IOPU 20 - Tuvalu Revised Bible

Sofala

1-2Iopu, ko fai ne koe au ke ita. Nei, au ko manako eiloa ke na tali atu au ki a koe.

3A tau muna tena ne fai e faka'ita ki a au, kae e lei me e iloa ne au o tali tau faipatiga tena.

4Kaati e iloa ne koe, me mai aso mua eiloa,

I te taimi ne fatoa fakanofo ei te tagata i te lalolagi,

5E seai eiloa se tagata amio masei e mafai o tumau tena fiafia.

6E mafai a ia o takutakua malosi eiloa kae oko atu foki eiloa tena takutakua ki kaumana,

7Kae ka agina fua a ia keatea e pela me se pefu.

A tino kola ne masani mo ia ka sala ki a ia,

Me e tefea te koga ko fano a ia ki ei.

8Ka galo atu a ia e pela me se moemiti, e pela me se fakaasiga i te po,

Kae ka se toe lavea atu eiloa a ia.

9Ka galo atu a ia mai i te koga ne masani o nofo sale ei a ia;

10Ka ko ana tama tagata ka fakaaoga ne latou a mea ne kaisoa ne ia mai i tino mativa.

11A tena foitino ne tupu malosi i aso koi tamataene ei a ia, kae e se leva ko liu pefu.

12-13A te masei ko oko eiloa i te logotonu ki a ia,

Tela la, e isi faeloa ne mea e tausi ne ia i tena gutu ke fakalogotonu a ia i ei,

14Kae i te okoga ki tena tinae, ko te meakai eiloa ko 'kona,

Ko 'kona eiloa pela me se mea poisini malosi.

15A te tagata masei e luaki mai ne ia a te koloa ne kaisoa ne ia;

Ko toe puke mai ne te Atua mai i a ia,

Mai i loto i tena tinae.

16A te mea ne folo ne te tagata masei se poisini fua;

E tamate a ia ne te poisini e pela eiloa me se gata tatino.

17Ka se ola a ia ke lavea ne ia a sinu olive e tafe pela me ne vaitafe,

Io me ko vaitafe foliki e tafe i ei te susu mo te hani.

18Ka tiakina eiloa ne ia a mea ne fakamaumau ki ei tena malosi;

Ka seai eiloa se avanoa ke mafai ei ne ia o fiafia i tena maumea,

19Me e fakapuapuaga ne ia a tino mativa, kae fao malo ne ia a fale ne faite ne nisi tino.

20A tino manako ki mea e se mafai o gata mai.

21Kafai e kai, e seai se mea e toe;

Kae nei, ko gata mai eiloa tena maumea.

22Kafai ko oko eiloa i tena maumea, kae ka 'tao a ia ne te mafa katoatoa o te malaia.

23Tuku atu a ia ke kai ki te mea e mafai ne ia!

Ka fakasala a ia ne te Atua i tena kaitaua.

24Kafai e taumafai a ia ke sao mai i se pelu fiti,

Kae ka tu a ia i se matasana mai i te kausana palasi.

25Ka tu malo se matasana i tena foitino;

A te mata malapulapu o te matasana e salisali ei te toto,

Tena kae ko oko eiloa i tena mataku.

26Ana mea katoa ne fakaputu ko fakamaseigina katoa;

Ko 'ka a ia mo tena kaiga katoa i te afi tela e seki fakaka ki lima o se tino.

27Ko fakaasi ne te lagi a agasala a te tagata tenei,

Ka ko te lalolagi e molimau ki ana agasala.

28A tena maumea katoa ka fakamasei ne te kaitaua o te Atua.

29Tena te ikuga o tino amio masei, ko te ikuga ne aumai ne te Atua ki a latou.