SALAMO 21 - Tuvalu Revised Bible

Ko Tavaega mo te Manumalo

1Te Aliki, ko fiafia te tupu ona ko te malosi ko maua ne ia mai i a koe;

Ko 'fonu a ia i te fiafia me ne fai ne koe a ia ke manumalo.

2Ne tuku atu ne koe ki a ia te mea e manako a ia ki ei,

Ne tali foki koe ki ana fakatagi.

3Ne vau koe ki a ia mo fakamanuiaga e uke,

Kae tuku ne koe te foualiki aulo ki tena ulu.

4Ne fakatagi atu a ia ki a koe ke maua te ola,

Kae ne tuku atu ne koe ki a ia te ola e tumau ki te se gata mai.

5Ko oko eiloa te lasi o tena 'malu ona ko tou fesoasoani;

Ko oti foki ne avatu ne koe te 'malu fakatupu mo te takutakua ki a ia.

6Au fakamanuiaga ko i luga i a ia ki te se gata mai,

Kae 'fonu a ia i te fiafia ona ko tou fakatasi mo ia.

7Ne fakatuaga te tupu ki te Aliki Tafasili i te Malosi;

Ka maua ne ia te filemu

Ona ko te alofa tumau o te Aliki.

8Ka puke ne te tupu ona fili katoa;

Ka fakapagota ne ia a latou katoa kola e ita mai ki a ia.

9Ka 'ta fakapalele ne ia a latou e pela mo se afi 'ka ulaula,

Manafai e oko mai a ia.

Ka folo latou ne te Aliki i te taimi e kaitaua ei a ia,

Kae ka 'sunu fakapalele latou i te afi.

10Ka seai se tino i te gafa o latou ka 'sao

Me ka tamate katoa latou ne te tupu.

11E fai ne latou a aofaga mo togafiti ma'sei ki a ia,

Kae ka se taunu.

12Ka sana ne ia latou ki ana matasana,

Ko latou loa ko tele keatea.

13Te Aliki, e viki atu matou ki a koe i a koe e malosi!

Ka usu kae viki atu matou ki tou mana.