IOSUA 10 - Tuvalu Revised Bible

Ko takavale a Amoli

1A Atonisateko, te Tupu o Ielusalema, ne logo i te pukega ne Iosua a te fa'kai o Ai kae fakamasei valevale, kae tamate foki mo tena tupu, e pela mo te mea ne fai ne ia ki te fa'kai o Ieliko mo tena tupu. Ne logo foki a ia i tino Kipeona ko fakataugasoa mo tino Isalaelu kae ko nofo tasi.

2Ne ofo tino Ielusalema i te mea tena, me e iloa ne latou i Kipeona se fa'kai lasi, e pela eiloa mo fa'kai kola e isi ne tupu o latou; kae lasi atu foki i te fa'kai o Ai, ka ko ona tagata ne tino poto i te taua.

3Tena, ne ave ei te fekau a Atonisateko ki a Ohama te Tupu o Hepelona, Pilama te Tupu o Ialamuta, Iafia te Tupu o Lakisa, mo Tipeli te Tupu o Ekelona. E penei te fekau:

4“O'mai o fesoasoani mai ke ta ne tatou a tino Kipeona me konei ko fakataugasoa ki a Iosua mo tino Isalaelu.”

5Tena, ne kau fakatasi ei a tupu o Amoli kona e tokolima; ko te tupu o Ielusalema, Hepelona, Ialamuta, Lakisa mo Ekelona, o nikoi te fa'kai o Kipeona kae taua atu ki ei.

6Tena ne ave ei te fekau a tagata Kipeona ki a Iosua i Kilikala penei: “Tou malu, sa tiakina mai matou! Vau fakavave o fesoasoani mai ki a matou! Vau o fakasao matou! A tupu katoa o Amoli i te fenua maugā ko kau fakatasi o taua mai ki a matou!”

7Tena ne fanatu ei a Iosua mai Kilikala mo tena kautau katoa, e aofia ei a potukau tafa'sili eiloa a ia.

8Muna a te Aliki ki a Iosua, “Sa mataku i a latou. Ko leva eiloa ne tuku atu ne au te manumalo ki a koe. E seai eiloa se tino i a latou e mafai o fakafeagai ki a koe.”

9I te po katoa tena, ne mati atu Iosua mo tena kautau mai Kilikala ki Kipeona, tena, e poi te fili i te kau Isalaelu ko taua atu ki a latou.

10Ne fai ne te Aliki a tino Amoli ke ma'taku manafai e lavea ne latou a te kautau a Isalaelu. Ne ta valevale latou ne tino Isalaelu i Kipeona, kae afuli atu latou i te auala i va o mauga i Pete Holono, o taua atu ki a latou ke oko eiloa ki Aseka mo Maketa i saute.

11I te taimi ne tele atu ei a te kau Amoli i loto i te auala i va o mauga, ne fai ne te Aliki a te vaiua fatu ke to ki luga i a latou ke oko eiloa ki Aseka. E tokouke atu ne mate i te vaiua fatu i lo tino ne ta ne tino Isalaelu.

12I te aso tena, ne aumai ei ne te Aliki te manumalo ki tino Isalaelu i luga o tino Amoli, ne faipati atu ei a Iosua ki te Aliki. I mua o tino Isalaelu ne faipati ei a Iosua penei,

“Te la, tu ke mau i luga i Kipeona;

Te masina, tu ke mau i luga i te vanu o Aitialona.”

13 2Samu 1.18 Tena, ne tu eiloa te la, mo te masina foki ko se gasue eiloa, ke oko ki te taimi ne fakatakavale ei ne Isalaelu ona fili. A te mea tena e tusi i Te Tusi a Iasela. A te la ne tu mautakitaki i te kogaloto o te lagi i te aso katoa tena.

14E seai eiloa se aso pena mai ana mua, e seai foki se aso pena talu mai te aso tena, ne fakalogo ei te Aliki ki se tino ola. A te Aliki ne kau eiloa ki tino Isalaelu!

15I te otiga o te mea tena, ko Iosua eiloa ko foki atu mo tena kautau ki te koga e nofo ei latou i Kilikala.

Ko Fakapagota a Tupu e Tokolima o Amoli

16A tupu o Amoli kola e tokolima ne sola, kae e muni i ana i Maketa.

17E isi se tino ne maua ne ia a tupu kona, tena logo foki ei a Iosua i te koga tena e muni ei latou.

18Muna a Iosua, “Tule atu ne fatu lasi ki te gutu o te ana tena. Aumai ne sotia ke leoleo i kona,

19kae sa nofo koutou i kona. Tau'tali atu eiloa o taua ki te fili; sa tukugina ke to atu latou ki loto i olotou fa'kai! Ko oti ne tuku mai ne te Aliki te otou Atua te manumalo i a latou.”

20Ne ta valevale ne Iosua mo tena kau a te kau o te fili, kae e isi eiloa ne tino o latou ne to atu ki loto i pui o olotou fa'kai, tela ko sao ei latou.

21Oti aka, ko te kau eiloa a Iosua ko foki atu ki a ia i te koga e ma'nava ei latou i Maketa.

Tena, ko seai eiloa se tino i te fenua e fia fai sena pati teke ki tino Isalaelu.

