KOLOSE Fakatomuaga - Tuvalu Revised Bible

Fakatomuaga Te tusi a Paulo ki tino Kolose ne tusi ki te Ekalesia i Kolose, se fa'kai i Asia Foliki ki te saegala o Efeso. A te Ekalesia tenei seki fakatū ne Paulo, kae e tu i loto i te kogā koga tela e onoono ki ei a Paulo, kae ave foki ne ia ki ei, a tino galue mai Efeso, te laumua o te itumalo o Loma i Asia. A Paulo ko oti ne iloa ne ia, me ko isi nei ne faiakoga loi i loto i te Ekalesia i Kolose, kola e fakamalosi ne latou me i te iloa o te Atua, mo te maua o te fakaolataga katoa, a te tino e tau o tapuaki “ki naai vaega o tino, kola e isi ia latou se malosi faka-te-agaga mo tino 'pule.”Kae fakaopoopo ne faiakoga konei, me i te tino e tau o tausi ki faifaiga fakapitoa, pela mo te pilitome kae tau foki mo ia, o tausi ki tulafono taua e uiga mo meakai mo nisi mea ake.A Paulo ne tusi o 'teke atu ki akoakoga konei, kae e fakaasi ne ia a akoakoga 'tonu faka-Kelisiano. A te kano loto o tena tali, me i a Iesu Keliso ko ia fua e mafai ne ia o tuku te fakaolataga katoatoa, kae e pela mo nisi talitonuga mo akoakoga, e olo mao keatea mai i a ia. Kae e alatu i a Keliso, ne faite ei ne te Atua a te lalolagi, kae mai i a ia ka toe fakafoki mai ne ia ki a ia eiloa. Na fua ko te 'soko fakatasi mo Keliso, ka maua i ei se fakamoemoega o te fakaolataga mo te lalolagi. Ne taku tonu atu ne Paulo a pokotiaga o akoakoga taua konei ki olaga o tino talitonu.E fakataua i konei, me ia Tukasi, tela ne fano mo te tusi tenei a Paulo ki Kolose, ne olo fakatasi mo Onosemu, te pologa tela ne tusi fakatagi a Paulo mo ia ki a Filemoni

Ko Fakasologa o MataupuFakatomuaga (1.1-8)Autu mo te galuega a Keliso (1.9—2.19)Ola fou i a Keliso (2.20—4.6)Fakaotiga (4.7-18)