i tafa o te Vaitafe ko Kepa. Ne siga ifo au ki lalo i te laukele mo oku mata e fuli ki lalo,

24kae ne ulu mai te agaga o te Atua ki loto i a au, o fakatu ne ia au ki luga. Muna a te Aliki ki a au, “Foki o loka koe i loto i tou fale.

25Te tagata ola, a koe ka saisai ki lopu kae ka se mafai ne koe o fano ki tua i mata o tino.

26Ka faka'pili ne au tou laulaufaiva, ko te mea ke se mafai ne koe o polopoloki a tino loto teke konei.

27Tena la, kafai ko toe faipati atu au ki a koe, kae fai koe ke toe mafai o faipati, ko folafola atu ei ne koe ki a latou aku muna konei e fai atu. E isi ne tino i a latou ka fakalogo atu, ka ko nisi ka se saga atu ki au muna e fai, me i a latou se malo loto teke.”