1Ne fanatu a Leopoamo ki Sekema, te koga e maopoopo i ei a tino Isalaelu ki matu o fakatoka o fakasopo a ia ke fai mo tupu.
2I te logoga o Ielopoamo, te tama tagata a Nepata tela ne sola ki Aikupito mai i a Solomona, i te tala tena, te mea eiloa ko foki mai ki Isalaelu.
3A tino Isalaelu ne uga te lotou fekau ki ei, olo ei latou ki a Leopoamo kae fai atu ki a ia penei,
4“A matou ne seki fai faka'lei ne tou tamana ko Solomona, kae ne fakafita foki ne ia matou ki galuega 'mafa. Kafai e tai fakamama ne koe a te amoga tenei ke tai faigofie, kae fesoasoani mai foki ki a matou ke 'lei omotou olaga, kae ka tautua fakamaoni atu eiloa matou ki a koe.”
5Ne tali atu a Leopoamo ki a latou penei, “Tuku mai e tolu aso ke mafaufau aka au ki te mea tena. Kafai e katoa te tolu o aso, ko foki mai ei koutou.” Tena, ne foki ei a tino kona.
6Ne fesili atu a Leopoamo ki toeaina, kola ko tagata fakatonutonu a tena tamana ko Solomona penei, “Se a te tali e 'tau o avatu ne au ki tino konei?”
7Ne tali mai latou penei, “Kafai e alofa koe ki tino konei, tuku atu se tali 'lei ki a latou ke fiafia latou, kae ka tavini fakamaoni eiloa latou ki a koe.”
8Ne seki fakalogo a ia ki te manatu o toeaina fakatonutonu a Solomona, kae ne fano a ia ki tamataene kola ne tupu tasi aka mo ia, konei ko fai nei mo ana tino fakatonutonu.
9Ne fesili atu a ia ki a latou penei, “Se a taku tali ka fai ki tino konei ne o'mai o fai mai ke fakamama aka olotou amoga?”
10Ne tali mai latou penei, “Konei a muna e tau o fai ne koe ki a latou: ‘A toku matikao tama e fula atu i te taugasulu o toku tamana!’
11‘A toku tamana ne tuku atu ne ia a amoga 'mafa ki a koutou; ka silia atu te 'mafa o te amoga tenei ka tuku atu ne au ki a koutou. Ne kini sale ne ia koutou ki te mea kini, kae nei, koutou ka kini ne au ki te mea kini solofanua!”’
12E tolu aso mai i tua ifo, ko Ielopoamo mo tino Isalaelu ki matu ko foki atu ki te Tupu ko Leopoamo, e pela eiloa mo tena fakatonuga ki a latou.
13Ne fakaseaoga ne te tupu a muna fakatonutonu a toeaina, tena, ne faipati eiloa a ia mo te se ava ki tino kona,
14e pela eiloa mo te fakatonuga a ana tamataene fakatonutonu. Muna a ia penei, “A toku tamana ne fakafi'ta ne ia koutou; kae nei, ka silia atu te mea tenei ka fai ne au ki a koutou. Ne kini ne ia koutou ki te mea kini; kae nei, koutou ka kini ne au ki te mea kini solofanua!”
15Ko te loto eiloa o te Aliki te Atua, ke taunu tena muna ne fai ki a Ielopoamo te tama tagata a Nepata, e auala i te pelofeta ko Aita mai i Sailo. Tena te mea ne seki saga ei te tupu ki tino Isalaelu.
16 2Samu 20.1 I te laveaga ne te vaitino i te tupu e se fia saga atu ki a latou, ne ka'laga ei latou penei, “Tiaki atu Tavita mo tena kaiga! Se a eiloa te mea 'lei ko oti ne fai ne latou mo tatou? Tagata Isalaelu, tatou ka foki ki 'tou fa'kai! Tuku atu ei a Leopoamo ke fai mo tupu i tena kaiga eiloa!”
17Tena ne teke atu ei a tino Isalaelu ki te tupu, kae 'toe mai ei ko tino eiloa i te kogā laukele o Iuta e talia ne latou a Leopoamo ke fai mo tupu o latou.
18Ne uga ne Leopoamo a Atonilama tela e takitaki i te kau galue, ke fano o faipati ki tino Isalaelu, kae ne peipei a ia ne tino kona ki fatu ke mate. I te tupuga o te mea tena, ko Leopoamo eiloa ko sopo fakavave ki luga i tena kaliota o sola ki Ielusalema.
19Talu mai te taimi tena, a tino o te malo o Isalaelu ki matu ko teke atu eiloa ki te gafa tupu o Tavita.
Who We AreWhat We EelieveWhat We Do
2025 by iamachristian.org,Inc All rights reserved.
