ISAIA 61 - Tuvalu Revised Bible

Ko te Tala Lei o te Fakaolataga

1 Mata 11.5; Luka 7.22 Luka 4.18,19 A te Aliki Sili ne fakafonu ne ia au ki tena agaga.

Ne filifili ne ia au, uga ei ne ia au

O avatu te tala lei ki tino mativa,

O fakalei a loto o tino fanoanoa,

O folafola atu te fakasaolotoga ki pagota

Mo te saoloto ki tino i loto i falepuipui.

2 Mata 5.4 Ne uga mai ne ia au o folafola atu

Me ko oko mai te taimi

Tela ka fakasao ei ne te Aliki a tena fenua kae fakatakavale olotou fili.

Ne uga mai ne ia au o fakamafanafana a latou katoa kola e tagi fanoanoa,

3O avatu ki a latou kona e tagi fanoanoa i Siona

A te lifu mo te fiafia kae se ko te fanoanoa,

A pese o vikiga kae se ko te loto mafatia.

Ka pela latou me ne lakau

Kola ne toki eiloa ne te Aliki.

Ka fai katoa ne latou a te mea tonu,

Kae ka vikia te Atua i mea ne fai ne ia.

4Ka toe faite ne latou a fa'kai kola ko leva eiloa ne maofa.

5Toku fenua, a tino fakaatea ka tavini atu ki a koutou.

Ka tausi ne latou otou manu

Kae toki ne latou te otou laukele

Kae tausi otou togavine.

6Ka takua koutou ko faitaulaga a te Aliki,

Ko tavini a te tou Atua.

Ka manuia koutou i te maumea o malo

Kae ka fakamatamata koutou me ko puke ma koutou.

7Ko oti atu aso, ne fakamasiasigina sale ei koutou.

Ka nofo nei koutou i te otou fenua totino eiloa,

Ka ko te otou maumea ka faluaina;

A te otou fiafia ka seai se gatamaiga.

8Muna a te Aliki,

“Au e fiafia ki te fai mea tonu, kae takalialia

i te fakasaua mo te amio masei.

Ka fakamaoni eiloa au o avatu te taui lei

Ki toku fenua

Kae fai se feagaiga tumau mo latou.

9Ka takutakua latou i malo;

A tino katoa e kilo ki oku tino kae e iloa ne latou

i tino o toku fenua ne fakamanuia ne au.”

10 Faka 21.2 Ko fiafia Ielusalema ona ko te mea ne fai ne te Aliki.

E pela a ia me se tamafine tela ko teu

Ki tena fakaipoipoga.

Ne fakapei a ia ne te Atua ki te fakaolataga

Mo te manumalo.

11E pela mo te iloa tonu ne tatou i fuaga e tupu ake ko ola ei,

E pena te iloa tonu ne tatou i te Aliki Sili e fakasao eiloa ne ia tena fenua,

Ka ko malo katoa ka tavae atu ki a ia.