SALAMO 59 - Tuvalu Revised Bible

Te 'Talo mo se Puipuiga

1Toku Atua, fakasao au mai oku fili,

Puipui au mai i a latou kola e faitaua mai ki a au!

2Fakasao au mai tino amio ma'sei kona;

Fakaola au mai lima o tino tatino!

3Kae kiloke, a latou e fakatalitali o ta au;

A tagata saua ko 'luku fakatasi o faitaua mai ki a au.

E se pogai mai saku agasala io me saku mea 'se ne fai,

4io me se mea ko tosala ei au,

Tela ko ala ei o fakavavave latou ki olotou koga nofo.

5Te Aliki te Atua Tafasili i te Malosi, tu ake,

Vau o fesoasoani mai ki a au;

Kilo ou mata ki ei te Atua o Isalaelu!

Ala mai o fakasala a fenua fakaatea;

Fakaasi atu tou se alofa ki tino faitogafiti ma'sei!

6E 'foki mai latou i te afiafi, e fakatau'tagi latou e

Pela mo kuli e tele sale i te fa'kai.

7Fakalogo ake ki olotou muna fakaitaita mo te fakamasei.

A olotou laulaufaiva e pela eiloa me ne pelu i olotou gutu,

Kae e mafaufau latou pela me seai se tino e lagona ne ia latou.

8Ka ko koe e te Aliki e katakata ki a latou;

E fakatauemu koe ki fenua fakaatea.

9Au e talitonu ki tou malosi;

Te Atua a koe ko toku lafiga.

10A toku Atua e alofa ki a au,

Ka vau o fesoasoani ki a au;

Ka fakaasi mai ne ia ki a au te takavale a oku fili.

11Te Atua, sa tamategina latou, i te mea ma puli i toku fenua a akoakoga.

Te Aliki te motou puipuiga,

Fakasalalau atu latou ne tou malosi kae fakatakavale foki latou.

12A te agasala e i olotou laugatu;

A olotou muna katoa e fonu i te agasala;

Ke malaia eiloa latou i te lotou fia sili!

13'Ta fakapalele atu a latou i tou kaitaua;

Fakamasei atu a latou me i a latou e muna 'tuku kae 'loi.

Ko iloa ei ne tino katoa i te Atua e pule ne ia Isalaelu,

Ko tena pule e oko atu ki te lalolagi katoa.

14E 'foki mai oku fili i te afiafi, e 'tagi e pela me ne kuli e tele sale i te fa'kai,

15O salasala meakai; kae fakatau'tagi manafai e se makona latou.

16Ka ko au e viki atu ki tou malosi;

i taeao takitasi au e pese fiafia ki tou alofa tumau.

I a koe ko oti ne fai mo oku lafiga, ko toku malūga foki i aso o puapuaga.

17Ka tavae ne au koe, toku puluga, a toku lafiga ko te Atua,

Ko te Atua tela e alofa mai ki a au.