22Muna a Iosua, “Tule keatea te fatu tena e pono ei te pu o te ana, kae aumai a tupu kona e tokolima ki a au.”

23Tena, ne matala mai te pu o te ana, ko tupu eiloa kona o Ielusalema, Hepelona, Ialamuta, Lakisa mo Ekelona ko aumai ki tua

24o avatu ki mua o Iosua. Ne kalaga atu a Iosua ki tagata katoa o Isalaelu ke o'mai ki a ia, kae fakatonu atu ki ofisa kola ne olo mo ia ke o'mai o 'laka a ua o tupu kona. Tena ne fai eiloa ne ofisa kona a te fakatonuga tena.

25Oti aka, fai atu ei a Iosua ki ana ofisa penei, “Sa mataku io me loto vaivai. Lotoma'losi kae fakatuanaki, me e penei te mea ka fai ne te Aliki ki otou fili katoa.”

26Tena, ne tamate ne Iosua a tupu kona kae fakatautau i luga i lakau e lima. Ne tautau eiloa olotou foitino i kona ke oko ki te afiafi.

27I te toga o te la, ne fai te fakatonuga a Iosua ke aumai a foitino o tupu kona o pei ki loto i te ana tela ne muni ei latou. A fatu lasi eiloa ne pono i te pu o te ana, kae konei eiloa koi tu i kona.

Ko Nisi Kogā Fenua o Amoli ne Puke ne Iosua

28Ne fakatakavale ne Iosua i te aso tena a te fa'kai o Maketa mo tena tupu. Ne tamate katoa ne ia a tino i te fa'kai; e seai eiloa se tino ne sao. Ne fakasala ne ia te tupu o Maketa, e pela mo tena mea ne fai ki te tupu o Ieliko.

29Mai Maketa, ne toe olo atu Iosua mo tena kautau o taua atu ki Lipina.

30Ne tuku mai foki ne te Aliki a te manumalo ki tino Isalaelu i te fa'kai tenei mo tena tupu. Ne tamate katoa ne latou a tino i te fa'kai tena, seai eiloa se tino ne fakasao. Ne fakasala ne latou te tupu e pela mo te mea ne fai ne latou ki te tupu o Ieliko.

31Mai Lipina, ne toe olo atu Iosua mo tena kautau ki Lakisa o nikoi kae taua ki ei.

32Ne tuku mai ne te Aliki ki tino Isalaelu te manumalo i te fa'kai o Lakisa i te lua o aso o te taua. E pela eiloa mo te lotou mea ne fai i Lipina, ne tamate katoa eiloa ne latou a tino i kona, seai eiloa se tino ne fakasao.

33A Holamo, te Tupu o Kesela ne vau o fesoasoani ki Lakisa, kae ne fakatakavale ne Iosua a ia mo tena kau, tena, tamate katoa eiloa, seai se tino ne fakasao.

34Mai Lakisa, ne toe olo atu a Iosua mo tena kautau o nikoi Ekelona, taua atu eiloa ki ei.

35Ne fakatakavale ne latou i te aso eiloa tena, kae tamate katoa a tino i kona, e pela eiloa mo te mea ne fai ne latou i Lakisa.

36Mai Ekelona, ne olo atu a Iosua mo tena kautau ki Hepelona tela e tu i luga i mauga foliki, tena fakatakavale foki ei ne latou.

37Ne tamate ne latou te tupu mo tino katoa i te fa'kai tena, pela foki mo tino i fa'kai fo'liki i tafatafa o Hepelona. Ne fakamasei valevale ne Iosua te fa'kai tena, e pela mo tena mea ne fai ki Ekelona. E seai eiloa se tino ne sao.

38Tena, ne toe mafuli ifo Iosua mo tena kautau o taua atu ki Tipeli.

39Ne fakatakavale ne ia te fa'kai tena mo tena tupu, pela foki a fa'kai foliki kola e pili mai. Ne tamate ne latou a tino katoa i kona. A te mea ne fai ne Iosua ki te fa'kai o Hepelona mo Lipina mo o la tupu, tenei ko fai foki ne ia ki te fa'kai o Tipeli mo tena tupu.

40Ne fakatakavale eiloa ne Iosua te fenua katoa. Ne fakatakavale ne ia a tupu o fenua mauga, tupu o fenua i kogā koga i te saegala, tupu o fenua i lalo o mauga i te togala, e pela foki mo tupu o fenua vela i saute. Ne tamate katoa ne ia a tino ne fakatakavale ne ia, seai eiloa se tino ne fakasao. A te mea tena ko te fakatonuga a te Aliki, te Atua o Isalaelu.

41A te taaga a Iosua ne kamata mai i Katesa Paenea i saute ke oko ki Kasa i te feitu ki te 'tai, e aofia ei a te laukele katoa o Kosena, ke oko ki Kipeona i matu.

42Ne fakatakavale ne Iosua a tupu katoa konei mo olotou fenua i te paga e tasi, me i te Aliki, te Atua o Isalaelu e kau ki a latou.

43I te otiga o te mea tena, ko Iosua eiloa mo tena kautau ko foki atu ki te koga e nofo ei latou i Kilikala.